قازاقستان مەن قىتاي بىرلەسكەن عىلىمي-زەرتتەۋ مەكەمەسىن قۇرۋدى تالقىلادى
استانا. KAZINFORM - قازاقستان مەن قىتاي ەلىمىزدە اۆتوموبيل جولدارى سالاسىنداعى بىرلەسكەن عىلىمي-زەرتتەۋ مەكەمەسىن قۇرۋ ماسەلەسىن تالقىلادى.
بۇل تۋرالى «Kaztraffic 2026» حالىقارالىق كورمەسىندە قىتاي كولىك مينيسترلىگىنە قاراستى اۆتوموبيل جولدارى عىلىمي-زەرتتەۋ ينستيتۋتىنىڭ پرەزيدەنتى سۋن يۋنحۋن مالىمدەدى.
ونىڭ سوزىنشە، بيىلعى ءبىرىنشى جارتىجىلدىقتا قازاقستان جول عىلىمي-زەرتتەۋ ينستيتۋتىنىڭ دەلەگاتسياسى قىتايعا بارعان. كەزدەسۋدە اۆتوموبيل جولدارىن سالۋ، باسقارۋ، كۇتىپ ۇستاۋ جانە پايدالانۋ ماسەلەلەرى تالقىلانىپ، ىنتىماقتاستىق تۋرالى كەلىسىمگە قول قويىلعان.
- بەيجىڭدە قازاقستاندا بىرلەسكەن عىلىمي-زەرتتەۋ مەكەمەسىن قۇرۋ ماسەلەسىن تالقىلادىق. بۇل جولى كونفەرەنسياعا قاتىسۋمەن قاتار، ەكىجاقتى ىنتىماقتاستىقتى ودان ءارى تەرەڭدەتۋ ءۇشىن ناقتى جۇمىس جۇرگىزۋدى كوزدەپ وتىرمىز، - دەدى سۋن يۋنحۋن.
ونىڭ ايتۋىنشا، قىتايدىڭ اۆتوموبيل جولدارى عىلىمي-زەرتتەۋ ينستيتۋتىندا جۇرگىزۋشىسىز كولىكتەردى سىناۋعا ارنالعان جابىق الاڭ، كوپىرلەر مەن توننەلدەردى زەرتتەۋ كەشەندەرى بار.
ينستيتۋت جول سالۋ تەحنولوگيالارىن زەرتتەۋدەن باستاپ ولاردى تاجىريبەدە سىناۋعا جانە ستاندارتتار ازىرلەۋگە دەيىنگى جۇمىستاردى جۇرگىزەدى.
سۋن يۋنحۋن قازاقستانمەن تۇراقتى تاجىريبە الماسۋعا جانە بىرلەسكەن جوبالاردى ۇيلەستىرۋگە دايىن ەكەنىن اتاپ ءوتتى.
ايتا كەتەيىك، بۇعان دەيىن قازاقستان مەن قىتاي اراسىنداعى ءۇشىنشى تەمىرجول وتكەلىن اشۋعا مۇمكىندىك بەرەتىن باقتى - اياگوز تەمىرجول جەلىسىن 2027-جىلى ىسكە قوسۋ جوسپارلانعانىن جازعان ەدىك.