قازاقستان نوبەل سىيلىعىن قاشان الادى؟

مينيستر عىلىمداعى جەتىستىككە جەتۋ جولىن «وتە قيىن، ماشاقات كوپ جانە ۇزاق پروتسەسس» دەپ باعالادى. ول حالىقارالىق باسەكەنىڭ كۇشەيگەنىنە قاراماستان، وتاندىق عىلىمنىڭ بولاشاعىنا سەنىممەن قارايتىنىن جەتكىزدى.

«ءبىر كۇنى بىزدە دە ۇلكەن سەرپىلىس بولادى دەپ سەنەمىن. ءبىراق باسەكە كۇشەيىپ كەلەدى، قازىر جاعداي وتە كۇردەلى: ازيا ەلدەرى قارقىندى دامىپ كەتتى (...) قازىر جاساندى ينتەللەكتىنى ءبىلىم بەرۋ جانە عىلىمي زەرتتەۋ ۇدەرىستەرىنە ەنگىزۋگە، ونى وسى سالالاردا قولدانۋعا ماماندار دايارلاۋعا باسا ءمان بەرىپ وتىرمىز. ويتكەنى كوپتەگەن ەل جاساندى ينتەللەكتىنى دامىتۋدى باستى باعىت ەتىپ الدى. ۋاقىت كورسەتەدى، ءبىراق ءوز باسىم وپتيميستىك كوزقاراستامىن»، - دەدى ول.

ساياسات نۇربەك قازاقستاندىق عالىمداردىڭ ەڭبەگىن كوپشىلىككە تانىستىرۋ ماسەلەسىنە دە توقتالدى. ونىڭ پىكىرىنشە، جەكەلەگەن جەتىستىكتەر تۋرالى اقپارات تاراعانىمەن، ەلدەگى عىلىمنىڭ جالپى دامۋ بارىسىن كورسەتەتىن جۇيەلى جۇمىس جەتىسپەيدى.

«عىلىمي ناتيجەلەردى بىرتىندەپ جيناقتاپ كەلەسىزدەر دەلىك. العاشقى ناتيجەلەر دە بار. ەندى سولاردى دۇرىس كورسەتىپ، جۇيەلەپ ۇسىنۋىمىز كەرەك. ءبىزدىڭ ماسەلەمىز - وسىنى ءالى كۇنگە دەيىن جولعا قويا الماي كەلە جاتقانىمىز. عالىمداردى جاڭالىقتارعا شىعارۋعا تىرىسامىز، ءبىراق بۇل ارا-تۇرا عانا بولىپ تۇرادى ءارى جالپى كورىنىستى اشىپ كورسەتپەيدى. بىردە ءبىر عىلىمي ۇجىم تۋرالى، بىردە قانداي دا ءبىر ۋنيۆەرسيتەتتىڭ جەتىستىگى تۋرالى جاڭالىق شىعادى. ال وسىنىڭ ءبارىن بىرىكتىرىپ، تۇتاس كورىنىس قالىپتاستىرا الماي وتىرمىز»، - دەدى نۇربەك.

مينيستر وسى ساۋالعا ءۇش جىل بۇرىن دا جاۋاپ بەرگەن بولاتىن. ول كەزدە نوبەل سىيلىعىنا ۇمىتكەر عالىمدار قالىپتاسۋى ءۇشىن قازاقستان عىلىمعا ونداعان جىل بويى ينۆەستيتسيا سالىپ، عىلىمي مەكتەپتەردى اشۋعا جانە قالپىنا كەلتىرۋگە كۇش جۇمساۋى كەرەك ەكەنىن ايتقان.

سونداي-اق ساياسات نۇربەك ك س ر و ىدىراعاننان كەيىن ەلىمىزدىڭ عىلىمي كادرلارى ەداۋىر ازايعانىن اتاپ وتكەن. وسىعان بايلانىستى ول عالىمداردىڭ شەتەلگە كەتۋىنە توسقاۋىل قويۋ قاجەتتىگىن جەتكىزگەن ەدى.