قازاقستاندا پاتەر راسىمدەۋ قانشا تۇرادى جانە قالاي ۇنەمدەۋگە بولادى

اسىرەسە يپوتەكامەن ءۇي الاتىندار، اۋىلدىق جەردەگى مامىلەلەر جانە قۇنى تومەن نىساندار بويىنشا شىعىن ازايدى. ءبىراق مامىلەنى راسىمدەۋ تەك تاريفپەن شەكتەلمەيدى، قۇجاتتار، تىركەۋ جانە سالىق تالاپتارىن دا ەسكەرۋ ماڭىزدى.

ءۇي ساتىپ الۋ ءۇشىن قانداي قۇجاتتار قاجەت؟

پاتەر، ءۇي نەمەسە جەر تەلىمىن راسىمدەۋ نوتاريۋس ارقىلى دا، ح ق ك و ارقىلى دا جۇرگىزىلەدى. ەكى جاعدايدا دا قۇجاتتار ءتىزىمى بىردەي.

ساتۋشى تاراپىنان:

- جەكە كۋالىك نەمەسە ءتولقۇجات؛

- مۇلىككە قۇقىق بەلگىلەيتىن قۇجات (ساتىپ الۋ-ساتۋ، سىيعا تارتۋ، مۇراگەرلىك جانە ت. ب.)؛

- تەحنيكالىق نەمەسە كاداسترلىق پاسپورت؛

- اۋىرتپالىقتاردىڭ بار-جوعى تۋرالى انىقتاما (2-نىسان، eGov ارقىلى الىنادى)؛

- ەگەر مۇلىك نەكەدە الىنعان بولسا، جۇبايىنىڭ كەلىسىمى؛

- كەي جاعدايدا سالىق بەرەشەگى جوقتىعى تۋرالى انىقتاما.

ساتىپ الۋشىدان:

- جەكە كۋالىك؛

- نەكەدە بولسا، جۇبايىنىڭ كەلىسىمى.

مامىلە بارىسىندا:

- ساتىپ الۋ-ساتۋ شارتى جاسالادى؛

- قابىلداپ الۋ-تاپسىرۋ اكتىسى راسىمدەلەدى.

بازالىق تاريفتەر: كىم قانشا تولەيدى؟

نوتاريۋس قىزمەتىنىڭ قۇنى مامىلەگە قاتىسۋشىلاردىڭ مارتەبەسىنە بايلانىستى ەسەپتەلەدى.

ەگەر ساتۋشى مەن ساتىپ الۋشى ءبىر-بىرىنە تۋىس ەمەس جەكە تۇلعالار بولسا، قىزمەت قۇنى 12 ا ە ك، ياعني 51900 تەڭگەنى قۇرايدى. ال جاقىن تۋىستار (اتا-انا، بالا، ەرلى-زايىپتىلار، نەمەرە، تۋعان باۋىرلار) اراسىندا كەلىسىم جاسالسا، تاريف 7 ا ە ك نەمەسە 30275 تەڭگە بولادى.

مامىلەگە زاڭدى تۇلعا قاتىسقان جاعدايدا تولەم كولەمى 17 ا ە ك- كە دەيىن ءوسىپ، 73525 تەڭگەگە جەتەدى. سونىمەن قاتار، جۇبايىنىڭ نوتاريالدى كەلىسىمى ءۇشىن قوسىمشا 1,5 ا ە ك (6487 تەڭگە) تولەنەدى.

يپوتەكامەن ءۇي الۋ: تاريفتەر قالاي وزگەردى؟

2026-جىلدىڭ اقپان ايىنان باستاپ يپوتەكالىق مامىلەلەر ءۇشىن نوتاريۋستىق قىزمەت ارزاندادى.

ەندى يپوتەكا ارقىلى جاسالاتىن ساتىپ الۋ-ساتۋ شارتى 4 ا ە ك (17300 تەڭگە) تۇرادى. يپوتەكالىق تۇرعىن ءۇي قارىزى، جىلجىمايتىن مۇلىكتى كەپىلگە قويۋ كەلىسىمى دە ءدال وسىنداي باعامەن راسىمدەلەدى.

ال كەپىلگەرلىك نەمەسە كەپىلدىك شارتى ءۇشىن 1,5 ا ە ك (6487 تەڭگە) بەلگىلەنگەن. نوتاريۋستار بۇل تاريفتەردەن جوعارى باعا قويا المايدى.

اۋىلداعى جىلجىمايتىن مۇلىك

اۋىلدىق جەرلەردەگى مامىلەلەر ءۇشىن ارنايى تومەندەتىلگەن تاريفتەر قاراستىرىلعان.

جاقىن تۋىستار اراسىندا جاسالعان كەلىسىم ءۇشىن 1,5 ا ە ك (6487 تەڭگە) عانا تولەنەدى. باسقا جاعدايلاردا بۇل سوما 2,7 ا ە ك (11678 تەڭگە)، ال زاڭدى تۇلعا قاتىسسا - 3 ا ە ك (12975 تەڭگە) بولادى.

بۇل جەڭىلدىكتەر نوتاريۋستىڭ قاي جەردە وتىرعانىنا قاراماستان قولدانىلادى.

ارزان نىساندار ءۇشىن بولەك تاريف

قۇنى تومەن نىساندار (جەر تەلىمى، قويما، اۆتوتۇراق) ءۇشىن دە ارنايى جەڭىلدىك بار.

ەگەر مۇلىك باعاسى 30 ا ە ك- تەن (2026-جىلى 129750 تەڭگە) اسپاسا، جاقىن تۋىستار ءۇشىن تاريف 3 ا ە ك (12975 تەڭگە)، ال باسقا تۇلعالار ءۇشىن 8 ا ە ك (34600 تەڭگە) بولىپ بەلگىلەنگەن.

مەملەكەتتىك تىركەۋ: مامىلەنىڭ سوڭعى كەزەڭى

نوتاريالدى راسىمدەۋ مامىلەنىڭ اياقتالعانىن بىلدىرمەيدى. مەنشىك قۇقىعى تەك مەملەكەتتىك تىركەۋدەن كەيىن عانا كۇشىنە ەنەدى.

قۇجاتتاردى تىركەۋگە نوتاريۋس ءوزى جىبەرەدى. ساتىپ الۋشى مەملەكەتتىك باج سالىعىن تولەيدى:

- ستاندارتتى تىركەۋ - 1304 تەڭگە؛

- جەدەل تىركەۋ - شامامەن 2 ساعات ىشىندە 5000 تەڭگە.

مامىلە تولىق اياقتالدى دەپ مەنشىك قۇقىعى eGov-تا تىركەلگەنى تۋرالى حابارلاما شىققاننان كەيىن عانا ەسەپتەلەدى.