قازاقستاننان 2,2 مىڭنان استام شەتەل ازاماتىن شىعارۋ تۋرالى شەشىم قابىلداندى
استانا. KAZINFORM - ەلىمىزدە «نەلەگال» ءىس-شاراسى بارىسىندا كوشى-قون زاڭناماسىن بۇزۋدىڭ 15,8 مىڭنان استام دەرەگى انىقتالدى.
5-16-قازان ارالىعىندا قازاقستان اۋماعىندا قوعامدىق ءتارتىپتى قامتاماسىز ەتۋگە، كوشى-قون زاڭناماسىن بۇزۋشىلىقتاردىڭ الدىن الۋعا جانە جولىن كەسۋگە، سونداي-اق شەتەل ازاماتتارىنىڭ ەلدە بولۋ قاعيدالارىن ساقتاۋىن باقىلاۋدى كۇشەيتۋگە باعىتتالعان «نەلەگال» جەدەل-پروفيلاكتيكالىق ءىس-شاراسى وتكىزىلدى.
ىشكى ىستەر مينيسترلىگىنىڭ مالىمەتىنشە، ءىس-شارا اياسىندا پوليتسيا قىزمەتكەرلەرى جەكە جانە زاڭدى تۇلعالار اراسىندا پروفيلاكتيكالىق جۇمىستار جۇرگىزىپ، كوشى-قون زاڭناماسىنىڭ تالاپتارىن جانە ولاردى بۇزعانى ءۇشىن كوزدەلگەن جاۋاپكەرشىلىكتى ءتۇسىندىردى. شەتەل ازاماتتارىنا تۇرعىن ءۇي بەرۋ، ولاردى تىركەۋ ءتارتىبىن ساقتاۋ جانە شەتەلدىك جۇمىس كۇشىن زاڭسىز تارتۋعا جول بەرمەۋ ماسەلەلەرىنە ەرەكشە نازار اۋدارىلدى.
سونىمەن قاتار شەتەل ازاماتتارى شوعىرلانىپ تۇراتىن ورىندار، قۇرىلىس نىساندارى، بازارلار، سونداي-اق شەتەلدىك جۇمىسشىلاردىڭ ەڭبەگىن پايدالاناتىن كاسىپورىندار مەن ۇيىمدار تەكسەرىلدى.
وپەراتسيا قورىتىندىسى بويىنشا كوشى-قون زاڭناماسى سالاسىندا 15,8 مىڭنان استام قۇقىق بۇزۋشىلىقتىڭ جولى كەسىلدى.
- قازاقستاندا بولۋ قاعيدالارىن بۇزعانى ءۇشىن 7595 شەتەل ازاماتى اكىمشىلىك جاۋاپكەرشىلىككە تارتىلدى. ەڭبەك قىزمەتىن زاڭسىز جۇزەگە اسىرعانى ءۇشىن تاعى 3899 شەتەل ازاماتىنا قاتىستى شارالار قابىلداندى. ءتيىستى رۇقساتتارسىز شەتەلدىك جۇمىس كۇشىن تارتقانى ءۇشىن 815 جۇمىس بەرۋشىگە قاتىستى شارالار قولدانىلدى. سونداي-اق شەتەل ازاماتتارىنىڭ وزدەرىندە بولۋى تۋرالى ىشكى ىستەر ورگاندارىنا ۋاقتىلى حابارلاماعان 3533 جەكە جانە زاڭدى تۇلعا جاۋاپكەرشىلىككە تارتىلدى، - دەلىنگەن حابارلامادا.
سوتتار كوشى-قون زاڭناماسىن بۇزعان ادامداردى قازاقستان اۋماعىنان شىعارۋ تۋرالى 2243 شەشىم شىعاردى. بۇدان بولەك، ەلدە ودان ءارى بولۋىنا جول بەرىلمەيدى دەپ تانىلعان 2479 شەتەل ازاماتىنىڭ ەلدە بولۋ مەرزىمى قىسقارتىلدى.
ماجبۇرلەپ ەلدەن شىعارۋ شاراسى 236 شەتەل ازاماتىنا قاتىستى ورىندالدى. ولاردىڭ بارلىعىنا قازاقستانعا بەس جىل مەرزىمگە كىرۋگە تىيىم سالىندى.
تەكسەرۋ بارىسىندا مەملەكەتتىك شەكارانى زاڭسىز كەسىپ وتكەن 14 شەتەل ازاماتى دا انىقتالدى. اتالعان فاكتىلەر بويىنشا شەكارا قىزمەتىمەن بىرلەسىپ تەرگەپ-تەكسەرۋ جۇمىستارى جۇرگىزىلىپ جاتىر.
سونىمەن قاتار ىزدەۋدە جۇرگەن جانە ءوز مەملەكەتتەرىنىڭ قۇقىق قورعاۋ ورگاندارىنان قازاقستان اۋماعىندا جاسىرىنىپ جۇرگەن 62 شەتەل ازاماتى ۇستالدى.
انىقتالعان قۇقىق بۇزۋشىلىقتاردى تالداۋ زاڭسىز كوشى-قوننىڭ نەگىزگى سەبەپتەرىنىڭ ءبىرى جەكەلەگەن ازاماتتاردىڭ زاڭدا بەلگىلەنگەن تالاپتاردى اينالىپ ءوتىپ، تەز پايدا تابۋعا ۇمتىلۋى ەكەنىن كورسەتەدى.
