قازاقستان مەن سينگاپۋر اۋە قاتىناسىن كەڭەيتىپ، جۇك تاسىمالىن ارتتىرماق

قازاقستاننىڭ اۆياتسيالىق اكىمشىلىگى (ق ا ءا) مەن سينگاپۋردىڭ ازاماتتىق اۆياتسيا باسقارماسى (CAAS) نيەت تۋرالى مالىمدەمەگە قول قويدى. قۇجاتقا ق ا ءا باس اتقارۋشى ديرەكتورى مايكل دەنيەل مەن CAAS باس ديرەكتورى حان كوك حۋان قول قويعان.

ەكى ەل ورتالىق ازيا مەن وڭتۇستىك-شىعىس ازياداعى ماڭىزدى اۆياتسيالىق حابتار سانالادى. سوڭعى جىلدارى قازاقستان مەن سينگاپۋر اراسىنداعى اۋە قاتىناسى ايتارلىقتاي دامىعان.

جاڭا كەلىسىم اياسىندا تاراپتار ۇشۋ قاۋىپسىزدىگى، اۆياتسيالىق قاۋىپسىزدىك، سالانىڭ ورنىقتى دامۋى، يننوۆاتسيالار مەن جاڭا تەحنولوگيالاردى ەنگىزۋ باعىتتارىندا ىنتىماقتاستىق ورناتۋدى كوزدەپ وتىر.

سونداي-اق اۆياتسيالىق ينسپەكتورلاردى دايارلاۋ، مامانداردىڭ كاسىبي بىلىكتىلىگىن ارتتىرۋ جانە تاجىريبە الماسۋ جۇمىستارىنا باسىمدىق بەرىلەدى.

- CAAS- پەن ىنتىماقتاستىقتى نىعايتۋ - اۆياتسيا ماماندارىمىزدىڭ كاسىبي قۇزىرەتتەرىن ودان ءارى ارتتىرۋ جولىنداعى ماڭىزدى قادام. ءبىز تاۋەكەلگە باعدارلانعان قاداعالاۋ، ۇشۋ قاۋىپسىزدىگى مەن اۆياتسيالىق قاۋىپسىزدىك، سونداي-اق ينسپەكتورلاردى دايارلاۋ سالالارىندا تاجىريبە جانە وزىق پراكتيكالارمەن الماسۋدىڭ ماڭىزدىلىعىن جوعارى باعالايمىز، - دەدى ق ا ءا باس اتقارۋشى ديرەكتورى مايكل دەنيەل.

ونىڭ ايتۋىنشا، قازاقستان مامانداندىرىلعان وقىتۋ مەن كاسىبي دامۋ مۇمكىندىكتەرىن كەڭەيتىپ، قاۋىپسىز ءارى ءتيىمدى ازاماتتىق اۆياتسيا جۇيەسىن قالىپتاستىرۋعا مۇددەلى.

بۇل قۇجات 2024-جىلى جاسالعان وقىتۋ سالاسىنداعى ىنتىماقتاستىق تۋرالى كەلىسىمنىڭ اياسىن كەڭەيتەدى. بۇعان دەيىن ەكى ەلدىڭ ارىپتەستىگى نەگىزىنەن قازاقستاندا اۆياتسيالىق دايارلاۋ باعدارلامالارىن ىسكە اسىرۋمەن شەكتەلگەن.

تاراپتار 2027-جىلدىڭ ءبىرىنشى جارتىسىندا جاڭا ءوزارا تۇسىنىستىك تۋرالى مەموراندۋمعا قول قويۋدى جوسپارلاپ وتىر. قۇجات CAAS دەلەگاتسياسىنىڭ قازاقستانعا ساپارى كەزىندە راسىمدەلۋى مۇمكىن.

جاڭا مەموراندۋم اياسىندا ەكى ەلدىڭ اۆياتسيالىق ۆەدومستۆولارى باسشىلارىنىڭ جىل سايىنعى كەزدەسۋلەرىن وتكىزۋ كوزدەلگەن. ولار قازاقستان مەن سينگاپۋردا كەزەكپەن ۇيىمداستىرىلادى.

- نيەت تۋرالى مالىمدەمەگە قول قويۋ ازاماتتىق اۆياتسيا سالاسىنداعى ەكى ورگاننىڭ تەحنيكالىق ىنتىماقتاستىقتى تەرەڭدەتۋگە، ەلدەرىمىز بەن وڭىرلەرىمىز اراسىنداعى بايلانىستى نىعايتۋعا، ماماندار اراسىنداعى ءوزارا ءىس-قيمىل مەن ىسكەرلىك بايلانىستاردى جانداندىرۋعا جانە جاڭا ەكونوميكالىق مۇمكىندىكتەر اشۋعا دەگەن ورتاق ۇستانىمىن كورسەتەدى، - دەدى CAAS باس ديرەكتورى حان كوك حۋان.

ونىڭ سوزىنشە، جىل سايىنعى رەسمي كەزدەسۋلەر ەكى ەلدىڭ اۆياتسيا سالاسىنداعى ارىپتەستىگىن تۇراقتى نەگىزدە دامىتۋعا مۇمكىندىك بەرەدى.

ايتا كەتەيىك، بۇعان دەيىن سينگاپۋرلىق Changi Airport Group كومپانياسى استانانى وڭىرلىك اۆياتسيالىق حابقا اينالدىرۋعا اتسالىسۋعا دايىن ەكەنىن مالىمدەگەن ەدى. كومپانيا قازاقستانداعى اۋەجاي ينفراقۇرىلىمىن دامىتۋعا ءوز تاجىريبەسى مەن تەحنولوگيالارىن ۇسىنۋعا مۇددەلى.