قازاقستاندا مۇگەدەكتىگى بار جاندارعا ءبىرجولعى تولەم بەرىلەدى: قاي ءوڭىر قانشا قارجى ءبولدى

تولەم مولشەرى مەن ونى الۋشىلاردىڭ ساناتتارى وڭىرلەرگە قاراي وزگەرەدى. Kazinform اگەنتتىگى وبلىستار مەن رەسپۋبليكالىق ماڭىزى بار قالالارداعى الەۋمەتتىك قولداۋ شارالارىنا شولۋ جاسادى.

استانا قالاسىندا مۇگەدەكتىگى بار ازاماتتارعا ءبىرجولعى الەۋمەتتىك كومەك ولاردىڭ مۇگەدەكتىك توبىنا قاراي بەرىلەدى. ەلوردا ءماسليحاتىنىڭ شەشىمىنە سايكەس، تولەم مولشەرى مىناداي:

I توپتاعى ادامدارعا - 20 ا ە ك (86500 تەڭگە)؛

II توپتاعى ادامدارعا جانە 18 جاسقا دەيىنگى مۇگەدەكتىگى بار بالالارعا - 10 ا ە ك (43250 تەڭگە)؛

III توپتاعى ادامدارعا - 5 ا ە ك (21625 تەڭگە).

الەۋمەتتىك كومەك استانادا تىركەلگەن ازاماتتارعا «ازاماتتارعا ارنالعان ۇكىمەت» مەملەكەتتىك كورپوراتسياسىنداعى مالىمەتتەر نەگىزىندە ءوتىنىشسىز تاعايىندالادى. الايدا تۇرعىلىقتى جەرىن جاقىندا اۋىستىرعان ازاماتتار جاڭا مەكەنجايى بويىنشا تىركەلگەنىن تەكسەرۋى قاجەت.

قاعيدا بويىنشا، ءبىرجولعى الەۋمەتتىك كومەك كۇنتىزبەلىك جىلدا ءبىر رەت جانە ءبىر عانا نەگىز بويىنشا بەرىلەدى. سوندىقتان وسى جىلى باسقا نەگىزبەن ءبىرجولعى الەۋمەتتىك كومەك العان ازاماتتارعا بۇل كۇنگە وراي قايتا تولەم جاسالمايدى.

اقمولا وبلىسىندا ى، II جانە III توپتاعى مۇگەدەكتىگى بار ادامدارعا، سونداي-اق مۇگەدەكتىگى بار بالالارعا 3 ا ە ك مولشەرىندە، ياعني 12975 تەڭگە ءبىرجولعى كومەك قاراستىرىلعان.

وبلىستىق جۇمىسپەن قامتۋدى جانە الەۋمەتتىك باعدارلامالاردى ۇيلەستىرۋ باسقارماسىنىڭ مالىمەتىنشە، 2026 -جىلعى 25 قىركۇيەكتەگى جاعداي بويىنشا، تولەم 25103 ادامعا بەرىلۋگە ءتيىس. بۇل ماقساتقا اۋداندىق جانە قالالىق بيۋدجەتتەردەن 325,7 ميلليون تەڭگە بولىنگەن.

ءوڭىردىڭ كەيبىر قالالارى مەن اۋداندارىندا تولەمدەر اۋدارىلىپ قويعان. قالعان ازاماتتارعا قاراجاتتى قازان ايىندا بەرۋ جوسپارلانعان. الۋشىلاردىڭ ءتىزىمى ناقتىلانۋىنا بايلانىستى ولاردىڭ سانى وزگەرۋى مۇمكىن.

اباي وبلىسىندا I جانە II توپتاعى كامەلەتكە تولعان مۇگەدەكتىگى بار ازاماتتارعا، سونداي-اق مۇگەدەكتىگى بار بالالارعا 5 ا ە ك مولشەرىندە، ياعني 21625 تەڭگە تولەنەدى.

وڭىردە الەۋمەتتىك كومەكتى اۋدارۋ جۇمىستارى باستالعان. تولەمدەردى 20-قازانعا دەيىن تولىق اياقتاۋ جوسپارلانعان.

