قازاقستاندا الەمدىك دەڭگەيدەگى مانساپقا قالاي جەتۋگە بولادى

بۇل تۋرالى «تەڭىزشيەۆرويل» كومپانياسىنىڭ تەڭىز كەن ورنىنداعى ەكىنشى بۋىن زاۋىتتارىن پايدالانۋ جانە شيكى گازدى ايداۋ توبىنىڭ كەڭەسشىسى ارايلىم ءاليحانوۆا ءمالىم ەتتى.

اگەنتتىگىمىزگە بەرگەن سۇحباتىندا ول مەحانيكالىق جابدىقتاردى جوبالاۋ ينجەنەرىنەن باستاپ وپەراتسيالىق كەڭەسشىگە دەيىنگى كاسىبي جولى تۋرالى اڭگىمەلەدى.

- قازاقستان جاس ماماندارعا مانساپتىق وسۋىنە، ۇلكەن جاۋاپكەرشىلىك الۋىنا جانە حالىقارالىق دەڭگەيدەگى جوبالارمەن جۇمىس ىستەۋ ءۇشىن جەتكىلىكتى مۇمكىندىكتەر ۇسىنىپ جاتىر ما؟

- ءوز تاجىريبەمە سۇيەنە وتىرىپ، قازاقستان جاس مامانداردىڭ وسۋىنە، ۇلكەن جاۋاپكەرشىلىك جۇكتەلەتىن مىندەتتەردى اتقارۋعا جانە حالىقارالىق دەڭگەيدەگى جوبالارعا قاتىسۋعا مۇمكىندىك بەرەدى دەپ سەنىممەن ايتا الامىن. مەنىڭ جەكە مانسابىم - سونىڭ ايقىن دالەلى. ءوز مانسابىمدى مەحانيكالىق جابدىقتاردى جوبالاۋ ينجەنەرى رەتىندە باستاپ، نەگىزىنەن تەحنيكالىق جوبالاۋ مەن ينجەنەرلىك شەشىمدەرگە دەن قويدىم. ۋاقىت وتە كەلە ماعان الدەقايدا اۋقىمدى سالالاردا جۇمىس ىستەۋگە مۇمكىندىك بەرىلدى. تەحنيكالىق قىزمەت كورسەتۋدە تاجىريبە جيناقتادىم جانە بيزنەس تيىمدىلىگى سالاسىندا جۇمىس ىستەدىم. وندا وپەراتسيالىق شەشىمدەر مەن بيزنەس ناتيجەلەرى اراسىنداعى ءوزارا بايلانىستى ءتۇسىندىم. كۇردەلى پروتسەستەردى ۇيلەستىرۋ باعىتىن مەڭگەردىم.

قازىرگى ۋاقىتتا وپەراتسيالار بويىنشا كەڭەسشى بولىپ جۇمىس ىستەپ كەلەمىن. بۇل رەتتە وپەراتسيالارعا، سەنىمدىلىككە، تەحنولوگيادىق پروتسەستەردىڭ قاۋىپسىزدىگىنە جانە بيزنەس جوسپارلاۋعا قاتىستى ستراتەگيالىق باستامالارعا قولداۋ كورسەتەمىن.

بولاشاق كوشباسشىلاردى دايارلاۋعا شىنايى ءمان بەرەتىن كومپانيادا جۇمىس ىستەۋ - ۇلكەن جەتىستىك. مانساپ جولىمدا كوشباسشىلىق الەۋەتى بار قىزمەتكەر رەتىندە تانىلدىم جانە ءاربىر جاڭا تاعايىنداۋ ماعان ءتۇرلى قۇزىرەتتەردى جەتىلدىرۋگە كومەكتەستى.

