قازاقستان ۋرانى كىمگە تيەسىلى جانە مەملەكەت قانشا تابىس تابادى؟
استانا.قازاقپارات - قازاقستان - الەمدەگى ۋران ءوندىرۋشى جەتەكشى ەلدەردىڭ ءبىرى. ەلدەگى ۋران ءوندىرىسىنىڭ نەگىزگى بولىگى «قازاتومونەركاسىپ» ۇلتتىق كومپانياسى ارقىلى جۇزەگە اسادى.
دەگەنمەن، كەيبىر كەنىشتەردە رەسەي، قىتاي، فرانتسيا جانە كانادا كومپانيالارىنىڭ دا ۇلەسى بار.
2025-جىلعى نەگىزگى كورسەتكىشتەر:
ۋران ءوندىرىسى: قازاقستاندا 25,8 مىڭ توننا ۋران ءوندىرىلدى. ونىڭ 13,5 مىڭ تونناسى «قازاتومونەركاسىپتىڭ» ۇلەسىنە تيەسىلى بولدى.
ەكسپورت: قازاقستان 21,36 مىڭ توننا ۋران ءونىمىن ەكسپورتتاپ، 2,98 ميلليارد ا ق ش دوللارى كولەمىندە تابىس تاپتى.
مەملەكەتكە تۇسكەن تولەم: «قازاتومونەركاسىپ» توبى مەن ۋران ءوندىرۋشى كاسىپورىندار بيۋدجەتكە 444,1 ميلليارد تەڭگە تولەدى.
سالىقتار: ونىڭ 277,5 ميلليارد تەڭگەسى كورپوراتيۆتىك تابىس سالىعى، 150,5 ميلليارد تەڭگەسى پايدالى قازبالاردى ءوندىرۋ سالىعى بولدى.
كومپانيانىڭ پايداسى: «قازاتومونەركاسىپ» ۇلەسى بار بىرلەسكەن جانە قاۋىمداسقان كاسىپورىنداردىڭ تابىسى دا قوماقتى. 2025 -جىلى كومپانيا قاۋىمداسقان كاسىپورىنداردان 112,7 ميلليارد تەڭگە ديۆيدەند الدى.
ۋران كەنىشتەرىندەگى شەتەلدىك كومپانيالاردىڭ ۇلەسى
قازاقستانداعى بارلىق ۋران كەنىشى تولىقتاي مەملەكەتكە تيەسىلى ەمەس. مىسالى، Inkai جوباسىندا «قازاتومونەركاسىپتىڭ» ۇلەسى %60، كانادالىق Cameco كومپانياسىنىڭ ۇلەسى %40. ال KATCO جوباسىندا قازاقستاندىق كومپانيانىڭ ۇلەسى %49، فرانتسۋزدىق Orano كومپانياسىنىڭ ۇلەسى %51.
سونىمەن قاتار، رەسەيدىڭ «روساتوم» توبى Uranium One ارقىلى ءبىرقاتار كەنىشتەرگە قاتىسادى. ماسەلەن، Karatau جانە Akbastau جوبالارىنداعى ۇلەسى %50 دان، ال SMCC كاسىپورنىنداعى ۇلەسى %70 دان تۇرادى.
قورىتىندى: قازاقستان ۋران وندىرۋدەن جانە ەكسپورتتاۋدان ميللياردتاعان دوللار تابىس تابادى. 2025 -جىلى ۋران ءوندىرۋشى كاسىپورىندار مەملەكەتكە 444,1 ميلليارد تەڭگە تولەدى. ءبىراق بۇل سوما ەكسپورتتان تۇسكەن جالپى تابىس ەمەس، سالىقتار مەن باسقا دا مىندەتتى تولەمدەردىڭ جيىنتىعى. ال ەكسپورتتىق كىرىستىڭ بارلىعى بيۋدجەتكە تۇسپەيدى: ول كومپانيالاردىڭ شىعىندارىنا، ينۆەستيتسيالارىنا جانە سەرىكتەستەر اراسىندا بولىنەدى.
