قازاقستان قۇراماسى FIE الەمدىك رەيتينگىندە العاش رەت كوش باستادى
استانا. KAZINFORM - قازاقستان ەرلەر قۇراماسى شپاگامەن سەمسەرلەسۋدەن حالىقارالىق سەمسەرلەسۋ فەدەراتسياسىنىڭ (FIE) الەمدىك رەيتينگىندە العاش رەت ءبىرىنشى ورىنعا كوتەرىلدى.
جاڭارتىلعان رەيتينگىدە ۇلتتىق قۇراما 354 ۇپاي ەنشىلەپ، فرانسيا (310 ۇپاي) مەن شۆەيتساريانى (296 ۇپاي) ارتتا قالدىردى. ۇزدىك بەستىكتىڭ قاتارىنا يتاليا (286 ۇپاي) مەن ۋكراينا (280 ۇپاي) دا كىردى.
بۇل تاريحي جەتىستىككە قازاقستاندىق شپاگاشىلار ءىرى حالىقارالىق جارىستاردا ءساتتى ونەر كورسەتۋىنىڭ ارقاسىندا قول جەتكىزدى. 2025-جىلى قاراشادا ۇلتتىق قۇراما ساۋد ارابياسىنىڭ ەر-رياد قالاسىندا وتكەن يسلام ىنتىماقتاستىعى ويىندارىندا توپ جاردى. 2026-جىلعى ماۋسىمدا ءۇندىستاننىڭ نيۋ-دەلي قالاسىندا ازيا چەمپيونى اتانسا، شىلدەدە قىتايدىڭ گونكونگ قالاسىندا وتكەن الەم چەمپيوناتىندا التىن مەدال جەڭىپ الدى. ال بيىل كۇزدە ايچي مەن ناگويادا (جاپونيا) وتكەن ازيا ويىندارىندا دا جەڭىسكە جەتتى.
ق ر ۇ و ك مالىمەتىنشە، جاڭا ماۋسىم باستالار الدىندا قازاقستان الەمدىك رەيتينگتە ءۇشىنشى ورىندا تۇرعان ەدى. ول كەزدە شۆەيتساريا مەن فرانسيا قۇرامالارى الدا بولدى. قازاقستان قۇراماسى ماروككونىڭ كاسابلانكا قالاسىندا وتكەن الەم كۋبوگى كەزەڭىندە توپ جارىپ، التىن مەدال جەڭىپ الدى. وسى جەڭىستىڭ ارقاسىندا ۇلتتىق قۇراما الەمدىك رەيتينگتە ءبىرىنشى ورىنعا كوتەرىلدى. وسىلايشا قازاقستاندىق سەمسەرلەسۋشىلەر 2026/27-جىلعى ماۋسىمدى ءساتتى باستادى.
كاسابلانكاداعى جارىستا قازاقستان نامىسىن كيريلل پروحودوۆ، ۆاديم شارلايموۆ، الەكساندر فەدوتوۆ جانە كيريلل پاۆلوۆ قورعادى. شەشۋشى كەزدەسۋدە قازاقستاندىقتار رەسەي قۇراماسىن 45:40 ەسەبىمەن جەڭدى.
پرەزيدەنت قازاقستاندىق سەمسەرلەسۋشىلەردى الەم كۋبوگى كەزەڭىندەگى جەڭىسىمەن قۇتتىقتاعان بولاتىن.