بۇل پروتسەستىڭ سانالى تۇردە جۇرگىزىلۋى وتە ماڭىزدى. كومپانيا ماعان جاڭا لاۋازىمدار ۇسىنىپ قانا قويماي، جاڭا تاجىريبەنى مەڭگەرۋگە جاعداي جاسادى. ءاربىر لاۋازىم بيزنەسكە جاڭا قىرىنان قاراۋعا جول اشتى. بۇل تۇرعىدا اكتيۆتەردىڭ قالاي جوبالاناتىنىن، تەحنيكالىق قىزمەت كورسەتۋ مەن پايدالانۋ قالاي ىسكە اساتىنىن، كۇردەلى جوندەۋلەردىڭ قالاي جۇرگىزىلەتىنىن، تيىمدىلىك قالاي باعالاناتىنىن جانە ستراتەگيالىق شەشىمدەردىڭ قالاي قابىلداناتىنىن ءتۇسىندىم. تاجىريبە جيناقتاۋدىڭ بۇل ۇيلەسىمدى جولى مەن ءۇشىن وتە ماڭىزدى. مۇنداي قۇزىرەتتەردى تەك وقۋلىقتان ۇيرەنۋ مۇمكىن ەمەس.

سوندىقتان قازاقستاندا ىزدەنىممپاز ماماندار ءۇشىن ەرەكشە مۇمكىندىكتەر جاسالعانىنا كامىل سەنىمىن. TCO ،NCOC جانە KPO سياقتى كومپانيالار جاھاندىق ماڭىزى بار اكتيۆتەردى باسقارادى جانە جەرگىلىكتى مامانداردىڭ الەۋەتىن ارتتىرۋعا، ولارعا باسشىلىق قىزمەتتەردى اتقارۋعا مۇمكىندىك بەرۋگە باسا نازار اۋدارادى.

قازاقستانداعى جاس ماماندار ميللياردتاعان دوللارلىق جوبالارعا قاتىسۋعا، حالىقارالىق ساراپشىلارمەن بىرلەسە جۇمىس ىستەۋگە جانە الەمدىك جوعارى ستاندارتتارعا ساي كەلەتىن مانساپ قۇرۋعا مۇمكىندىك الادى. سوندىقتان قازاقستاندى جاي عانا جۇمىس ورنىم ەمەس، الەمدىك دەڭگەيدەگى مانسابىمدى قالىپتاستىرعان مەكەن دەپ جيى ايتامىن.

بۇگىندە قازاقستاننىڭ ەڭ ۇلكەن ارتىقشىلىعىنا توقتالساق، بۇل سالانىڭ دامۋى جالعاسىپ كەلەدى. مۇندا تەك قولدا بار اكتيۆتەردى پايدالانۋ عانا ەمەس، سونىمەن قاتار جاڭعىرتۋ، سيفرلاندىرۋ، سەنىمدىلىكتى ارتتىرۋ، دەكاربونيزاتسيا جانە جاڭا بۋىن ماماندارىن دايارلاۋ ارقىلى سالانىڭ بولاشاعىن قالىپتاستىرۋ مۇمكىندىكتەرى دە بار. جاس ماماندار سالانىڭ دامۋىنا ەلەۋلى ۇلەس قوسا الادى.

- شەتەلدە مانساپ قۇرۋدى ويلاستىرىپ جۇرگەن جاستارعا نە ايتار ەدىڭىز؟ ولاردى ەلدە قانداي مۇمكىندىكتەر كۇتىپ تۇر؟ قازاقستاننان كەتپەي-اق، حالىقارالىق دەڭگەيدەگى مانساپقا قول جەتكىزۋگە بولا ما؟

- قازاقستان كوپتەگەن جاس مامان ءتيىستى دەڭگەيدە باعالاي الماي جۇرگەن مۇمكىندىكتى ۇسىناتىنىن ايتار ەدىم. ول - قارقىندى وزگەرىستەرگە تولى ەلمەن جانە سالامەن بىرگە دامۋ مۇمكىندىگى.

تابىستى مانساپ تۋرالى ءسوز ەتكەندە، كوبىنەسە كاسىبي دامۋ جولىنا ەمەس، گەوگرافيالىق ورنالاسۋعا باسا نازار اۋدارامىز. مەنىڭ بايقاۋىمشا، ەڭ قىزىقتى مۇمكىندىكتەر كوبىنەسە وزگەرىستەر ورىن الىپ جاتقان، سالالار جاڭعىرتىلىپ، جاڭا بۋىن كوشباسشىلارىنا بولاشاقتى قالىپتاستىرۋعا مۇمكىندىك تۋاتىن جەرلەردە پايدا بولادى. بۇگىندە قازاقستان - ءدال سونداي مەملەكەت.

