قازاقستاندا 10-15 ميلليون تەڭگەگە قانداي كولىك الۋعا بولادى؟
استانا. KAZINFORM - قازاقستاندا 10-15 ميلليون تەڭگە ارالىعىنداعى جاڭا كولىكتەرگە سۇرانىس جىل سايىن ارتىپ كەلەدى. بۇرىن بۇل باعادا Hyundai Tucson مەن Kia Sportage كولىگى ەڭ تانىمال مودەلدەردىڭ قاتارىندا بولسا، قازىر نارىقتاعى جاعداي بىرتىندەپ وزگەرىپ جاتىر.
اسىرەسە، قىتايدان جەكە يمپورت ارقىلى اكەلىنەتىن جاڭا مودەلدەرگە قىزىعۋشىلىق ارتقان.
Kolesa.kz ساراپشىلارى 2025-جىلدىڭ باسىنان بەرى قازاقستاندىقتاردىڭ قانداي جاڭا كولىكتەرگە كوبىرەك نازار اۋدارعانىن زەرتتەپ، ەڭ سۇرانىسقا يە مودەلدەردىڭ ءتىزىمىن جاريالادى. ەندەشە، قازاقستاندىقتار قاي كولىكتەرگە جيى قىزىعۋشىلىق تانىتاتىنىنا توقتالايىق.
Deepal S07 - ەڭ كوپ قىزىعۋشىلىق تۋدىرعان كولىك
2025-جىلى قازاقستاندىقتاردىڭ ەڭ كوپ نازارىن اۋدارتقان مودەل - Deepal S07 بولدى. بۇل مودەل تولىق ەلەكترلى جانە جانارماي مەن ەلەكتر قۋاتىن بىرگە پايدالاناتىن گيبريد نۇسقادا ساتىلادى. قازاقستاندىقتار كوبىنە گيبريد تۇرىنە قىزىعۋشىلىق تانىتادى.
كولىك 1,5 ليترلىك بەنزين قوزعالتقىشى مەن ەلەكترموتور ارقىلى جۇمىس ىستەيدى. ءوندىرۋشى كولىك ءبىر قۋاتتا 1200 شاقىرىمنان اسا جول جۇرەدى دەپ كورسەتكەنىمەن، ناقتى كورسەتكىش بۇدان تومەن. سوعان قاراماستان، تەحنولوگيالىق مۇمكىندىكتەرى مەن زاماناۋي ديزاينى ونى نارىقتاعى ەڭ تانىمال مودەلدەردىڭ بىرىنە اينالدىرعان.
Changan CS55 Plus قازاقستاندىقتارعا ۇناپ جاتىر
ەكىنشى ورىنعا Changan CS55 Plus جايعاستى. بۇل كروسسوۆەر رەسمي اۆتوسالونداردا دا، جەكە يمپورتتاۋشىلار ارقىلى دا ساتىلادى. باعاسى شامامەن 10-11 ميلليون تەڭگە ارالىعىندا.
كولىك 181 ات كۇشىنە يە 1,5 ليترلىك تۋربوموتورمەن جابدىقتالعان. سونىمەن قاتار قىتايدان اكەلىنەتىن جاڭارتىلعان نۇسقالارى دا قازاقستاندىقتاردىڭ قىزىعۋشىلىعىن تۋدىرىپ وتىر.
Kia Sportage ءالى دە ليدەرلەر قاتارىندا
Kia Sportage ۇزدىك ۇشتىكتىڭ قاتارىندا. بۇل مودەل بۇرىننان قازاقستاندىقتار اراسىندا ەڭ تانىمال كروسسوۆەرلەردىڭ ءبىرى سانالادى. نارىقتا كوبىنە قوستانايدا قۇراستىرىلعان نۇسقالار ساتىلسا، قىتايدان اكەلىنەتىن Sportage Ace مودەلدەرى دە كەزدەسەدى.
بۇل نۇسقالار سىرتقى ديزاينىمەن عانا ەمەس، كولەمىمەن دە ەرەكشەلەنەدى. كولىكتىڭ باعاسى شامامەن 11,7 ميلليون تەڭگەدەن باستالادى.
Changan CS75 Plus سۇرانىسقا يە بولدى
تاعى ءبىر Changan مودەلى - CS75 Plus ءتورتىنشى ورىنعا جايعاستى. بۇل كروسسوۆەردىڭ رەسمي ديلەرلەردەگى باعاسى شامامەن 11,6-14 ميلليون تەڭگە ارالىعىندا.
قاراپايىم نۇسقالارى الدىڭعى دوڭگەلەك ارقىلى جۇرسە، قىمباتىراق تۇرلەرى ءتورت دوڭگەلەگى دە تارتاتىن جۇيەمەن جانە قۋاتتى 2 ليترلىك قوزعالتقىشپەن جابدىقتالعان. ال يمپورت ارقىلى كەلگەن كولىكتەر كەيدە بۇدان دا ارزانعا ساتىلىپ جاتىر.
Kia Seltos ۇزدىك بەستىككە ەندى
ال العاشقى بەستىكتى Kia Seltos قورىتىندىلادى. بۇل مودەل رەسمي ساتىلىمدا دا، شەتەلدەن جەكە جەتكىزىلەتىن كولىكتەر اراسىندا دا جيى كەزدەسەدى.
قازاقستاندا قۇراستىرىلاتىن نۇسقالارى 2 ليترلىك قوزعالتقىشپەن ۇسىنىلادى جانە تولىق جەتەكپەن دە ساتىلادى. باعاسى شامامەن 11-13,5 ميلليون تەڭگە ارالىعىندا. قىتايدان كەلەتىن تۇرلەرى ارزانداۋ بولعانىمەن، ولاردىڭ قوزعالتقىشى مەن جابدىقتالۋى وزگەشە.
قىتاي كولىكتەرىنە قىزىعۋشىلىق نەگە ارتتى؟
ساراپشىلاردىڭ ايتۋىنشا، قازاقستاندا قازىر رەسمي ديلەرلىك كولىكتەرمەن قاتار قىتايدان جەتكىزىلەتىن جاڭا مودەلدەرگە دە قىزىعۋشىلىق ايتارلىقتاي وسكەن.
اسىرەسە Changan ،Deepal سەكىلدى برەندتەر بۇرىن تەك ارزان بالاما رەتىندە قاراستىرىلسا، بۇگىندە Hyundai مەن Kia-عا تىكەلەي باسەكەلەس بولا باستاعان.
