قازاقستاندا 8-9 ميلليون تەڭگەگە قانداي كولىك الۋعا بولادى؟
استانا. KAZINFORM – قازاقستاندا قىتايلىق كولىكتەردىڭ قاتارى جىل سايىن كوبەيىپ كەلەدى. سولاردىڭ اراسىندا باعاسى، سىرتقى ديزاينى جانە تەحنيكالىق مۇمكىندىكتەرى ارقىلى ساتىپ الۋشىلاردىڭ نازارىن اۋدارعان مودەلدەردىڭ ءبىرى - Changan X5 Plus.
قازاقستان نارىعىندا بۇل كولىك رەسمي ديلەرلەر ارقىلى CS35 Max اتاۋىمەن ۇسىنىلادى.
«Kolesa KZ» ءتىلشىسى كروسسوۆەردى سىناقتان وتكىزىپ، 8-9 ميلليون تەڭگە شاماسىنداعى باعاعا قانداي كولىك ۇسىناتىنىن جانە ونىڭ كۇندەلىكتى پايدالانۋدا قانشالىقتى ىڭعايلى ەكەنىن باعالادى.
سىرتقى كەلبەتىمەن بىردەن كوزگە تۇسەدى
Changan X5 Plus-تىڭ باستى ەرەكشەلىكتەرىنىڭ ءبىرى - ديزاينى. كولىككە قاراعان كەزدە كولەمدى رادياتور تورى، جارىق ديودتى شامدارى، سپورتتىق سيپاتتاعى بامپەرلەرى مەن قىزىل ءتۇستى ساندىك ەلەمەنتتەرى نازار اۋدارادى. ارتقى بولىگىندەگى سپويلەر دە مودەلدىڭ سپورتتىق بەينەسىن تولىقتىرا تۇسەدى.
كروسسوۆەردىڭ ۇزىندىعى شامامەن 4,5 مەتر بولسا، دوڭگەلەك بازاسى 2,7 مەترگە جۋىق. ياعني سىرت كوزگە شاعىن كورىنگەنىمەن، كولىكتىڭ ىشكى كەڭىستىگى جەتكىلىكتى.
سالونعا كىرگەندە بىردەن بىرنەشە سيفرلىق ەكران كوزگە تۇسەدى. الدىڭعى ورىندىقتار دا ەرەكشە ديزايندا جاسالعان. ولار سپورتتىق اۆتوموبيلدەردەگى شەلەك ءتارىزدى ورىندىقتارعا ۇقسايدى.
الايدا سىرتقى اسەرلى ديزاين ءاردايىم جايلىلىقتى بىلدىرمەيدى. تەست بارىسىندا جۋرناليست ورىندىقتاردىڭ ارقانى تولىق قولدامايتىنىن بايقاعان. سونىمەن قاتار جاستىقشانىڭ الدىڭعى بولىگىن جەكە رەتتەۋ مۇمكىندىگى جوق.
نەگىزگى نۇسقادا جۇرگىزۋشى ورىندىعى قولمەن رەتتەلەدى. ال قىمباتىراق جيناقتامالاردا ەلەكترلى رەتتەۋ فۋنكسيالارى پايدا بولادى.
سالون ماتەريالدارى دا ءارتۇرلى. الدىڭعى بولىگىندە جۇمساق پلاستيك پەن ساندىك تىگىستەر قولدانىلعانىمەن، كەيبىر جەرلەردە قاتتى پلاستيك باسىم. اسىرەسە ارتقى قاتاردا مۇنداي ماتەريالدار كوبىرەك كەزدەسەدى. ورىندىقتار ەكوبىلعارىمەن قاپتالعان.
كولىكتىڭ ماڭىزدى ارتىقشىلىقتارىنىڭ ءبىرى - ىشكى كەڭىستىگى. ەكىنشى قاتاردا وتىرعان جولاۋشىلار ءۇشىن اياق قوياتىن ورىن جەتكىلىكتى. ورتالىق توننەلدىڭ بيىكتىگى دە اسا ۇلكەن ەمەس، سوندىقتان ارتقى ورتاڭعى جولاۋشىعا كەدەرگى از.
ارتقى ورىندىقتاردىڭ ارقالىعىن بۇكتەۋگە بولادى. بۇل جۇكسالعىشقا كولەمدى زاتتاردى ورنالاستىرۋعا مۇمكىندىك بەرەدى. دەگەنمەن بارلىق فۋنكسيا بازالىق نۇسقادا ۇسىنىلمايدى. مىسالى، ارتقى قاتارداعى ورتالىق قول تىرەگى تەك جوعارى جيناقتامادا بار.