قازاقستاندا جۇمىس ىستەپ جاتقان حالىقارالىق كومپانيالار جاھاندىق ستاندارتتاردى جەرگىلىكتى دەڭگەيدە قولدانىپ كەلەدى. سونىمەن قاتار ولار جەرگىلىكتى ماماندارعا كۇردەلى باستامالاردى باسقارۋدى، ستراتەگيالىق مىندەتتەردى شەشۋدى جانە بيزنەستىڭ دامۋىن قالىپتاستىرۋدى سەنىپ تاپسىرۋدا. بۇل جاس ماماندارعا الەمنىڭ كەز كەلگەن جەرىندە سۇرانىسقا يە قۇزىرەتتەردى دامىتۋعا جانە تاجىريبە جيناۋعا مۇمكىندىك بەرەدى.

جاس قازاقستاندىقتارعا جاھاندىق دەڭگەيدە ويلانۋعا جانە ءوز مۇمكىندىكتەرىن گەوگرافيالىق شەكارالارمەن شەكتەمەۋگە كەڭەس بەرەر ەدىم. الەمنىڭ ۇزدىك تاجىريبەسىن ۇيرەنىڭىزدەر. ءبىلىم الىپ، حالىقارالىق جوبالارعا قاتىسىپ، ءارتۇرلى تاسىلدەردى مەڭگەرۋ ارقىلى تاجىريبە جيناقتاڭىزدار. ءارتۇرلى مادەنيەت وكىلدەرىمەن بايلانىس ورناتىڭىزدار. سونىمەن قاتار، ەلىمىزدە قولجەتىمدى ارتىقشىلىقتاردى دا باعالاي بىلىڭىزدەر.

ءبىز قازاقستاندا جۇزەگە اسىرىلىپ جاتقان الەمدىك دەڭگەيدەگى جوبالارعا، وزىق تەحنولوگيالارعا، حالىقارالىق كوماندالار مەن تاجىريبەگە قول جەتكىزە الامىز. ءوز ەلىمىزدەن شىقپاي-اق حالىقارالىق تاجىريبە جيناقتاي الامىز.

قازاقستاننىڭ باستى باسەكەلەستىك ارتىقشىلىعى - ونىڭ حالقى. جىل سايىن وزىنە سەنىمدى، بىلىكتى، سيفرلىق تەحنولوگيالاردى جەتىك مەڭگەرگەن جانە ەل دامۋىنا ۇلەس قوسۋعا ۇمتىلعان جاس مامانداردىڭ كوبەيىپ كەلە جاتقانىن كورەمىن. ولار جەرگىلىكتى ەرەكشەلىكتەردى تەرەڭ تۇسىنە وتىرىپ، جاڭاشىل يدەيالار مەن جاھاندىق كوزقاراستى الىپ كەلەدى. مۇنداي ۇيلەسىم زور الەۋەتكە يە.

ەڭ قۇندى تۇسى - ءسىزدىڭ كاسىبي تابىسىڭىزدىڭ تەك وزىڭىزگە عانا ەمەس، باسقالارعا دا پايداسىن تيگىزەتىندىگىندە شىعار. دارىندى ماماندار ءوزىن جەتىلدىرىپ، تاجىريبەسىن وسىندا قولدانعان كەزدە، ولار ۇيىمداردى نىعايتۋعا، بولاشاق كوشباسشىلاردى قالىپتاستىرۋعا جانە قازاقستاننىڭ ۇزاق مەرزىمدى دامۋىنا ۇلەس قوسادى. كاسىبي جەتىستىكتەرىڭىزدىڭ ءوز ەلىڭىزدىڭ دامۋىمەن تىعىز بايلانىستى ەكەنىن ءتۇسىنۋ - وتە ماڭىزدى.

وسى تۇستا ايتارىم، قازاقستانعا جاي عانا ءبىر وتپەلى كەزەڭ رەتىندە قاراماڭىز. ءبىزدىڭ ەلگە الەممەن بايلانىستىراتىن، الەمدىك دەڭگەيدەگى مىندەتتەردى شەشۋگە جانە حالىقارالىق ستاندارتتارعا ساي مانساپ قۇرۋعا مۇمكىندىك بەرەتىن نەگىزگى الاڭ رەتىندە قاراڭىز. ەلىمىزدە وسىنداي مۇمكىندىكتەر جەتەرلىك.

- سۇحباتىڭىز ءۇشىن راحمەت!