قازاقستان مەن تۇركيا جۇك تاسىمالىنا ەلەكتروندى رۇقسات بەرۋ جۇيەسىن ەنگىزدى
استانا. KAZINFORM - قازاقستان مەن تۇركيا ترانزيتتىك جۇك تاسىمالىنا ارنالعان ەلەكتروندى رۇقسات قۇجاتتارىن قولدانىسقا ەنگىزدى.
بۇل تۋرالى استانادا ءوتىپ جاتقان New Silk Way حالىقارالىق فورۋمىندا تۇركيانىڭ كولىك جانە ينفراقۇرىلىم ءمينيسترىنىڭ ورىنباسارى وسمان بويراز ايتتى.
ونىڭ ايتۋىنشا، تۇركيا حالىقارالىق اۆتوموبيل تاسىمالىن تسيفرلاندىرۋعا ەرەكشە كوڭىل ءبولىپ وتىر. وسى باعىتتا وزبەكستانمەن بىرلەسىپ ىسكە قوسىلعان ەلەكتروندى رۇقسات بەرۋ جۇيەسىن باسقا ەلدەرگە دە كەڭەيتىپ جاتىر.
- قازاقستانمەن وسى سالاداعى ىنتىماقتاستىعىمىزدىڭ ناتيجەسىندە ترانزيتتىك تاسىمالعا ارنالعان ەلەكتروندى رۇقسات قۇجاتتارى تاسىمالداۋشىلارعا قولجەتىمدى بولدى. بۇل قۇجاتتاردى الۋدى جەڭىلدەتىپ، اكىمشىلىك راسىمدەردى جىلدام جۇرگىزۋگە جانە ولاردىڭ ورىندالۋىن باقىلاۋعا مۇمكىندىك بەرەدى، - دەدى وسمان بويراز.
تۇركيا وكىلى ورتا ءدالىز ارقىلى جۇك تاسىمالداۋدى دامىتۋدا سيفرلىق تەحنولوگيالاردىڭ ماڭىزى ارتىپ كەلە جاتقانىن ايتتى. ونىڭ سوزىنشە، جۇكتىڭ قاي جەردە ەكەنىن باقىلاۋ، تاسىمال كەزىندەگى كىدىرىستەردىڭ كەيىنگى كەزەڭدەرگە اسەرىن انىقتاۋ جانە دەر كەزىندە شەشىم قابىلداۋ حالىقارالىق ساۋدانىڭ سەنىمدىلىگى ءۇشىن ماڭىزدى.
- ءبىزدىڭ ماقساتىمىز - جۇك قوزعالىسى تۋرالى اقپارات تاسىمالدىڭ بارلىق كەزەڭىندە قولجەتىمدى بولاتىن، كولىكتىڭ ءبىر تۇرىنەن ەكىنشىسىنە اۋىسۋ جەڭىلدەيتىن جانە لوگيستيكالىق ۇدەرىستەردى الدىن الا جوسپارلاۋعا مۇمكىندىك بەرەتىن جۇيە قۇرۋ، - دەدى ول.
ونىڭ ايتۋىنشا، ورتا دالىزدەگى سيفرلىق ىنتىماقتاستىقتى دامىتۋ ءۇشىن ەلدەردىڭ قولدانىستاعى اقپاراتتىق جۇيەلەرىن ورتاق ستاندارتتار نەگىزىندە بايلانىستىرۋ قاجەت. بۇل رەتتە قانداي مالىمەتتى كىم جانە قانداي وكىلەتتىكپەن بولىسەتىنى الدىن الا كەلىسىلۋى ءتيىس.
تۇركيا تاراپى وسى باعىتتاعى جۇمىستى ناقتى ءبىر تاسىمال باعىتى بويىنشا باستاپ، اقپارات الماسۋ ءتارتىبىن، دەرەكتەرگە قول جەتكىزۋ قۇقىعىن جانە جاۋاپتى مەكەمەلەردىڭ مىندەتتەرىن بىرلەسىپ ايقىنداۋدى ۇسىنىپ وتىر.
- ءبىزدىڭ ماقساتىمىز - بۇكىل ءدالىز بويىندا تۇراقتى ءارى سەنىمدى جۇمىس ىستەيتىن ورتاق سيفرلىق قىزمەت قالىپتاستىرۋ. تۇركيا بۇل باعىتتا وڭىردەگى سەرىكتەستەرىمەن بىرلەسىپ جۇمىس ىستەۋگە دايىن، - دەدى وسمان بويراز.
ايتا كەتەيىك، بۇعان دەيىن چەحيانىڭ كولىك ءمينيسترى «سيفرلىق جىبەك جولىن» دامىتۋدىڭ ءۇش باسىم باعىتىن اتاعان ەدى.