جابدىقتالۋى باعاعا قاراي وزگەرەدى
Changan X5 Plus-تىڭ تاعى ءبىر ارتىقشىلىعى - جابدىقتالۋى. باعاسى سالىستىرمالى تۇردە قولجەتىمدى بولعانىمەن، كولىكتە كۇندەلىكتى پايدالانۋعا قاجەتتى ءبىرقاتار فۋنكسيا بار.
مىسالى، اۆتوماتتى كليمات-باقىلاۋ فيزيكالىق باتىرمالار ارقىلى باسقارىلادى. سونىمەن قاتار ارتقى كورىنىس كامەراسى مەن پاركترونيك قاراستىرىلعان.
جوعارى جيناقتامالاردا 360 گرادۋسقا شولۋ جاسايتىن كامەرا، قوزعالتقىشتى قاشىقتان ىسكە قوسۋ جانە بەسىنشى ەسىكتىڭ ەلەكترلى جەتەگى سياقتى مۇمكىندىكتەر قوسىلادى.
الايدا كولىكتىڭ قاي نارىققا ارنالعانىنا دا ءمان بەرگەن ءجون. قىتاي نارىعىنا ارنالعان X5 Plus نۇسقاسىندا Apple CarPlay مەن Android Auto زاۋىتتان ورناتىلمايدى. مۋلتيمەديا جۇيەسىنىڭ باستاپقى ينتەرفەيسى قىتاي تىلىندە بولادى جانە ونى جەرگىلىكتى نارىققا بەيىمدەۋ قاجەت.
بۇل نۇسقادا راديو قابىلداعىشتىڭ دا بولماۋى مۇمكىن. ال قازاقستانداعى رەسمي CS35 Max نۇسقاسىندا مۋلتيمەديا جۇيەسى قازاق جانە ورىس تىلدەرىندە ۇسىنىلادى.
قوزعالتقىشى قۋاتتى
Changan X5 Plus-تىڭ تەحنيكالىق سيپاتتاماسى دا نازار اۋدارۋعا تۇرارلىق. كروسسوۆەرگە 1,5 ليترلىك تۋربوكومپرەسسورلى قوزعالتقىش ورناتىلعان. ونىڭ قۋاتى - 181 ات كۇشى.
قوزعالتقىش جەتى ساتىلى، قوس ءىلىنىستى روبوتتاندىرىلعان بەرىلىس قورابىمەن جۇمىس ىستەيدى.
جۋرناليستىڭ باعالاۋىنشا، كولىكتىڭ ديناميكاسى وسى باعا ساناتىنداعى باستى ارتىقشىلىقتارىنىڭ ءبىرى. كروسسوۆەر جىلدامدىقتى جاقسى جينايدى، ال باسىپ وزۋ كەزىندە قوزعالتقىشتىڭ قۋاتى جەتكىلىكتى سەزىلەدى.
رۋلدە «اتاكا» دەپ اتالاتىن ارنايى باتىرما بار. ول قوزعالتقىشتىڭ مۇمكىندىگىن بارىنشا پايدالانۋعا مۇمكىندىك بەرەدى. ياعني جۇرگىزۋشىگە جىلدام ۇدەۋ قاجەت بولعان جاعدايدا كولىك بىردەن بەلسەندىرەك ارەكەت ەتەدى.
سپورتتىق رەجيمدى قوسقاندا سالوندا قوزعالتقىشتىڭ دىبىسى دا وزگەرەدى. ديناميكتەر ارقىلى سپورتتىق كولىكتەرگە ءتان شىعارۋ جۇيەسىنىڭ دىبىسى يميتاتسيالانادى.
قوزعالتقىشى قۋاتتى بولعانىمەن، روبوتتاندىرىلعان بەرىلىس قورابىنىڭ وزىندىك ەرەكشەلىكتەرى بار.
جول ۇستىندە بەرىلىستەردى اۋىستىرۋى جىلدام. ءبىراق ورنىنان قوزعالعان كەزدە نەمەسە ارتقى بەرىلىسكە قوسقاندا كەيدە قىسقا كىدىرىس بايقالادى.
