قازاقستان مەن قىتايدىڭ ەنەرگەتيكاداعى ىنتىماقتاستىعى: بىرلەسكەن جوبالار قانداي ناتيجە بەرەدى

ەلوردادا ءوتىپ جاتقان ەكى كۇندىك ءىس-شارا اياسىندا جاسىل ەنەرگەتيكا جابدىقتارىنا سەرۆيستىك قىزمەت كورسەتۋ ورتالىعىنىڭ تانىستىرىلىمى ءوتتى. بۇل كەشەن ق ح ر- نىڭ سينداو قالاسىندا «قىتاي – ش ى ۇ» ساۋدا-ەكونوميكالىق ينستيتۋتى جانىنان اشىلدى. ول ەلەكتر ستانسيالارىنىڭ ەنەرگيا تيىمدىلىگىن ارتتىرۋ جانە ەنەرگيا تۇتىنۋ كولەمىن قىسقارتۋ ءۇشىن قازاقستان مەن ورتالىق ازيانىڭ باسقا دا ەلدەرىندەگى ەلەكتر ستانسيالارىنا كەشەندى جاڭعىرتۋ قىزمەتتەرىن كورسەتپەك.

ورتالىق قىزمەتىنە China Service Technology (Shandong) Co. Ltd. كومپانياسى جەتەكشىلىك ەتەدى، ال ونىڭ قازاقستانداعى وكىلى رەتىندە CSTC Kazakhstan كومپانياسى جۇمىس ىستەيدى.

جاڭا ورتالىقتىڭ قازاقستان ءۇشىن ماڭىزى قانداي

فورۋمدا جاڭا كەشەننىڭ تيىمدىلىگى جونىندە ق ر ەنەرگەتيكا مينيسترلىگى ەلەكتر ەنەرگەتيكاسى سالاسىن دامىتۋ دەپارتامەنتى قۇرامىنداعى ءبولىم باسشىسى سۇلتان اسىلقانوۆ مالىمدەمە جاسادى. الدىمەن ول ەكى ەلدىڭ اراسىنداعى بايلانىسىنا جانە قازاقستاننىڭ الداعى ماقساتتارىنا توقتالدى.

- قازاقستان مەن قىتايدى جان-جاقتى ءارى بەرىك ستراتەگيالىق ارىپتەستىك بايلانىستىرادى. ەكىجاقتى ىنتىماقتاستىعىمىزدا، اسىرەسە، ەنەرگەتيكا سالاسى ماڭىزدى ورىن الادى. بۇگىندە ەنەرگەتيكالىق جوبالاردى دامىتۋمەن قاتار، تەحنولوگيالىق ءوزارا ءىس-قيمىلعا، جابدىقتاردىڭ سەنىمدىلىگىن ارتتىرۋعا جانە ولارعا تەحنيكالىق قىزمەت كورسەتۋدى جەتىلدىرۋگە ەرەكشە ءمان بەرىلۋدە. قازاقستاننىڭ ەنەرگەتيكا سالاسىنىڭ الدىندا قولدانىستاعى قۋاتتاردى جاڭعىرتۋ، ەلەكتر ەنەرگياسىن ءوندىرۋ تيىمدىلىگىن ارتتىرۋ جانە ەنەرگەتيكالىق ينفراقۇرىلىمنىڭ تۇراقتى جۇمىسىن قامتاماسىز ەتۋ مىندەتتەرى تۇر. وسىعان بايلانىستى زاماناۋي تەحنيكالىق شەشىمدەرگە، ساپالى سەرۆيستىك سۇيەمەلدەۋگە جانە جابدىقتاردىڭ بۇكىل قىزمەت ەتۋ مەرزىمى بويى قوسالقى بولشەكتەردىڭ قولجەتىمدى بولۋىنا سۇرانىس ارتىپ وتىر، - دەدى سۇلتان اسىلقانوۆ.

سونىمەن قاتار، ونىڭ سوزىنشە، اشىلعان ورتالىق قازاقستاندىق جانە قىتايلىق كاسىپورىندار اراسىنداعى ىنتىماقتاستىقتى دامىتۋدىڭ ناقتى مۇمكىندىگى بولماق. ناقتىراق ايتقاندا، سەرۆيستىك قىزمەتتەردى قازاقستاندا كورسەتۋگە كوشۋ، تەحنيكالىق تاجىريبە الماسۋ، جەرگىلىكتى مامانداردى دايارلاۋ جانە ەلىمىزدەگى كاسىبي قۇزىرەتتەردى دامىتۋ ءتارىزدى ماسەلەلەرگە باسا ءمان بەرىلمەك.