اقتوبە وبلىسىندا مۇگەدەكتىگى بار ازاماتتارعا ءبىرجولعى الەۋمەتتىك كومەك 25-قازان - رەسپۋبليكا كۇنىنە وراي بەرىلەدى. مەملەكەتتىك الەۋمەتتىك جاردەماقى الاتىن مۇگەدەكتىگى بار ادامدارعا 13 ا ە ك، ياعني 56225 تەڭگە، ال مۇگەدەكتىگى بار بالالارعا - 26 ا ە ك، ياعني 112450 تەڭگە تولەۋ كوزدەلگەن.

اتىراۋ وبلىسىندا رەسپۋبليكا كۇنىنە وراي I، II جانە III توپتاعى 18 جاستان اسقان 22996 مۇگەدەكتىگى بار ازاماتقا 20 ا ە ك، ياعني 86500 تەڭگەدەن ءبىرجولعى الەۋمەتتىك كومەك بەرىلەدى. تولەم الۋ ءۇشىن ءوتىنىش بەرۋ قاجەت ەمەس. قاراجات بەلگىلەنگەن تارتىپپەن ازاماتتاردىڭ ەسەپشوتتارىنا اۋدارىلادى.

مۇنداي كومەك وڭىردە 2021-جىلدان بەرى كورسەتىلىپ كەلەدى. سونىمەن قاتار مۇگەدەكتىگى بار بالالاردى تاربيەلەپ وتىرعان وتباسىلارعا دا الەۋمەتتىك قولداۋ قاراستىرىلعان. ولارعا بيىل مامىر ايىندا ءبىرجولعى كومەك بەرىلگەن.

باتىس قازاقستان وبلىسىندا 25-قازان - رەسپۋبليكا كۇنىنە وراي 18 جاسقا دەيىنگى بالالارعا 20 مىڭ تەڭگەدەن ءبىرجولعى تولەم بەرۋ قاراستىرىلعان.

جەتىسۋ وبلىسىندا 2024-جىلدان بەرى رەسپۋبليكا كۇنىنە وراي 18 جاسقا دەيىنگى مۇگەدەكتىگى بار بالالارعا ءبىرجولعى ماتەريالدىق كومەك بەرىلەدى. ۇكىمەت قاۋلىسىنا سايكەس، اۋداندىق جانە قالالىق ءماسليحاتتاردىڭ شەشىمدەرى نەگىزىندە تولەم مولشەرى 6 ا ە ك، ياعني 25950 تەڭگە بولىپ بەلگىلەنگەن.

بۇل قاراجات بالانىڭ اتا-اناسىنا نەمەسە وزگە دە زاڭدى وكىلىنە تولەنەدى.

قىزىلوردا وبلىسىندا رەسپۋبليكا كۇنىنە وراي بارلىق ساناتتاعى مۇگەدەكتىگى بار ازاماتتارعا 3 ا ە ك، ياعني 12975 تەڭگە مولشەرىندە ءبىرجولعى الەۋمەتتىك كومەك بەرىلەدى.

بۇدان بولەك، مۇگەدەكتىگى بار ادامداردىڭ قۇقىقتارىن قورعاۋ كۇنىنە وراي، 14-قازاندا سپارتاكيادا ۇيىمداستىرۋ جوسپارلانعان. ال 3-جەلتوقسان - حالىقارالىق مۇگەدەكتىگى بار ادامدار كۇنىنە وراي ارنايى ءىس-شارا وتكىزۋ كوزدەلگەن.

پاۆلودار وبلىسىندا رەسپۋبليكا كۇنىنە وراي مۇگەدەكتىگى بار ازاماتتار مەن ولاردىڭ وتباسىلارىنا بىرنەشە سانات بويىنشا تولەم قاراستىرىلعان:

مۇگەدەكتىگى بار بالالاردى تاربيەلەپ وتىرعان وتباسىلارعا - 25 ا ە ك، ياعني 108125 تەڭگە؛

I جانە II توپتاعى مۇگەدەكتىگى بار ادامدارعا - 5 ا ە ك، ياعني 21625 تەڭگە؛

قازاقستاننىڭ جوعارى وقۋ ورىندارىندا اقىلى نەگىزدە وقيتىن مۇگەدەكتىگى بار ستۋدەنتتەرگە - 60 ا ە ك، ياعني 259500 تەڭگە؛

قازاقستاننىڭ كوللەدجدەرىندە اقىلى نەگىزدە وقيتىن مۇگەدەكتىگى بار ستۋدەنتتەرگە - 30 ا ە ك، ياعني 129750 تەڭگە.

