قازاقستان ەكونوميكاسى 7 جىلدا قالاي وزگەردى - ساراپشى
استانا. KAZINFORM - پرەزيدەنت قاسىم-جومارت توقايەۆ قىزمەتىنە كىرىسكەننەن بەرگى جەتى جىلدا قازاقستان ەكونوميكاسى جاھاندىق جانە سىرتقى سىن-قاتەرگە قاراماستان ءبىرقاتار كورسەتكىش بويىنشا ءوسۋ ديناميكاسىن كورسەتتى.
ەكونوميكا عىلىمدارىنىڭ كانديداتى، «ەكونوميكالىق زەرتتەۋلەر ينستيتۋتى» ا ق تۇراقتى دامۋ ماقساتتارى جونىندەگى حاتشىلىق ديرەكتورى باقىتگۇل قامبار ەلدىڭ ەكونوميكالىق دامۋىنداعى نەگىزگى وزگەرىستەرگە توقتالدى.
ساراپشىنىڭ ايتۋىنشا، 2019 -جىلدان بەرگى كەزەڭ COVID-19 پاندەمياسى، گەوساياسي احۋال جانە الەمدىك ەكونوميكاداعى وزگەرىستەر سەكىلدى فاكتورلارمەن تۇسپا- تۇس كەلدى. قازاقستان ەكونوميكاسىنىڭ حالىقارالىق بايلانىستارعا تىعىز تاۋەلدى ەكەنىن ەسكەرسەك، سىرتقى فاكتورلار ەلدەگى جەكەلەگەن سالالاردىڭ دامۋىنا دا اسەر ەتتى.
سوعان قاراماستان، سوڭعى جەتى جىلدا جان باسىنا شاققانداعى جالپى ىشكى ءونىم ايتارلىقتاي وسكەن.
- وتكەن 7 جىلدا قازاقستاننىڭ جان باسىنا شاققانداعى جالپى ىشكى ءونىمى 2,3 ەسەگە ءوسىپ، 2026 -جىلدىڭ I توقسانىنداعى جاعداي بويىنشا 1661600 تەڭگەنى قۇرادى. اتالعان مەرزىم ىشىندە جان باسىنا ناقتى شاققانداعى ج ءى ءو ءوسۋ قارقىنى دا وسكەنىن بايقاۋعا بولادى. ايتالىق، 2019 -جىلى جان باسىنا شاققانداعى جالپى ىشكى ءونىم 2005 -جىلمەن سالىستىرعاندا 161,6 پايىز ارتقان. الايدا، 2020 -جىلى باستالعان پاندەميا جانە باسقا فاكتورلار سالدارىنان 2022 -جىلى 159,8 پايىزعا دەيىن تومەندەگەن. ال 2025 -جىلى 181,1 پايىزعا دەيىن وسكەن، - دەدى باقىتگۇل قامبار.
وڭدەۋ ونەركاسىبىنىڭ ۇلەسى 14 پايىزعا جەتتى
ەكونوميكا قۇرىلىمىنداعى وزگەرىستەردىڭ ءبىرى - وڭدەۋ ونەركاسىبىنىڭ ۇلەسىنىڭ ارتۋى. 2019 -جىلدىڭ I توقسانىندا وڭدەۋ ونەركاسىبىنىڭ ج ءى ءو-دەگى ۇلەسى 11,8 پايىز بولعان. 2025 -جىلدىڭ قورىتىندىسىندا بۇل كورسەتكىش 12,8 پايىزعا جەتسە، 2026 -جىلدىڭ العاشقى جارتىجىلدىعىندا - 14 پايىزدى قۇراعان.
ەكونوميستىڭ پىكىرىنشە، بۇل باعىتتاعى وزگەرىستەرگە قاراماستان، ەكونوميكانىڭ قۇرىلىمىن ساپالىق جاعىنان ودان ءارى ءارتاراپتاندىرۋ قازاقستاننىڭ ستراتەگيالىق مىندەتتەرىنىڭ ءبىرى بولىپ قالا بەرەدى.
