قازاقستاندا شۋ شىعاراتىن كولىكتەردى انىقتايتىن كامەرالار پايدا بولۋى مۇمكىن

مينيسترلىك سيفرلىق شەشىمدەردى قولدانۋ ماسەلەسى بويىنشا شۋدىڭ شەكتى دەڭگەيدەن اسىپ كەتۋىن اۆتوماتتى تۇردە انىقتاۋ ءۇشىن فوتو-جانە بەينەتىركەۋ جۇيەسىنە يننوۆاتسيالىق اكۋستيكالىق كامەرالار مەن شۋ دەڭگەيىن ولشەيتىن قۇرالداردى بىرىكتىرۋ بويىنشا پيلوتتىق جوبانى ىسكە قوسۋدى قولدايدى. قازىرگى ۋاقىتتا ا ق ش، گەرمانيا جانە فرانسيانىڭ وزىق شەتەلدىك تاجىريبەسى زەردەلەنىپ جاتىر، - دەدى مينيستر.

ەرجان سادەنوۆتىڭ دەرەگىنە سايكەس، جىل باسىنان بەرى تۇنگى ۋاقىتتا تىنىشتىقتى بۇزۋدىڭ 22,2 مىڭ، تىكەلەي اعىندى جانە قاتتى شۋ شىعاراتىن جۇيەلەرى بار زاڭسىز قايتا جابدىقتالعان كولىكتەردى باسقارۋدىڭ 24 مىڭ فاكتىسى انىقتالعان. بۇدان بولەك، مانيەۆر جاساۋ قاعيدالارىن بۇزۋدىڭ 57,9 مىڭ، قارسى باعىتتاعى قوزعالىس جولاعىنا شىعۋدىڭ 4,6 مىڭ جانە اپاتتى جاعداي تۋعىزۋدىڭ 11,8 مىڭ فاكتىسىنىڭ جولى كەسىلگەن. سونداي-اق 404 دريفت فاكتىسى تىركەلىپ، 61 جۇرگىزۋشى اكىمشىلىك قاماۋعا الىنعان، 343 جۇرگىزۋشىگە ايىپپۇل سالىنعان.

ال 23-قىركۇيەكتەن باستاپ رەسپۋبليكا اۋماعىندا «تۇنگى قالا» جەدەل-پروفيلاكتيكالىق ءىس-شاراسى وتكىزىلىپ جاتىر. 12-قازانداعى جاعداي بويىنشا ونىڭ اياسىندا 47,1 مىڭ قۇقىق بۇزۋشىلىقتىڭ جولى كەسىلگەن. اتاپ ايتقاندا، تۇنگى تىنىشتىقتى بۇزۋدىڭ 2,8 مىڭ، زاڭسىز قايتا جابدىقتالعان كولىكتەردى باسقارۋدىڭ 2,6 مىڭ، مانيەۆر جاساۋ قاعيدالارىن بۇزۋدىڭ 7,9 مىڭ، قارسى باعىتتاعى قوزعالىس جولاعىنا شىعۋدىڭ 590 جانە اپاتتى جاعداي تۋعىزۋدىڭ 2 مىڭ فاكتىسى انىقتالعان. سونىمەن قاتار 30 دريفت فاكتىسى تىركەلىپ، التى جۇرگىزۋشى اكىمشىلىك قاماۋعا الىنعان، 24 جۇرگىزۋشىگە ايىپپۇل ارقالاعان.

مينيستر مۇددەلى مەملەكەتتىك ورگاندارمەن بىرلەسىپ، اكىمشىلىك زاڭنامانى جەتىلدىرۋ بويىنشا جوسپارلى جۇمىستار جۇرگىزىلىپ جاتقانىن ايتادى.

- اكىمشىلىك قۇقىق بۇزۋشىلىق تۋرالى كودەكس نورمالارىن جاڭارتۋ اياسىندا تۇنگى تىنىشتىقتى بۇزعانى ءۇشىن جاۋاپكەرشىلىكتىڭ مولشەرلەس بولۋىن قامتاماسىز ەتۋ تەتىكتەرى، تەحنيكالىق وزگەرىستەرى بار اۆتوكولىكتەردى جويىلعانعا دەيىن ارنايى تۇراقتاردا ۇستاۋ ءتارتىبى، سونداي-اق جولدارداعى قۇقىق بۇزۋشىلىقتاردى سارالاۋ تاسىلدەرى ەگجەي-تەگجەيلى پىسىقتالىپ جاتىر، - دەدى ەرجان سادەنوۆ.

بۇعان دەيىن دەپۋتات كەندەباي ادامبەك ىشكى ىستەر مينيسترىنە ساۋال جولداپ، كولىك شۋىن اۆتوماتتى انىقتايتىن جۇيە ەنگىزۋدى ۇسىندى.