قازاقستاندا شاعىن بيزنەستەن تۇسەتىن سالىق 27,1 پايىزعا ۇلعايدى

بۇل دەرەك پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعاريننىڭ دەپۋتاتتىق ساۋالعا بەرگەن جاۋابىندا كەلتىرىلگەن.

قۇجاتقا سايكەس، 2026-جىلعى 1-قازانداعى جاعداي بويىنشا قازاقستاننىڭ شوعىرلاندىرىلعان بيۋجەتىنە تۇسكەن سالىق تۇسىمدەرى 22,69 تريلليون تەڭگە. بىلتىرعى توعىز ايمەن سالىستىرعاندا بۇل كورسەتكىش 3,55 تريلليون تەڭگەگە، ياعني 18,5 پايىزعا وسكەن.

ونىڭ ىشىندە شاعىن جانە ورتا كاسىپكەرلىك سۋبەكتىلەرىنەن تۇسكەن سالىق كولەمى 7,58 تريلليون تەڭگەگە جەتتى. 2025-جىلدىڭ وسى كەزەڭىندە بۇل سوما 6,45 تريلليون تەڭگە بولعان.

- شاعىن جانە ورتا كاسىپكەرلىك سۋبەكتىلەرىنەن تۇسەتىن ءتۇسىم 1 تريلليون 128,2 ميلليارد تەڭگەگە نەمەسە 17,5 پايىزعا ءوستى، - دەلىنگەن سەرىك جۇمانعاريننىڭ جاۋابىندا.

شاعىن كاسىپكەرلىك بويىنشا ءوسىم اناعۇرلىم جوعارى. وسى ساناتتاعى سۋبەكتىلەردەن تۇسكەن سالىق 2,77 تريلليون تەڭگەدەن 3,52 تريلليون تەڭگەگە دەيىن كوبەيگەن. ايىرماسى - 750,7 ميلليارد تەڭگە.

ورتا كاسىپكەرلىك سۋبەكتىلەرىنىڭ بيۋدجەتكە تولەگەن سالىعى دا ارتتى. توعىز ايدا بۇل كورسەتكىش 2,89 تريلليون تەڭگە بولدى. بىلتىرعى سايكەس كەزەڭدە 2,63 تريلليون تەڭگە تۇسكەن ەدى، ياعني ءوسىم 252,6 ميلليارد تەڭگەنى نەمەسە 9,6 پايىزدى قۇرادى.

ءال ىرى كاسىپكەرلىك سۋبەكتىلەرىنەن تۇسكەن سالىق تۇسىمدەرى 12,69 تريلليون تەڭگەدەن 15,11 تريلليون تەڭگەگە دەيىن ۇلعايعان. بۇل - 2,42 تريلليون تەڭگە نەمەسە 19,1 پايىز ءوسىم.

دەپۋتاتتىق ساۋالدا سالىق رەفورماسىنىڭ شاعىن جانە ورتا بيزنەسكە ىقپالى كوتەرىلگەن. وعان جاۋاپ بەرگەن سەرىك جۇمانعارين رەفورمانىڭ ناتيجەسىن تەك تىركەلگەن كاسىپكەرلەردىڭ سانىنا قاراپ باعالاۋ جەتكىلىكسىز ەكەنىن اتاپ وتكەن. ونىڭ ايتۋىنشا، كاسىپكەرلىك كىرىسى، جۇمىسپەن قامتۋ دەڭگەيى جانە بيۋدجەتكە تۇسەتىن سالىق كولەمى دە ەسكەرىلۋگە ءتيىس.

سالىق رەفورماسىنىڭ سالدارىن تولىق باعالاۋ 2026-جىلدىڭ قورىتىندىسى بويىنشا جۇرگىزىلەدى.

ايتا كەتەيىك، بۇعان دەيىن سالىق بەرەشەگىنە بايلانىستى شەكتەۋلەر جايلى جازعان ەدىك.