ءبىرقاتار جاعدايدا شەتەلدىكتەردىڭ ەلگە زاڭسىز كىرۋىنە قازاقستان ازاماتتارىنىڭ وزدەرى ىقپال ەتىپ، ولاردىڭ ەلدە بولۋىن ۇيىمداستىرادى، تۇرعىن ۇيمەن قامتاماسىز ەتەدى جانە قاجەتتى رۇقسات قۇجاتتارىنسىز ەڭبەك قىزمەتىنە تارتادى.
ماسەلەن، الماتى وبلىسىندا كوشى-قون زاڭناماسىن بۇزعان شەتەلدىكتەرگە تۇرعىن ءۇي بەرىپ، زاڭسىز كوشى-قوندى ۇيىمداستىردى دەگەن كۇدىكپەن قازاقستان ازاماتى ۇستالدى. وسىنداي فاكتىلەر جامبىل جانە پاۆلودار وبلىستارىندا دا انىقتالدى.
وپەراتسيا بارىسىندا شەتەلدىك جۇمىس كۇشىن زاڭسىز پايدالانۋدىڭ جولىن كەسۋگە ەرەكشە نازار اۋدارىلدى.
ماسەلەن، شىمكەنت قالاسىنداعى قۇرىلىس نىساندارىنىڭ بىرىندە ءتيىستى رۇقساتتارسىز ەڭبەك قىزمەتىن جۇزەگە اسىرعان 40 قا جۋىق شەتەل ازاماتى انىقتالدى.
وسىنداي زاڭ بۇزۋشىلىقتار الماتى قالاسىندا، سونداي-اق قاراعاندى، الماتى، اتىراۋ، ماڭعىستاۋ، شىعىس قازاقستان، قوستاناي جانە سولتۇستىك قازاقستان وبلىستارىندا دا تىركەلدى. بارلىق جاعدايدا شەتەلدىك جۇمىسشىلار مەن جۇمىس بەرۋشىلەرگە قاتىستى زاڭنامادا كوزدەلگەن شارالار قابىلداندى.
- بۇدان بولەك، ءبىر جىل ىشىندە شەتەلدىك جۇمىس كۇشىن تارتۋدىڭ بەلگىلەنگەن ءتارتىبىن ەكى نەمەسە ودان دا كوپ رەت بۇزعان 10 جۇمىس بەرۋشىگە قاتىستى تەرگەپ-تەكسەرۋ باستالدى. قايتالانعان قۇقىق بۇزۋشىلىقتار ءۇشىن ولارعا قازاقستان رەسپۋبليكاسىنىڭ زاڭناماسىنا سايكەس قىلمىستىق جاۋاپكەرشىلىك كوزدەلگەن، - دەپ حابارلادى ىشكى ىستەر مينيسترلىگى.
سونداي-اق قوعامدىق ءتارتىپتى جۇيەلى تۇردە بۇزاتىن جانە ەلدە بەلگىلەنگەن مىنەز-قۇلىق نورمالارىن قۇرمەتتەمەيتىن شەتەل ازاماتتارىنا ەرەكشە نازار اۋدارىلدى.
اتاپ ايتقاندا، كوشى-قون زاڭناماسىن بۇزۋعا قاتىسى جوق، الايدا بىرنەشە رەت وزگە دە قۇقىق بۇزۋشىلىقتار جاساعان، سونىڭ ىشىندە بالاعات سوزدەر ايتىپ، قوعامدىق ءتارتىپتى بۇزعان ادامدار تۋرالى ءسوز بولىپ وتىر.
مۇنداي ازاماتتاردى قازاقستان اۋماعىنان شىعارۋ تۋرالى پوليتسيا سوتتارعا 31 ءوتىنىشحات جولدادى. ءتيىستى شارالاردى قولدانۋ باستاماسى شىمكەنت قالاسىندا، الماتى قالاسىندا، سونداي-اق اباي، اقتوبە، الماتى، ماڭعىستاۋ، قوستاناي جانە تۇركىستان وبلىستارىندا كوتەرىلدى.
ەگەر سوتتار ەلدەن شىعارۋ تۋرالى شەشىم قابىلداسا، اتالعان شەتەل ازاماتتارىنا قازاقستان اۋماعىنا بەس جىل مەرزىمگە كىرۋگە تىيىم سالىنادى.
پوليتسيا كوشى-قون زاڭناماسىن بۇزۋشىلىقتاردىڭ الدىن الۋ جانە جولىن كەسۋ، زاڭسىز كوشى-قون ارنالارىنىڭ جولىن انىقتاۋ، سونداي-اق قۇقىققا قايشى ارەكەتتەرگە ىقپال ەتەتىن ادامداردى جاۋاپكەرشىلىككە تارتۋ باعىتىنداعى جۇيەلى جۇمىستاردى جالعاستىرىپ جاتىر.
ەسكە سالايىق، بۇعان دەيىن 2027-جىلعى 1-شىلدەدەن كوشىپ كەلۋشىلەرگە قازاقستانعا كىرۋ ءۇشىن ەلەكتروندىق رۇقسات الۋ مىندەتتى بولاتىنىن حابارلاعانبىز.
