قازاقستان تۋريستىك باعىتتاردى قالاي دامىتىپ جاتىر
استانا. KAZINFORM - استانا مەن الماتىنىڭ تۋريستىك مۇمكىندىكتەرىن ءبىر باعىتتا دامىتۋ ماسەلەسى تۋرالى AIMAQ پودكاستىنىڭ جاڭا شىعارىلىمىندا ساراپشىلار ايتىپ بەردى.
Astana Tourism ءتۋريزمدى دامىتۋ ورتالىعىنىڭ تۋريستىك باعىتتار مەن قىزمەتتەردى دامىتۋ دەپارتامەنتىنىڭ ديرەكتورى ولگا ابەلدينوۆانىڭ ايتۋىنشا، الماتى تۋريستەردى تابيعي كورىكتى جەرلەرىمەن، اسقار تاۋلارىمەن جانە وزىندىك مادەنيەتىمەن قىزىقتىرسا، استانا زاماناۋي ساۋلەتىمەن، ىسكەرلىك كەزدەسۋلەرىمەن جانە ءتۇرلى مادەني-كوپشىلىك ءىس-شارالارىمەن ەرەكشەلەنەدى.
- بۇگىندە الماتى مەن استانا ءبىر-ءبىرىن جاقسى تولىقتىرادى. ءبىز اۋە كومپانيالارىمەن بىرلەسىپ، ەكى قالانى قامتيتىن تۋريستىك ۇسىنىستار مەن ساپاردى قولجەتىمدى ەتۋ جولدارىن قاراستىرىپ جاتىرمىز. شەتەلدىك تۋريست ءۇشىن الدىمەن ەلورداعا كەلىپ، ودان كەيىن الماتىعا ۇشىپ بارعان وتە ءتيىمدى،-دەدى ول.
ىشكى تۋريزممەن اينالىساتىن Skyway تۋروپەراتورىنىڭ جەتەكشىسى اسەم قوزباعاروۆا دا تۋريستەردىڭ ەكى قالانى ءبىر ساپار اياسىندا ارالاۋدى قولعا العانىن راستادى.
ونىڭ ايتۋىنشا، ساياحاتشىلار الماتىعا ۇشىپ كەلىپ، ودان ءارى ورتالىق ازيا نەمەسە كاۆكاز ەلدەرىنە جول تارتا الادى. كەيىن قازاقستانعا استانا ارقىلى قايتا ورالۋىنا دا مۇمكىندىك بار.
جاڭا اۋەجاي جانە حالىقارالىق رەيتينگ
ساراپشى ءتۋريزمدى دامىتۋدا اۋە قاتىناسىنىڭ ماڭىزى زور ەكەنىن دە اتاپ ءوتتى. ونىڭ پىكىرىنشە، جاڭا اۋەجايدىڭ سالىنۋى، اۋە كومپانيالارىنىڭ قاتارى مەن رەيستەر سانىنىڭ ارتۋى قازاقستانعا كەلەتىن شەتەلدىك تۋريستەر سانىن كوبەيتۋگە مۇمكىندىك بەرەدى.
سونداي-اق استانانىڭ حالىقارالىق Lonely Planet ساياحاتشىلارعا ارنالعان باسىلىمىنىڭ ۇسىنىستار تىزىمىنە ەنۋىنە قاتىستى اسەم قوزباعاروۆا مۇنداي جاريالانىمدار قالانىڭ تانىمالدىلىعىن ارتتىراتىنىن، الايدا ونىڭ ناتيجەسى بىردەن بايقالمايتىنىن ايتتى.
- بۇل قالا ءۇشىن قوسىمشا جارناما. سونىڭ ارقاسىندا الەمنىڭ باسقا ەلدەرىندەگى ادامدار قازاقستان مەن ونىڭ استاناسى تۋرالى بىلە باستايدى. ءبىراق ماقالا بۇگىن جاريالاندى ەكەن دەپ، ەرتەڭ تۋريستەر اعىلىپ كەلەدى دەۋگە بولمايدى. مۇنداي قىزىعۋشىلىقتىڭ قالىپتاسۋىنا جىلدار قاجەت بولۋى مۇمكىن. ادامدار بىرتىندەپ قالا تۋرالى اقپارات جيناپ، وعان دەگەن قىزىعۋشىلىعى ارتادى. ءسويتىپ، ءبىر-ەكى جىلدان كەيىن ساياحاتىن جوسپارلاۋى مۇمكىن،- دەپ ءتۇسىندىردى ول.
ايتا كەتەيىك، euronews الماتىداعى تۋريزم تۋرالى ءۇش تىلدە ماقالا جاريالاعان ەدى.