ال «سامۇرىق-ەنەرگو» ا ق ءوندىرىس جونىندەگى باسقارۋشى ديرەكتورى عالىمبەك ءاۋتالىپوۆ بۇگىندە قازاقستاننىڭ ەنەرگەتيكا سالاسىندا اۋقىمدى مىندەتتەر ورىندالىپ جاتقانىن اتاپ ءوتتى. ونىڭ مالىمدەۋىنشە، ءوسىپ كەلە جاتقان ەكونوميكانى سەنىمدى ەنەرگيامەن قامتاماسىز ەتۋ، گەنەراتسيالايتىن قۋاتتاردى جاڭارتۋ، ولاردىڭ تيىمدىلىگىن ارتتىرۋ جانە نەعۇرلىم تازا ەنەرگەتيكاعا كەزەڭ- كەزەڭىمەن كوشۋ قاجەت. ال مۇنداي جاعدايدا جابدىقتارعا ولاردىڭ بۇكىل قىزمەت ەتۋ مەرزىمى بويى سەنىمدى تەحنيكالىق قىزمەت كورسەتۋدىڭ ماڭىزى ەرەكشە ارتادى.

- قازاقستاندا ەنەرگەتيكالىق جابدىقتاردى جەتەكشى وندىرۋشىلەردىڭ قۇزىرەتتەرىن بىرىكتىرەتىن ورتالىقتىڭ اشىلۋى - سالالىق ىنتىماقتاستىقتى دامىتۋداعى ماڭىزدى قادام. ەلىمىزدە سەرۆيستىك مۇمكىندىكتەردى دامىتۋ، كادرلار دايارلاۋ جانە تاجىريبە الماسۋ بۇكىل ەنەرگەتيكا سالاسىنا وڭ اسەرىن تيگىزەدى. قىتاي حالىق رەسپۋبليكاسى - ءبىزدىڭ بۇرىننان كەلە جاتقان سەنىمدى سەرىكتەسىمىز. ال ەنەرگەتيكا ەكى ەل اراسىنداعى ىنتىماقتاستىقتىڭ نەگىزگى باعىتتارىنىڭ ءبىرى بولىپ قالا بەرەدى، - دەدى عالىمبەك اۋتالىپوۆ.

قىتاي تاراپى قانداي ۇستانىمدا

جوعارىدا جاسىل ەنەرگەتيكا جابدىقتارىنا سەرۆيستىك قىزمەت كورسەتۋ ورتالىعى سينداو قالاسىنداعى «قىتاي – ش ى ۇ» ساۋدا-ەكونوميكالىق ينستيتۋتىنى جانىنان اشىلعانىن جازدىق. جيىنعا اتالعان وقۋ ورنىنىڭ ديرەكتورى جەن شي دە قاتىستى. ول بايانداماسىندا ەكى ەل اراسىنداعى كوپ جىلدان بەرى جالعاسىپ كەلە جاتقان جاقسى قارىم-قاتىناس جونىندە ءسوز قوزعادى.

- ءدال وسى قازاقستاندا 2013-جىلعى قىركۇيەكتە قىتاي حالىق رەسپۋبليكاسىنىڭ ءتوراعاسى شي جينپيڭ جىبەك جولىنىڭ ەكونوميكالىق بەلدەۋىن قۇرۋ باستاماسىن العاش رەت كوتەردى. سوندىقتان قازاقستانمەن ىنتىماقتاستىق ءبىز ءۇشىن ەرەكشە ماڭىزعا يە. ەنەرگەتيكا سالاسىندا ءبىزدىڭ ەلدەرىمىزدىڭ ءوزارا ءىس-قيمىل جاساۋىنا بەرىك نەگىز جانە ءبىرىن-ءبىرى تولىقتىراتىن مۇمكىندىكتەر بار. ءبىزدىڭ ورتاق مىندەتىمىز - وسى الەۋەتتى كاسىپورىنداردىڭ قاجەتتىلىكتەرىن وتەيتىن جانە ەكى ەلدىڭ ەنەرگەتيكا سالاسىنىڭ دامۋىنا ىقپال ەتەتىن ناقتى جوبالارعا اينالدىرۋ، - دەدى جەن شي.

ونىڭ سوزىنشە، جاڭادان اشىلعان ورتالىق سالاداعى ناقتى ماسەلەلەردى شەشۋمەن اينالىسادى. اتاپ ايتقاندا، جاسىل ەنەرگەتيكاداعى سەرىكتەستىك، قۇرىلعىلار مەن تەحنولوگيالاردى الماسۋ، قاجەتتىلىككە بايلانىستى ماماندار دايارلاۋ ءتارىزدى شارۋالار اتقارىلادى.

ءسوزىمىزدى تۇيىندەر بولساق، جاسىل ەنەرگەتيكا جابدىقتارىنا سەرۆيستىك قىزمەت كورسەتۋ ورتالىعى قازاقستانداعى جانە ەلەكتر ستانتسيالارى مەن ەنەرگەتيكالىق كاسىپورىندارعا قىزمەت كورسەتەدى. سونىمەن قاتار، وتاندىق ماماندار اتالعان ورتالىقتا تاعىلىمدامادان ءوتىپ، بىلىكتىلىگىن ارتتىرادى.

ايتا كەتەيىك، بۇعان دەيىن قازاقستان مەن قىتاي «قورعاس» ورتالىعىنداعى قاۋىپسىزدىكتى كۇشەيتەتىنىن جازعانبىز.