قازاقستان مەن قىرعىزستان ساۋدا اينالىمىن ارتتىرۋ ماسەلەلەرىن تالقىلادى
استانا. KAZINFORM - بىشكەكتە قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ پەن قىرعىز رەسپۋبليكاسىنىڭ مينيسترلەر كابينەتىنىڭ ءتوراعاسى - پرەزيدەنت اكىمشىلىگىنىڭ باسشىسى ادىلبەك قاسىماليەۆتىڭ قاتىسۋىمەن قازاق-قىرعىز ۇكىمەتارالىق كەڭەسىنىڭ 14-وتىرىسى ءوتتى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
ق ر پرەمەر-ءمينيسترى ولجاس بەكتەنوۆ قىرعىزستاننىڭ تاتۋ كورشى، باۋىرلاس حالىق جانە ماڭىزدى ساۋدا-ەكونوميكالىق سەرىكتەس ەكەنىن اتاپ ءوتتى.
- قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقايەۆ پەن قىرعىز رەسپۋبليكاسىنىڭ پرەزيدەنتى سادىر نۋرگوجويەۆيچ جاپاروۆتىڭ بىرلەسكەن كۇش-جىگەرى مەن تىكەلەي قولداۋىنىڭ ارقاسىندا ەلدەرىمىز اراسىنداعى وداقتاستىق بايلانىستار جاڭا دەڭگەيگە كوتەرىلدى. ءبىزدىڭ ماقساتىمىز - مەملەكەتتەرىمىزدىڭ باسشىلارى ايقىنداپ بەرگەن بارلىق مىندەتتەردى تولىق جۇزەگە اسىرۋ. ساۋدا قاتىناستارىن ودان ءارى ارتتىرۋ ءۇشىن كولىك-ترانزيت، اۋىل شارۋاشىلىعى جانە ەكونوميكانىڭ باسقا دا سالالارىنداعى ىقپالداستىقتى دامىتا ءتۇسۋ كەرەك. جالپى قازاقستان مەن قىرعىزستان اراسىندا ەكىجاقتى قاتىناستاردىڭ بارلىق سپەكترى بويىنشا ۇلكەن الەۋەت بار. ءبىز ولاردى ناقتى جۇزەگە اسىرۋعا دايىن ەكەنىمىزدى راستايمىز، - دەدى ولجاس بەكتەنوۆ.
كەزدەسۋ بارىسىندا ادىلبەك قاسىمالييەۆ قازاقستاندا جۇرگىزىلىپ جاتقان رەفورمالاردى شىنايى ريزاشىلىقپەن باقىلاپ وتىرعانىن اتاپ ءوتتى. ول قوس حالىقتى عاسىرلار بويى قالىپتاسقان تاريحي، رۋحاني جانە باۋىرلاستىق بايلانىستار بىرىكتىرەتىنىن اتاپ ءوتتى.
- سوڭعى جىلدارى مەملەكەت باسشىلارى اراسىنداعى سەنىمدى قارىم-قاتىناستىڭ ارقاسىندا ەكىجاقتى ىنتىماقتاستىق ساپا تۇرعىسىنان جاڭا دەڭگەيگە كوتەرىلدى، ال پرەزيدەنت قاسىم-جومارت توقايەۆتىڭ بىلتىرعى رەسمي ساپارى ەكى ەل اراسىنداعى قارىم-قاتىناستىڭ وداقتىق سيپاتىن راستادى. ءسىزدىڭ بۇگىنگى رەسمي ساپارىڭىز ەكىجاقتى ىنتىماقتاستىقتى ودان ءارى نىعايتۋعا ىقپال ەتەتىنىنە سەنىمدىمىن، - دەدى قىرعىز رەسپۋبليكاسىنىڭ مينيسترلەر كابينەتىنىڭ باسشىسى.
شاعىن جانە كەڭەيتىلگەن قۇرامداعى كەزدەسۋدە تاراپتار ساۋدا-ەكونوميكا، اۋىل شارۋاشىلىعى، سۋ شارۋاشىلىعى، كولىك جانە ترانزيت، عارىشتى زەرتتەۋ، اۆياتسيا، سيفرلاندىرۋ، مادەني-گۋمانيتارلىق قاتىناستار سياقتى باسىم سالالارداعى ەكىجاقتى ىنتىماقتاستىقتى تەرەڭدەتۋ ماسەلەلەرىن تالقىلادى.
كەزدەسۋ قورىتىندىسى بويىنشا قازاق-قىرعىز ۇكىمەتارالىق كەڭەسىنىڭ 14-وتىرىسىنىڭ قورىتىندى حاتتاماسىنا قول قويىلدى. تاراپتار قازاقستان مەن قىرعىزستان اراسىنداعى بايلانىستى نىعايتۋ جانە ءوڭىردىڭ تۇراقتى دامۋىن قامتاماسىز ەتۋ بويىنشا قول جەتكىزىلگەن ۋاعدالاستىقتاردى ناقتى جۇزەگە اسىرۋعا دەگەن مىندەتتەمەلەرىن راستادى.
ەسكە سالا كەتەيىك، كەشە قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ قىرعىز رەسپۋبليكاسىنا رەسمي ساپارمەن كەلدى.
بىشكەكتە ەكى ەل ۇكىمەت باسشىلارىنىڭ قاتىسۋىمەن 2-قازاقستان-قىرعىزستان ايماقارالىق ىنتىماقتاستىق فورۋمى ءوتتى.