تۇركىستان وبلىسىندا مۇگەدەكتىگى بار ادامداردىڭ قۇقىقتارىن قورعاۋ كۇنىنە وراي، ۇيدە ارناۋلى الەۋمەتتىك قىزمەت كورسەتىلەتىن 18 جاسقا دەيىنگى مۇگەدەكتىگى بار بالالارعا كومەك بەرۋ جوسپارلانعان. بۇل ساناتقا 3 182 بالا كىرەدى.

وڭىردە الەۋمەتتىك كومەكپەن قاتار، اۋدان-قالالارداعى «تەڭ قوعام» ورتالىقتارىندا ارنايى جانە قايىرىمدىلىق ءىس-شارالارىن وتكىزۋ كوزدەلگەن.

شىمكەنت قالاسىندا مۇگەدەكتىگى بار بالالارعا ءبىرجولعى الەۋمەتتىك كومەكتى 25-قازان - رەسپۋبليكا كۇنىنە وراي تولەۋ جوسپارلانىپ وتىر. قالا اكىمدىگىنىڭ مالىمەتىنشە، 18 جاسقا دەيىنگى بالالارعا 5 ا ە ك، ياعني 21625 تەڭگەدەن بەرىلەدى.

1-قىركۇيەكتەگى دەرەك بويىنشا، قالادا وسى ساناتقا جاتاتىن 8238 بالا تىركەلگەن. تولەمگە جەرگىلىكتى بيۋجەتتەن 178,1 ميلليون تەڭگە باعىتتاۋ كوزدەلگەن.

بۇدان بولەك، اتا-انا قامقورلىعىنسىز قالعان 720 بالاعا 20 ا ە ك، ياعني 86500 تەڭگەدەن تولەنەدى. بۇل ماقساتقا 62,3 ميلليون تەڭگە قاراستىرىلعان.

قالادا 80 جاستان اسقان جالعىزباستى ازاماتتارعا دا اي سايىن الەۋمەتتىك قولداۋ كورسەتىلەدى. قازىرگى ۋاقىتتا 101 زەينەتكەرگە 2 ا ە ك، ياعني 8650 تەڭگەدەن تولەنىپ وتىر. ولاردى قولداۋعا 7 ميلليون تەڭگە بولىنگەن.

ال 16-جەلتوقسان - تاۋەلسىزدىك كۇنىنە وراي جەلتوقسان وقيعاسىنا قاتىسقانى ءۇشىن ساياسي قۋعىن-سۇرگىن قۇربانى رەتىندە اقتالعان 33 ادامعا 65 ا ە ك، ياعني 281125 تەڭگەدەن بەرۋ جوسپارلانعان. بۇل تولەمگە 9,2 ميلليون تەڭگە قاراستىرىلعان.

ۇلىتاۋ وبلىسىندا 18 جاستان اسقان I، II جانە III توپتاعى مۇگەدەكتىگى بار ازاماتتارعا 20 مىڭ تەڭگەدەن ءبىرجولعى الەۋمەتتىك تولەم بەرىلەدى.

جەرگىلىكتى اتقارۋشى ورگانداردىڭ مالىمەتىنشە، قاراجات قولدانىستاعى الەۋمەتتىك كومەك كورسەتۋ قاعيدالارىنا سايكەس، ازاماتتاردىڭ بانك شوتتارىنا ءوتىنىشسىز اۋدارىلادى. تولەمدەردى اۋدارۋ جۇمىستارى 15-قازانعا دەيىن جۇرگىزىلەدى.

ال جاڭا جىل قارساڭىندا 7 جاسقا دەيىنگى مۇگەدەكتىگى بار بالالارعا، سونداي-اق 7 دەن 18 جاسقا دەيىنگى I، II جانە III توپتاعى مۇگەدەكتىگى بار بالالارعا 40 مىڭ تەڭگەدەن ءبىرجولعى الەۋمەتتىك تولەم بەرۋ قاراستىرىلعان.

الماتى قالاسى، الماتى وبلىسى، جامبىل، ماڭعىستاۋ، سولتۇستىك قازاقستان، شىعىس قازاقستان، قوستاناي، قاراعاندى وبلىستارىندا مۇگەدەكتەردى قورعاۋ كۇنىنە ءبىر رەتتىك تولەم قاراستىرىلماعان.

بۇعان دەيىن مۇگەدەكتىگى بار ازاماتتارعا قانداي تولەمدەر قاراستىرىلعانىن جازعان ەدىك.