قازاقستاندا جەتى ايدا 9,7 ميلليون شارشى مەتر تۇرعىن ءۇي پايدالانۋعا بەرىلدى
استانا. KAZINFORM - قازاقستاندا بيىل 20,4 ميلليون شارشى مەتر تۇرعىن ءۇي سالۋ جوسپارلانعان، دەپ حابارلايدى ونەركاسىپ جانە قۇرىلىس مينيسترلىگىنىڭ باسپا ءسوز قىزمەتى.
قازاقستاندا تۇرعىن ءۇي قۇرىلىسى كولەمىن ۇلعايتۋ جانە ازاماتتاردى تۇرعىن ۇيمەن قامتاماسىز ەتۋ بويىنشا جۇمىستار جالعاسىپ كەلەدى. بيىلعى جەتى ايدىڭ قورىتىندىسى بويىنشا 9,7 ميلليون شارشى مەتر تۇرعىن ءۇي نەمەسە 92,3 مىڭ تۇرعىن ءۇي پايدالانۋعا بەرىلدى.
- بيىلعى جوسپار - 20,4 ميلليون شارشى مەتر تۇرعىن ءۇي نەمەسە شامامەن 188 مىڭ تۇرعىن ءۇي. وسىلايشا، بۇگىنگى تاڭدا جىلدىق جوسپاردىڭ 47,5 پايىزى ورىندالدى، - دەلىنگەن مينيسترلىك تاراتقان اقپاراتتا.
جاڭا تۇرعىن ءۇي سالۋمەن قاتار، ازاماتتارعا مەملەكەتتىك قولداۋ كورسەتۋ شارالارى دا جۇزەگە اسىرىلىپ جاتىر.
- بيىل 155,5 ميلليارد تەڭگەگە 12 مىڭ كرەديتتىك تۇرعىن ءۇي پاتەرىن سالۋ جانە ساتىپ الۋ كوزدەلگەن. سونىمەن قاتار 269 ميلليارد تەڭگەگە 13,5 مىڭ جالعا بەرىلەتىن تۇرعىن ءۇي پاتەرىن ساتىپ الۋ جوسپارلانعان، - دەلىنگەن حابارلامادا.
جەڭىلدەتىلگەن تۇرعىن ءۇي باعدارلامالارىن ىسكە اسىرۋ جالعاسىپ كەلەدى.
- جىل باسىنان بەرى ازاماتتارعا 2-5 پايىز مولشەرلەمەمەن جالپى سوماسى 72,7 ميلليارد تەڭگەگە 5,1 مىڭ نەسيە بەرىلدى. سونداي-اق «ناۋرىز» باعدارلاماسى اياسىندا جالپى سوماسى 339,2 ميلليارد تەڭگەگە 11,5 مىڭ قارىز بەرىلدى، - دەپ تۇيىندەدى مينيسترلىك.
وسىعان دەيىن ەلىمىزدە قۇرىلىس جۇمىستارى 15,3 پايىزعا وسكەنىن جازعانبىز.