بۇل اسىرەسە تۇراققا قويعاندا، تار جەردە مانيەۆر جاساعاندا نەمەسە كەرى قوزعالعاندا سەزىلۋى مۇمكىن. سوندىقتان مۇنداي قوراپپەن بۇرىن كولىك جۇرگىزبەگەن ادامعا وعان بەيىمدەلۋگە ءبىراز ۋاقىت قاجەت.
ءجۇرىسى جامان ەمەس، ءبىراق سالوندا شۋ بار
كروسسوۆەردىڭ ءجۇرىس بولىگى دە سىناق بارىسىندا جاقسى باعالانعان. كولىك ءتۇزۋ جولدا ءوزىن سەنىمدى ۇستايدى، بۇرىلىستاردا تۇراقتى جانە الدىڭعى اسپاسى جولداعى شۇڭقىرلاردى جامان قابىلدامايدى.
ال ءىرى كەدەرگىلەردەن وتكەن كەزدە جاعداي ءسال وزگەرەدى. اسىرەسە جىلدامدىق جوعارى بولسا، ارتقى بولىك قاتقىلىراق سەزىلەدى.
سوعان قاراماستان، قازاقستان جولدارىنىڭ ەرەكشەلىگىن ەسكەرسەك، Changan X5 Plus-تىڭ اسپاسىن وسى سەگمەنت ءۇشىن جامان دەۋگە كەلمەيدى. تەست جۇرگىزگەن جۋرناليست الماتى جولدارىنداعى سىناق كەزىندە ونىڭ ءجۇرىس بولىگىنە وڭ باعا بەرگەن.
كولىكتىڭ ءالسىز تۇستارىنىڭ ءبىرى - دىبىس وقشاۋلاۋى. جىلدامدىق ارتقان كەزدە دوڭگەلەكتىڭ جانە جولدىڭ شۋى سالونعا انىق ەستىلەدى. ۇزاق جولدا بۇل جايلىلىققا اسەر ەتۋى مۇمكىن.
كولىكتىڭ ولشەمىن سەزىنۋگە قاتىستى دا وزىندىك ەرەكشەلىگى بار. بيىك كاپوت پەن تەرەزەلەردىڭ ورنالاسۋى جۇرگىزۋشىگە اۆتوموبيلدىڭ شەتكى نۇكتەلەرىن بىردەن سەزىنۋگە مۇمكىندىك بەرمەيدى.
ارتقى اينەك تە سالىستىرمالى تۇردە تار. سوندىقتان اسىرەسە قالانىڭ تىعىز جەرلەرىندە تۇراققا قويۋ كەزىندە قوسىمشا كامەرالاردىڭ بولعانى پايدالى.
وسى سەبەپتى جۋرناليست قالادا جيى جۇرەتىن جۇرگىزۋشىلەرگە 360 گرادۋسقا شولۋ كامەراسى بار جيناقتامانى تاڭداعان دۇرىس دەپ ەسەپتەيدى.
باسەكەلەستەرى كىم؟
بۇل كولىك 8-9 ميلليون تەڭگە شاماسىنداعى باعا سەگمەنتىندە جالعىز ەمەس. بۇل ساناتتا ساتىپ الۋشى Chery Tiggo 4 ،Jetour Dashing ،Geely Coolray ،Haval Jolion ،GAC GS3 جانە Geely Galaxy Cityray سياقتى مودەلدەردى دە قاراستىرا الادى.
ءارقايسىسىنىڭ ءوز ارتىقشىلىعى بار. دەگەنمەن Changan X5 Plus-تىڭ باستى كوزىرلارى - زاماناۋي ديزاينى، كەڭ سالونى، 181 ات كۇشىنە يە تۋربوموتورى جانە جابدىقتالۋىنىڭ مولدىعى.
ال كەمشىلىكتەرىنە ورىندىقتاردىڭ جايلىلىعى، روبوت قوراپتىڭ كەي جاعدايدا كىدىرۋى، سالونداعى جول شۋى جانە كەيبىر فۋنكسيالاردىڭ تەك قىمبات جيناقتامادا ۇسىنىلۋى جاتادى.
سوندىقتان بۇل كولىكتى تاڭداعاندا تەك سىرتقى ديزاينى مەن قوزعالتقىش قۋاتىنا ەمەس، ناقتى جيناقتاماسىنا دا نازار اۋدارعان ءجون. اسىرەسە 360 گرادۋس كامەراسى، مۋلتيمەديا جۇيەسى جانە ورىندىقتاردى رەتتەۋ مۇمكىندىكتەرى كۇندەلىكتى پايدالانۋدا ماڭىزدى بولۋى مۇمكىن.
