قازاقستان يزرايلگە 500 مىڭ تونناعا دەيىن بيداي جەتكىزۋگە دايىن

يەرۋساليم قالاسىندا وتكەن ساۋدا-ەكونوميكالىق ىنتىماقتاستىق جونىندەگى قازاقستان- يزرايل ۇكىمەتارالىق كوميسسياسىنىڭ ونىنشى وتىرىسىندا ەكى ەل اراسىنداعى اۋىل شارۋاشىلىعى ونىمدەرىنىڭ ءوزارا ساۋدا كولەمىن ارتتىرۋ جانە وزىق تەحنولوگيالاردى وندىرىسكە ەنگىزۋ ماسەلەلەرى تالقىلاندى.

قازاقستاننىڭ اگروونەركاسىپتىك كەشەنىنىڭ الەۋەتى مەن وتاندىق ءونىمنىڭ ەكسپورتتىق مۇمكىندىكتەرى تۋرالى «ازىق- تۇلىك كەلىسىمشارت كورپوراتسياسى» ۇ ق باسقارما ءتوراعاسىنىڭ ورىنباسارى سامات تەڭبايەۆ باياندادى.

قازاقستان الەمدىك اگرارلىق نارىقتاعى ورنىن نىعايتىپ، وتاندىق اۋىل شارۋاشىلىعى ونىمدەرىن شەتەلگە جەتكىزۋ اياسىن جىلدان-جىلعا كەڭەيتىپ كەلەدى. قازىرگى تاڭدا ەلىمىزدىڭ اۋىل شارۋاشىلىعى ونىمدەرى الەمنىڭ 80 نەن استام ەلىنە ەكسپورتتالادى. اسىرەسە ەۋروپا، سولتۇستىك افريكا، تاياۋ شىعىس جانە وڭتۇستىك- شىعىس ازيا مەملەكەتتەرىمەن ساۋدا بايلانىستارىن دامىتۋعا باسىمدىق بەرىلىپ وتىر.

بيىلعى مول استىق ءونىمى ەكسپورت كولەمىن ارتتىرۋعا مول مۇمكىندىك تۋعىزىپ وتىر. قازاقستاندا اقۋىز بەن جەلىمتىك مولشەرى جوعارى، الەمدىك نارىقتا سۇرانىسقا يە ازىق-تۇلىك بيدايىنىڭ مول قورى بار. بۇل ءونىم يزرايلدەگى استىق وڭدەۋ كاسىپورىندارىنىڭ دا سۇرانىسىن قاناعاتتاندىرا الادى.

- يزرايل نارىعىنىڭ سۇرانىسى مەن قاجەتتىلىگىن ەسكەرە وتىرىپ، 200 مىڭنان 500 مىڭ تونناعا دەيىن ازىق- تۇلىك بيدايىن جانە وزگە دە اۋىل شارۋاشىلىعى ونىمدەرىن جەتكىزۋ جونىندە ۇزاق مەرزىمدى كەلىسىمشارتتار جاساسۋعا دايىنبىز، - دەدى سامات تەڭبايەۆ.

ەكسپورت كولەمىن ۇلعايتۋ جولىنداعى ماڭىزدى ماسەلەلەردىڭ ءبىرى - ءونىمدى تاسىمالداۋ. وسىعان بايلانىستى قازاقستاندىق تاۋارلاردى يزرايلگە جەتكىزۋ ءۇشىن ازەربايجان مەن گرۋزيا ارقىلى وتەتىن كولىك ءدالىزىن، سونداي-اق بالتىق تەڭىزىندەگى پورتتار ارقىلى وتەتىن بالاما باعىتتاردى پايدالانۋ ۇسىنىلدى.

ەكى ەل اراسىنداعى ىقپالداستىقتى كەڭەيتۋگە جىل سايىن 2 ميلليون توننادان استام بيداي ساتىپ الاتىن يزرايل ەلىنىڭ استىققا دەگەن جوعارى سۇرانىسى دا نەگىز بولىپ وتىر. سونداي-اق مايلى داقىلدارعا، ارپا مەن جۇگەرىگە سۇرانىس تۇراقتى. مۇنىڭ ءبارى قازاقستاننىڭ اۋىل شارۋاشىلىعى ونىمدەرىن شەتەلگە ساتۋ باعىتتارىن ءارتاراپتاندىرۋعا جانە ەكى ەل اراسىنداعى ساۋدا-ەكونوميكالىق بايلانىستى نىعايتۋعا تىڭ مۇمكىندىك بەرەدى.

قازاقستان ەكسپورتتى ارتتىرۋمەن قاتار، وتاندىق اگروونەركاسىپتىك كەشەندى جاڭعىرتۋ ماقساتىندا يزرايلدىڭ وزىق تەحنولوگيالارىن يگەرۋگە دە مۇددەلى. اسىرەسە سۋ قورى تاپشى جاعدايدا اۋىل شارۋاشىلىعىن ءتيىمدى ۇيىمداستىرۋ جونىندەگى يزرايل تاجىريبەسى ايرىقشا ماڭىزعا يە.

بۇل رەتتە سۋدى ۇنەمدەيتىن سۋارۋ جۇيەلەرىن ەنگىزۋ، تازارتىلعان سارقىندى سۋدى قايتا پايدالانۋ، ءوندىرىس ۇدەرىستەرىن سيفرلاندىرۋ جانە اۋىل شارۋاشىلىعىن باسقارۋدا جاساندى ينتەللەكت مۇمكىندىكتەرىن قولدانۋ باسىم باعىتتار سانالادى.

اتالعان تەحنولوگيالاردى قازاقستاننىڭ تابيعي-كليماتتىق ەرەكشەلىكتەرىنە بەيىمدەۋ سۋ رەسۋرستارىن ءتيىمدى پايدالانۋعا، ءوندىرىس شىعىندارىن ازايتۋعا جانە اۋىل شارۋاشىلىعى سالاسىنىڭ ونىمدىلىگىن ارتتىرۋعا جول اشادى.

وسىعان دەيىن قازاقستان كامبودجاعا بيداي مەن ەت ەكسپورتتاۋدى كوزدەپ وتىرعانىن جازدىق.