قازاقستان قىتايمەن ءۇشىنشى تەمىرجول وتكەلىن اشپاق: جاڭا باعىت جىلىنا 20 ميلليون توننا جۇك وتكىزەدى
استانا. KAZINFORM - قازاقستان مەن قىتاي اراسىنداعى ءۇشىنشى تەمىرجول شەكارا وتكەلىن اشاتىن باقتى - اياگوز جەلىسىنىڭ قۇرىلىسى 93 پايىزعا اياقتالدى. ۇزىندىعى 303 شاقىرىم بولاتىن جاڭا باعىتتى 2027 -جىلى ىسكە قوسۋ جوسپارلانعان. جوبا جىلىنا 20 ميلليون تونناعا دەيىن جۇك تاسىمالداۋعا مۇمكىندىك بەرەدى. بۇل تۋرالى كولىك مينيسترلىگى ءمالىم ەتتى.
ۆەدومستۆونىڭ مالىمەتىنشە، ۇزىندىعى 303 شاقىرىمدى قۇرايتىن باقتى - اياگوز تەمىرجول جەلىسىنىڭ قۇرىلىسى بەكىتىلگەن كەستەگە سايكەس جالعاسۋدا. تەمىرجول جەلىسىندەگى جۇمىستاردى اياقتاپ، نىساندى پايدالانۋعا بەرۋ 2027 -جىلعا جوسپارلانعان.
بۇگىندە جوبا اياسىندا كوزدەلگەن 39,5 ميلليون تەكشە مەتر جەر توسەمىنىڭ 36,8 ميلليون تەكشە مەترى توسەلدى. بۇل جالپى كولەمنىڭ 93 پايىزىن قۇرايدى. قالعان جۇمىستاردىڭ نەگىزگى بولىگى شەكارا ماڭى ايماعىندا جانە باقتى ستانتسياسى اۋدانىندا شوعىرلانعان.
قازىرگى ۋاقىتتا جولدىڭ جوعارعى قاباتىن تەگىستەۋ جانە جولدىڭ جوعارعى قۇرىلىسىن توسەۋ الدىندا توپىراقتىڭ تىعىزدالۋ ساپاسىن تەكسەرۋ جۇمىستارى جۇرگىزىلۋدە. سونىمەن قاتار جاساندى قۇرىلىستار سالۋ جۇمىستارى جالعاسۋدا. اتاپ ايتقاندا، 267 سۋ وتكىزۋ قۇبىرىنىڭ 245 ى سالىندى، 19 مال وتكەلىنىڭ 12 سى دايىن. ال 47 كوپىردىڭ 43 ىندە قۇرىلىس جۇمىستارى جۇرگىزىلىپ جاتىر.
دايىنداۋ جانە جەتكىزۋ مەرزىمدەرىن قىسقارتۋ ماقساتىندا كوپىر ارقالىقتارى تىكەلەي قۇرىلىس الاڭىندا وندىرىلەدى. بۇل رەتتە ولاردى سەرتيفيكاتتاۋ جانە قۇرىلىس نورمالارى مەن قاعيدالارىنىڭ (ق ن ج ە) تالاپتارىنا سايكەس ساپاسىن باقىلاۋ جۇزەگە اسىرىلادى.
جولدىڭ جوعارعى قۇرىلىسىن سالۋعا قاجەتتى ماتەريالدار وتاندىق وندىرۋشىلەردەن ساتىپ الىنۋدا. رەلستەردى اقتوبە رەلس- ارقالىق زاۋىتى جەتكىزەدى. شپالدار مەن بەكىتكىشتەردى «RWS Binding»، «Innotrack» ،«Fasteners 2metall (بەنت)» ج ش س-لەرى جانە «ماگنەتيك» ج ش س قامتاماسىز ەتەدى.
باعىتتامالىق بۇرمالاردى «پرومماشكومپلەكت» ج ش س جەتكىزەدى. اياگوز ستانتسياسى اۋدانىندا قۇرىلىس ماتەريالدارىن قابىلداۋ جانە ءبولۋ جۇمىستارى ۇيىمداستىرىلعان.
جوبانى ىسكە اسىرۋ قازاقستاننىڭ كولىك- لوگيستيكالىق الەۋەتىن دامىتۋ جانە قىتايمەن تەمىرجول قاتىناسىن كەڭەيتۋ ءۇشىن ستراتەگيالىق ماڭىزعا يە.
قۇرىلىستىڭ نەگىزگى ناتيجەلەرىنىڭ ءبىرى قازاقستان مەن قىتاي اراسىنداعى ءۇشىنشى تەمىرجول شەكارا وتكەلىنىڭ اشىلۋى بولماق. جاڭا باعىت قولدانىستاعى دوستىق جانە التىنكول وتكىزۋ پۋنكتتەرىنە تۇسەتىن جۇكتەمەنى ازايتۋعا، جۇك اعىندارىن ءبولۋدىڭ تيىمدىلىگىن ارتتىرۋعا جانە تاسىمال كولەمىن ۇلعايتۋعا قوسىمشا مۇمكىندىك جاساۋعا جول اشادى.
جاڭا باعىتتىڭ وتكىزۋ قابىلەتى جىلىنا 20 ميلليون تونناعا دەيىن جۇكتى قۇرايدى دەپ كۇتىلۋدە. تەمىرجول جەلىسىنىڭ ىسكە قوسىلۋى ەلىمىزدىڭ ەكسپورتتىق مۇمكىندىكتەرىن كەڭەيتۋگە، وتاندىق ونىمدەردى قىتاي نارىعىنا جەتكىزۋ كولەمىن ارتتىرۋعا، قوسىمشا ترانزيتتىك جۇك اعىندارىن تارتۋعا، سونداي-اق قازاقستان مەن قىتاي اراسىنداعى ساۋدا-ەكونوميكالىق ىنتىماقتاستىقتى نىعايتۋعا مۇمكىندىك بەرەدى.
ايتا كەتەيىك، بۇعان دەيىن قازاقستان مەن قىتاي اراسىنداعى تەمىرجول ارقىلى جۇك تاسىمالىنىڭ كولەمى 8 پايىزعا ارتقانىن جازدىق.