قازاقستاندا 56 كولىكتى شەتەلگە زاڭسىز شىعارعان توپ اشكەرەلەندى
استانا. KAZINFORM - ىشكى ىستەر مينيسترلىگى اۆتوكولىكتەرگە قاتىستى الاياقتىق جاسادى دەگەن كۇدىككە ىلىنگەن قىلمىستىق توپتىڭ ارەكەتىنە توسقاۋىل قويدى، دەپ حابارلايدى Polisia.kz.
الدىن الا مالىمەت بويىنشا، كۇدىكتىلەر جالعان تۇلعالاردىڭ اتىنا نەسيەگە راسىمدەلگەن 56 اۆتوكولىكتى شەتەلگە شىعارىپ، قايتا ساتقان.
Polisia.kz مالىمەتىنشە، كۇدىكتىلەر ەكىنشى دەڭگەيلى بانكتەر مەن ميكروقارجى ۇيىمدارى ارقىلى اۆتوكولىكتەردى جالعان تۇلعالاردىڭ اتىنا كەپىلگە راسىمدەگەن. كەيىن كولىكتەردى قازاقستان اۋماعىنان تىس جەرلەرگە شىعارىپ، ساتقان.
قىلمىستىق ارەكەتتىڭ جولىن كەسۋ ءۇشىن ءى ءى م ەلىمىزدىڭ 10 وڭىرىندە ءبىر مەزگىلدە جەدەل ءىس-شارالار جۇرگىزدى. ناتيجەسىندە 48 ادام پوليتسياعا جەتكىزىلدى. ولاردىڭ التاۋى قىلمىستىق توپتى ۇيىمداستىردى دەگەن كۇدىكپەن ۋاقىتشا ۇستاۋ يزولياتورىنا قامالدى.
جەدەل ءىس-شارالار قىلمىستىق توپتىڭ ودان ءارى ارەكەت ەتۋىنە توسقاۋىل قويىپ، الاياقتىقتىڭ جاڭا دەرەكتەرىنىڭ الدىن الۋعا مۇمكىندىك بەردى.
- قازىر وقيعانىڭ بارلىق ءمان-جايى انىقتالىپ جاتىر. سونداي-اق شەتەلگە شىعارىلعان اۆتوكولىكتەردى ىزدەستىرۋ شارالارى جۇرگىزىلۋدە. تەرگەۋ بارىسى ءى ءى م- ءنىڭ باقىلاۋىندا، - دەلىنگەن حابارلامادا.
ىشكى ىستەر مينيسترلىگى ازاماتتاردى «زاڭ مەن ءتارتىپ» قاعيداتىن ۇستانىپ، قىراعى بولۋعا جانە الاياقتاردىڭ ارباۋىنا تۇسپەۋگە شاقىردى.
وسىعان دەيىن حابارلاعانىمىزداي، جىل باسىنان بەرى ۇيىمداسقان قىلمىستىق توپ مۇشەلەرىنە قاتىستى 45 قىلمىستىق ءىس سوتقا جولداندى. ءبىرقاتار ءىس بويىنشا ايىپتىلار 17 جىلعا دەيىن باس بوستاندىعىنان ايىرىلدى.