حالىق سانى قارقىندى ءوستى
ەكونوميكالىق كورسەتكىشتەر ەل حالقىنىڭ وسۋىمەن قاتار ءجۇرىپ كەلەدى. ساراپشى كەلتىرگەن مالىمەتكە سايكەس، 2012-2019 -جىلدارى قازاقستان حالقى 1 ميلليون 720 مىڭ 999 ادامعا كوبەيسە، 2019-2026 -جىلدارى حالىق سانى 2 ميلليون 105 مىڭ 180 ادامعا ارتقان.
وسى تۇرعىدان العاندا، حالىق سانىنىڭ وسۋىنە قاراماستان جان باسىنا شاققانداعى ەكونوميكالىق كورسەتكىشتەردىڭ جوعارىلاۋى ەل ەكونوميكاسىنىڭ كولەمى ۇلعايىپ كەلە جاتقانىن كورسەتەدى.
جەتى جىلدا ورتاشا جالاقى 2,4 ەسە ءوستى
جالپى ىشكى ءونىمنىڭ ءوسۋىنىڭ حالىقتىڭ ءال-اۋقاتىنا دا وڭ ىقپال ەتكەنىن بايقالادى. قازاقستانداعى جۇمىسشىلاردىڭ ءار ساعاتتا تاباتىن ورتاشا تابىسى سوڭعى 7 جىلدىڭ ىشىندە 2,2 ەسە ارتقانىن ايتا كەتكەن ءجون.
حالىقتىڭ ناقتى تابىسىنداعى ءوسىم بارىن ورتاشا ايلىق تابىس پەن مەدياندىق تابىستىڭ اراسىنداعى ايىرماشىلىق تا قىسقارعان. ماسەلەن، 2019 -جىلى ورتاشا جانە مەديانلدىق تابىس اراسىنداعى ايىرماشىلىق تابىس 66 پايىز قۇراسا، 2025 -جىلى 39,6 پايىزعا دەيىن تومەندەگەن.
- بۇل قازىرگى تاڭدا ورتاشا جالاقى مولشەرىنىڭ ايتارلىقتاي ارتىپ كەلە جاتقانىن كورسەتەدى. ناقتىراق ايتساق، 2019 -جىلى ورتاشا جالاقى - 185487 تەڭگە، مەدياندىق جالاقى - 112195 تەڭگە بولسا، 2025 -جىلدىڭ قورىتىندىسى بويىنشا ورتاشا جالاقى - 443315 تەنگە، مەدياندىق جالاقى - 317512 تەڭگەنى قۇراعان. دەمەك، 7 جىلدا ورتاشا جالاقى 2,4 ەسە وسسە، تابىستى ناقتىراق كورسەتەتىن مەدياندىق جالاقى 2,8 ەسەگە ارتقان، - دەپ ءتۇسىندىردى ساراپشى.
بەيرەسمي جۇمىسپەن قامتۋ ازايدى
ەڭبەك نارىعىنداعى تاعى ءبىر وزگەرىس - بەيرەسمي جۇمىسپەن قامتىلعاندار ۇلەسىنىڭ تومەندەۋى. باقىتگۇل قامباردىڭ ايتۋىنشا، 2019 -جىلى بۇل كورسەتكىش 13,7 پايىز بولسا، 2025 -جىلدىڭ قورىتىندىسىندا 10,1 پايىزعا دەيىن تومەندەگەن. وسىلايشا، سوڭعى ون جىلدا بەيرەسمي جۇمىسپەن قامتىلعاندار ۇلەسى شامامەن ەكى ەسە ازايعان.
- دەمەك، وتكەن 7 جىل ەلىمىزدىڭ دامۋىنىڭ تۇراقتى نەگىزىن قالىپتاستىرۋداعى ۇزاق مەرزىمدى ستراتەگيالىق ماقساتتاردىڭ العا جىلجۋىنىڭ كەزەكتى بەلەسى بولدى دەۋگە تولىق نەگىز بار، - دەدى ەكونوميكالىق زەرتتەۋلەر ينستيتۋتىنىڭ مامانى.
