قازاقستان سپورتشىلارى 5- ازيا پارا ويىندارىنا اتتاندى
استانا. KAZINFORM - استانادا قازاقستان ۇلتتىق قۇراماسىن V ازيا پارا ويىندارىنا شىعارىپ سالۋ ءراسىمى ءوتتى. بايراقتى باسەكە 18- 24-قازان ارالىعىندا جاپونيانىڭ ايچي پرەفەكتۋراسى مەن ناگويا قالاسىندا وتەدى. قۇرلىقتىق دوداعا ەلىمىزدەن 150 سپورتشى قاتىسادى. ولار سپورتتىڭ 12 تۇرىنەن باق سىنايدى.
ساناۋلى كۇننەن سوڭ باعى مەن بابى سىنعا تۇسەتىن سپورتشىلاردىڭ بويىنان جىگەر مەن جەڭىسكە دەگەن سەنىم بايقالادى. اسىرەسە، تۋ ۇستاۋشىلىردىڭ تولقىنىسى ايرىقشا كوزگە تۇسەدى. ويتكەنى ارتىلعان جاۋاپكەرشىلىك جۇگى ەسەلەندى.
بۇل جولى ازيا ويىندارىنىڭ اشىلۋ راسىمىندە كوك بايراعىمىزدى پاريج پاراليمپياداسىنىڭ قولا جۇلدەگەرى، پارا جەڭىل اتلەتيكادان الەم چەمپيونى داستان مۇقاشبەكوۆ پەن پارا دزيۋدودان الەم چەمپيونى مەرەكە ايالا ۇستاپ شىعاتىن بولدى.
- قازاقستاننىڭ تۋىن الىپ شىعۋ - مەن ءۇشىن ۇلكەن مارتەبە. جاپونيادا كوك تۋىمىزدى بيىككە كوتەرەمىز دەپ سەنەمىن. دايىندىعىمىز جوعارى دەڭگەيدە. ازيانىڭ ىشىندە ءبىرىنشى ورىن الامىن دەپ ويلايمىن، - دەدى پارا دزيۋدودان الەم چەمپيونى ايالا مەرەكە.
كۇنشىعىس ەلىندە وتەتىن دوداعا 45 ەلدەن 4 مىڭعا جۋىق سپورتشى قاتىسادى. ولار سپورتتىڭ 18 تۇرىنەن 502 مەدال جيىنتىعىن ساراپقا سالادى. قازاقستان اتىنان 150 سپورتشى 12 سپورت تۇرىنەن باق سىنايدى. ونىڭ بىرەۋى كوماندالىق، 11 ى جەكەلەي سپورت ءتۇرى.
بيىلعى ويىنداردا ەل قۇراماسى ارباداعى تەننيستەن العاش رەت باق سىنايدى. ءارى، پارا جەڭىل اتلەتيكادان زياتكەرلىك دامۋ ەرەكشەلىكتەرى بار سپورتشىلار دا قۇرلىقتىق سايىسقا ءبىرىنشى رەت قاتىسادى.
- سوڭعى ءتورت جىلدا سپورتشىلارىمىز ءىرى حالىقارالىق جارىستاردا جاقسى ناتيجە كورسەتىپ كەلەدى. جاقىندا پاراۆولەيبولدان ۇلتتىق قۇرامامىز الەم چەمپيوناتىندا قولا مەدال جەڭىپ الدى. پارا ءجۇزۋ مەن پارا دزيۋدودان دا جۇلدەلەرىمىز بار. ازيا ويىندارىندا دا بىرنەشە سپورت تۇرىنەن جوعارى ناتيجە كورسەتەمىز دەپ سەنەمىز، - دەدى ق ر تۋريزم جانە سپورت ءمينيسترى ەربول مىرزابوسىنوۆ.
V ازيا پارا ويىندارىنىڭ العاشقى جارىستارى 16-قازاندا پارا ۇستەل تەننيسىنەن باستالادى.
ايتا كەتەيىك، ەلىمىز ازيا پارا ويىندارىنا 2010 -جىلدان بەرى قاتىسىپ كەلەدى. وسى ۋاقىت ارالىعىندا وتانداستارىمىز 20 التىن، 35 كۇمىس جانە 50 قولا مەدال جەڭىپ الدى. ەڭ ۇزدىك ناتيجە 2023 -جىلى قىتايدىڭ حاڭجوۋ قالاسىندا وتكەن باسەكەدە تىركەلدى. ول كەزدە 131 سپورتشىمىز 41 مەدال يەلەندى. قورجىنعا تۇسكەن التىن سانى 8، كۇمىس 12، قولا 21.
ەسكە سالايىق، جاقىندا 2032 -جىلعى وليمپيادا جانە پاراليمپيادا ويىندارىنىڭ رەسمي ەمبلەماسى تانىستىرىلدى.
