قازاقستاندا شەتەلدىك ديپلومداردى تانۋ ءراسىمى جەتىلدىرىلەدى

ق ر عىلىم جانە جوعارى ءبىلىم مينيسترلىگىنىڭ جوعارى ءبىلىم بەرۋدى دامىتۋ ۇلتتىق ورتالىعى مەن ءبىلىم، عىلىم جانە مادەنيەت ماسەلەلەرى جونىندەگى بىرىككەن ۇلتتار ۇيىمى (يۋنەسكو) ازيا-تىنىق مۇحيتى وڭىرىندە جوعارى بىلىمگە قاتىستى بىلىكتىلىكتەردى تانۋ تۋرالى توكيو كونۆەنسياسىن ىسكە اسىرۋعا قولداۋ كورسەتۋگە باعىتتالعان ىنتىماقتاستىق تۋرالى كەلىسىم جاساستى.

ۆەدومستۆونىڭ مالىمەتىنشە، ىنتىماقتاستىقتىڭ ماقساتى - ءبىلىم بەرۋ بىلىكتىلىكتەرىن تانۋدىڭ ۇلتتىق جۇيەسىن ودان ءارى جەتىلدىرۋ، حالىقارالىق ءوزارا ءىس-قيمىلدى دامىتۋ جانە وسى باعىتتاعى مەملەكەتتىك قىزمەتتەردىڭ قولجەتىمدىلىگىن ارتتىرۋ.

جوبا اياسىندا بىلىكتىلىكتەردى تانۋ تاسىلدەرى مەن راسىمدەرىن جەتىلدىرۋ جونىندە ۇسىنىمدار ازىرلەۋ، حالىقارالىق تاجىريبەنى تالداۋ جانە توكيو كونۆەنتسياسىن قازاقستاندا ىسكە اسىرۋ جونىندەگى جول كارتاسىن دايىنداۋ جوسپارلانىپ وتىر. سونىمەن قاتار بىلىكتىلىكتەردى تانۋدىڭ ۇلتتىق جۇيەسىن ودان ءارى دامىتۋ بويىنشا ۇسىنىستار ازىرلەۋ ماقساتىندا مۇددەلى مەملەكەتتىك ورگاندارمەن جانە بەيىندى ۇيىمدارمەن كونسۋلتاتسيالار وتكىزۋ كوزدەلگەن.

نورماتيۆتىك-قۇقىقتىق جانە ۇيىمداستىرۋشىلىق تەتىكتەردى جەتىلدىرۋگە، بىلىكتىلىكتەردى تانۋ راسىمدەرىنىڭ اشىقتىعىن ارتتىرۋعا، سونداي-اق قازاقستاننىڭ ۇلتتىق اقپاراتتىق ورتالىعىنىڭ الەۋەتىن نىعايتۋعا جانە حالىقارالىق تاجىريبە الماسۋدى دامىتۋعا ەرەكشە نازار اۋدارىلادى.

ىنتىماقتاستىقتىڭ ماڭىزدى باعىتتارىنىڭ ءبىرى - شەتەلدىك ءبىلىم تۋرالى قۇجاتتاردى تانۋ بويىنشا سيفرلىق قىزمەتتەردى ىلگەرىلەتۋ. شەتەل ازاماتتارىنىڭ قولجەتىمدى ەلەكتروندىق سەرۆيستەر تۋرالى حاباردارلىعىن ارتتىرۋ جانە ولاردى پايدالانۋ مۇمكىندىكتەرىن كەڭەيتۋ ماقساتىندا اعىلشىن تىلىندە اقپاراتتىق ماتەريالدار ازىرلەۋ جوسپارلانىپ وتىر.

جوعارى ءبىلىم بەرۋدى دامىتۋ ۇلتتىق ورتالىعى توكيو كونۆەنسياسى اياسىندا قازاقستاننىڭ ۇلتتىق اقپاراتتىق ورتالىعىنىڭ فۋنكسيالارىن اتقارادى جانە ونى ىسكە اسىرۋ جونىندەگى ءىس-شارالاردى ۇيلەستىرۋگە قاتىسادى. بۇل جۇمىس حالىقارالىق ىنتىماقتاستىقتى دامىتۋعا، اكادەميالىق ۇتقىرلىقتى قولداۋعا جانە بىلىكتىلىكتەردى تانۋدىڭ اشىق ءارى تۇسىنىكتى راسىمدەرىن قالىپتاستىرۋعا ىقپال ەتەدى.

- جوبانى 2026-جىلعى قازاننان 2027-جىلعى جەلتوقسانعا دەيىن ىسكە اسىرۋ جوسپارلانعان. يۋنەسكومەن ىنتىماقتاستىق بىلىكتىلىكتەردى تانۋدىڭ ۇلتتىق جۇيەسىن ودان ءارى جەتىلدىرۋگە جانە قازاقستاننىڭ حالىقارالىق ءبىلىم بەرۋ كەڭىستىگىنە كىرىگۋىن نىعايتۋعا ۇلەس قوسادى دەپ كۇتىلەدى، - دەلىنگەن حابارلامادا.

يۋنەسكومەن سەرىكتەستىك قازاقستاننىڭ اشىق، زاماناۋي جانە حالىقارالىق ءبىلىم بەرۋ كەڭىستىگىمەن ىقپالداسقان جوعارى ءبىلىم بەرۋ جۇيەسىن دامىتۋ جولىنداعى ماڭىزدى قادام بولىپ سانالادى.

وسىعان دەيىن 22 جىلدىق ۇزىلىستەن كەيىن قازاقستاننىڭ كيەلى نىساندارى يۋنەسكو تىزىمىنە ەنگەنىن جازدىق.