قازاقستان ەۋرازيانىڭ ترانزيتتىك حابىنا اينالىپ كەلەدى
استانا. قازاقپارات - The World Financial Review باسىلىمى قازاقستان تۋرالى جاڭا ماتەريالىندا ەلدىڭ ەۋرازياداعى ءىرى ەكونوميكالىق ورتالىقتاردىڭ اراسىنداعى ورنالاسۋى كولىك ينفراقۇرىلىمىنىڭ دامۋى مەن سىرتقى ساۋدا بايلانىستارىنىڭ كەڭەيۋى جاعدايىندا بارعان سايىن ماڭىزدى مانگە يە بولىپ كەلە جاتقانىن جازادى.
سوڭعى جەتى جىلدا ەلدە 36300 شاقىرىم اۆتوموبيل جولى سالىنىپ، جوندەۋدەن ءوتتى. سونىمەن قاتار شامامەن 5000 شاقىرىم تەمىرجول جەلىسى سالىنىپ، جاڭعىرتىلدى. بۇدان بولەك، 110 تەمىرجول ستانساسىندا قۇرىلىس-مونتاج جۇمىستارى اياقتالدى.
كولىك جەلىسىن دامىتۋ قازاقستاننىڭ ترانزيتتىك-لوگيستيكالىق حاب رەتىندەگى ءرولىن نىعايتادى. حالىقارالىق كومپانيالار ءۇشىن بۇل تاراتۋ ورتالىقتارىن ورنالاستىرۋعا، وڭىرلىك جەتكىزىلىمدەردى ۇيىمداستىرۋعا جانە قازاقستاندىق ءوندىرىستى حالىقارالىق قۇن تىزبەگىنە ينتەگراتسيالاۋعا جاعداي جاسايدى.
ينفراقۇرىلىمداعى وزگەرىستەر سىرتقى ەكونوميكالىق قىزمەتتىڭ كەڭەيۋىمەن قاتار جۇرۋدە. 2025-جىلى قازاقستاننىڭ تاۋارلار مەن كورسەتىلەتىن قىزمەتتەر بويىنشا سىرتقى ساۋدا اينالىمى $170 ميللياردتان اسىپ، بەس جىل ىشىندە %40,5 عا ءوستى.
كولىك بايلانىسى حالىقارالىق ينۆەستيتسيالىق ىنتىماقتاستىق باعىتتارىنىڭ بىرىنە اينالۋدا. 2026-جىلى قازاقستان مەن ە ق د ب 2030-جىلعا دەيىن ەسەپتەلگەن جاڭا بەس جىلدىق كەلىسىمگە قول قويدى. ول جەكە سەكتوردى، تۇراقتى ينفراقۇرىلىمدى، سيفرلاندىرۋدى، قارجى نارىعىن دامىتۋ جانە قازاقستاننىڭ وڭىرلىك ساۋدا-لوگيستيكالىق حاب رەتىندەگى ءرولىن نىعايتۋ بويىنشا بىرلەسكەن جۇمىستى كوزدەيدى.
دامىپ كەلە جاتقان كولىك ينفراقۇرىلىمى مەن ءوسىپ كەلە جاتقان ساۋدا اعىندارىنىڭ ۇيلەسىمى لوگيستيكا، قويما، كولىك قىزمەتتەرى جانە ەكسپورتقا باعىتتالعان ءوندىرىس سالاسىندا مۇمكىندىكتەر اشادى.
