قازاقستاندا اۆتوكرەديت الۋ جەڭىلدەيدى: ۇلتتىق بانك ماڭىزدى شەشىم قابىلدادى

بۇل ەرەكشەلىك 2027-جىلعى 31-جەلتوقسانعا دەيىن قولدانىلادى. جەڭىلدىك اۆتوكولىكتى نەسيەگە العىسى كەلەتىن ازاماتتاردىڭ ءۇش ساناتىنا قاتىستى.

اۆتوكرەديت الۋشىلارعا قانداي جەڭىلدىك جاسالدى؟

قازاقستان ۇلتتىق بانكى اۆتوكرەديت بەرۋ كەزىندە قارىز جۇكتەمەسىنىڭ كوەففيتسيەنتىنە قويىلاتىن مىندەتتى تالاپتاردان ەرەكشەلىكتەردىڭ قولدانىلۋ مەرزىمىن ۇزارتۋ تۋرالى شەشىم قابىلدادى.

رەتتەۋشى تۇسىندىرگەندەي، بۇل جەڭىلدىك بارلىق اۆتوكرەديتكە بىردەي قولدانىلمايدى. ونىڭ باستى شارتى - ساتىپ الىناتىن كولىك قۇرالى نەسيە بويىنشا كەپىلگە قويىلۋى كەرەك.

قارىز جۇكتەمەسىنىڭ كوەففيتسيەنتى (ق ج ك) - قارىز الۋشىنىڭ اي سايىنعى تابىسىنىڭ قانشا بولىگى نەسيەلەردى وتەۋگە جۇمسالاتىنىن كورسەتەتىن كورسەتكىش. بانكتەر بۇل كوەففيتسيەنت ارقىلى ازاماتتىڭ جاڭا نەسيەنى تولەۋ مۇمكىندىگىن باعالايدى.

كىمدەر اۆتوكرەديتتى جەڭىلدىكپەن راسىمدەي الادى؟

ۇلتتىق بانكتىڭ شەشىمى بويىنشا، ق ج ك تالابىنان ەرەكشەلىك ءۇش ساناتتاعى اۆتوكرەديتكە قاتىستى.

1. جاڭا اۆتوكولىك ساتىپ الۋشىلار: جەڭىلدىك بۇرىن پايدالانىلماعان جانە قازاقستاندا العاش رەت تىركەلەتىن جاڭا اۆتوموبيلدى نەسيەگە الاتىن ازاماتتارعا قولدانىلادى.

2. باستاپقى جارناسى 50 پايىزدان كەم ەمەس ازاماتتار: قولدانىستا بولعان اۆتوكولىكتى ساتىپ العاندا ونىڭ قۇنىنىڭ كەمىندە 50 پايىزىن باستاپقى جارنا رەتىندە تولەگەن جاعدايدا دا جەڭىلدىك قاراستىرىلعان.

3. ءۇش جىلدان اسپايتىن اۆتوكولىك ساتىپ الۋشىلار: پايدالانىلعانىنا ءۇش جىلدان اسپاعان اۆتوموبيلدى ساتىپ الۋ كەزىندە باستاپقى جارنا كولىك قۇنىنىڭ كەمىندە 30 پايىزىن قۇراۋى قاجەت.

وسى تالاپتارعا سايكەس كەلەتىن اۆتوكرەديتتەر بويىنشا بانكتەر ق ج ك- نى مىندەتتى ساقتاۋ تالابىنان بوساتىلادى. دەگەنمەن بۇل نەسيە اۆتوماتتى تۇردە ماقۇلدانادى دەگەندى بىلدىرمەيدى. بانك قارىز الۋشىنىڭ تولەم قابىلەتىن وزگە تالاپتار بويىنشا دا باعالاي الادى.

جەڭىلدىك نە ءۇشىن ۇزارتىلدى؟

ۇلتتىق بانك بۇل شەشىمدى اۆتوكرەديت نارىعىنداعى قازىرگى جاعدايعا جۇرگىزىلگەن تالداۋ ناتيجەسىندە قابىلداعان.

رەتتەۋشى 2027-جىل بويى نەسيە نارىعىنداعى جاعدايدى باقىلاۋدى جالعاستىرادى. ەگەر جەكەلەگەن سەگمەنتتەردە جۇيەلى تاۋەكەلدەر كۇشەيسە، حالىقتىڭ قارىز جۇكتەمەسىن ەسكەرە وتىرىپ، قوسىمشا شەكتەۋ شارالارىن ەنگىزۋ قۇقىعىن وزىندە قالدىرادى.

اۆتوكرەديت نارىعىنداعى تاۋەكەلدەر دە نازاردا

بۇعان دەيىن ۇلتتىق بانك قازاقستاندا اۆتوكرەديتتەۋ كولەمىنىڭ جىلدام وسۋىنە جانە نەسيە پورتفەلىنىڭ ساپاسى ناشارلاۋىنا قاتىستى تاۋەكەلدەر بار ەكەنىن حابارلاعان بولاتىن.

قارجىلىق تۇراقتىلىق تۋرالى ەسەپتە نەسيە مەرزىمدەرىنىڭ ۇزارۋى مەن قىمبات اۆتوموبيلدەرگە سۇرانىستىڭ ارتۋى نەگىزگى فاكتورلاردىڭ ءبىرى رەتىندە كورسەتىلگەن.

وسىلايشا، ۇلتتىق بانكتىڭ جاڭا شەشىمى اۆتوكولىك ساتىپ الۋدى جوسپارلاپ جۇرگەن ازاماتتارعا نەسيە راسىمدەۋ مۇمكىندىگىن ساقتاۋعا باعىتتالعان. الايدا جەڭىلدىك بارلىق ساتىپ الۋشىعا بىردەي بەرىلمەيدى: اۆتوكولىكتىڭ جاعدايى، پايدالانۋ مەرزىمى جانە باستاپقى جارنا كولەمى ماڭىزدى ءرول اتقارادى.