قازاقستان مەن گەرمانيا تەحنيكالىق جانە كاسىپتىك ءبىلىم بەرۋ سالاسىنداعى ىنتىماقتاستىقتى كەڭەيتەدى

قۇجات قازاقستان پرەزيدەنتى قاسىم-جومارت كەمەل ۇلى توقايەۆتىڭ گەرمانياعا رەسمي ساپارى بارىسىندا ەكى ەل مينيسترلەرىنىڭ كەزدەسۋى قورىتىندىسى بويىنشا قابىلداندى.

قازاقستاننىڭ وقۋ-اعارتۋ ءمينيسترى جۇلدىز سۇلەيمەنوۆا گەرمانيانىڭ ءبىلىم، وتباسى، قارتتار، ايەلدەر جانە جاستار ىستەرى جونىندەگى فەدەرالدىق ءمينيسترى كارين پرينمەن ىنتىماقتاستىقتىڭ كەلەشەگىن تالقىلادى.

كاسىپتىك ءبىلىم بەرۋدى دامىتۋ پرەزيدەنتتىڭ قازاقستان-گەرمانيا بيزنەس- فورۋمىندا سويلەگەن ءسوزىنىڭ نەگىزگى تاقىرىپتارىنىڭ ءبىرى بولدى. مەملەكەت باسشىسى گەرمانيانىڭ دۋالدى ءبىلىم بەرۋ جۇيەسىن جوعارى باعالاپ، ءىرى ينۆەستيتسيالىق جوبالاردى ىسكە اسىرۋمەن تىكەلەي بايلانىستى قازاقستان-گەرمانيا ونەركاسىپتىك قۇزىرەتتەر ورتالىقتارىنىڭ جەلىسىن قۇرۋدى ۇسىندى.

كەزدەسۋدە مينيسترلەر دۋالدى وقىتۋدى دامىتۋ، پەداگوگتەر مەن ستۋدەنتتەرگە تاعىلىمداما ۇيىمداستىرۋ جانە ەكى ەل كوللەدجدەرى اراسىندا تاجىريبە الماسۋ ماسەلەلەرىن تالقىلادى. ماماندار دايارلاۋ ەڭبەك نارىعىنىڭ قاجەتتىلىكتەرىنە ساي بولۋى ءۇشىن جۇمىس بەرۋشىلەرمەن ءوزارا ءىس-قيمىلدى نىعايتۋعا ەرەكشە ءمان بەرىلدى.

ارىپتەستىكتىڭ ناقتى تاجىريبەسى بار. الماتى قۇرىلىس-تەحنيكالىق كوللەدجى كوپتەگەن جىلدار بويى GROHe، KNAUF جانە BOSCH كومپانيالارىمەن ىنتىماقتاستىق ورناتىپ كەلەدى. كوللەدج بازاسىندا زاماناۋي قۇزىرەتتەر ورتالىقتارى جۇمىس ىستەيدى. KNAUF كومپانياسىمەن 20 جىلدان استام ۋاقىتقا سوزىلعان ىنتىماقتاستىق اياسىندا ەكى مىڭنان استام ستۋدەنت ءبىلىم الدى.

كەزدەسۋدە كاسىپتىك ءبىلىم بەرۋدى سيفرلاندىرۋ جانە جاساندى ينتەللەكتىنى قولدانۋ ماسەلەلەرى دە تالقىلاندى.

قول قويىلعان دەكلاراتسيا بىرلەسكەن جوبالاردى كەڭەيتۋگە، كوللەدج ستۋدەنتتەرى مەن پەداگوگتەرىنىڭ كاسىبي دامۋىنا جاڭا مۇمكىندىكتەر اشۋعا نەگىز بولادى.

ايتا كەتەيىك، وسىعان دەيىن قازاقستان مەن گەرمانيا 2 ميلليارد دوللارلىق 30 دان استام قۇجاتقا قول قويعانى تۋرالى جازدىق.