قازاقستان مەكتەپتەرىنە قانشا مىڭ مۇعالىم جەتىسپەيدى

قاي وڭىرلەردە ۆاكانسيا كوپ؟

مينيسترلىكتىڭ مالىمەتىنشە، سوڭعى ءۇش جىلدا مۇعالىم تاپشىلىعى شامامەن ەكى ەسەگە ازايعان. دەگەنمەن جاڭا وقۋ جىلى باستالعان تۇستا مەكتەپتەردە ءالى دە مىڭداعان بوس ورىن بار.

مەملەكەتتىك مەكتەپتەردە جالپى 5357 لاۋازىم بوس. ونىڭ 51,9 پايىزى قالالاردا، ال 2575 ءى نەمەسە 48,1 پايىزى اۋىلدىق جەرلەردە ورنالاسقان.

پەداگوگتەرگە سۇرانىس ەڭ جوعارى وڭىرلەر قاتارىندا الماتى وبلىسى – 516، قاراعاندى وبلىسى - 516 جانە الماتى قالاسى - 421 ۆاكانسيامەن تۇر.

پاندەر بويىنشا ماتەماتيكا، باستاۋىش سىنىپ، ورىس ءتىلى مەن ادەبيەتى، فيزيكا جانە حيميا مۇعالىمدەرىنە سۇرانىس جوعارى.

- قازىر 2026-2027 وقۋ جىلىنا ءبىلىم بەرۋ ۇيىمدارىنا پەداگوگتەردى جاساقتاۋ جۇمىسى جالعاسىپ جاتىر. بوس لاۋازىمدارعا ءۇشىن كونكۋرستار وتكىزىلىپ جاتىر، - دەپ حابارلادى مينيسترلىك.

مۇعالىمدەردىڭ جالاقىسى ەكى ەسەگە ءوستى

پەداگوگتەردىڭ سانىن كوبەيتىپ، جاس مامانداردى تارتۋ ءۇشىن سوڭعى جىلدارى ولاردىڭ ەڭبەكاقىسى دا ايتارلىقتاي ءوستى.

مينيسترلىكتىڭ مالىمەتىنشە، سوڭعى بەس جىلدا پەداگوگتەردىڭ جالاقىسى 100 پايىزعا، ياعني ەكى ەسەگە ارتقان. قازىر 500 مىڭنان استام پەداگوگكە بىلىكتىلىك ساناتى، ەڭبەك ءوتىلى جانە عىلىمي دارەجەسى ءۇشىن تۇراقتى قوسىمشا اقى تولەنەدى.

2023-جىلدان باستاپ حالىقارالىق وليمپيادالار، كونكۋرستار مەن سپورتتىق جارىستاردا جەڭىمپاز جانە جۇلدەگەر اتانعان وقۋشىلاردى دايىنداعان مۇعالىمدەرگە ءۇش جالاقىعا تەڭ ءبىرجولعى سىياقى بەرىلەدى.

سونداي-اق 103 مۇعالىم «قازاقستاننىڭ ەڭبەك سىڭىرگەن ۇستازى» قۇرمەتتى اتاعىنا يە بولدى. 800 دەن استام پەداگوگ «ۇزدىك پەداگوگ» بايقاۋىنىڭ جەڭىمپازى اتاندى. بۇل اتاققا يە بولعاندارعا 1000 ا ە ك كولەمىندە اقشالاي سىياقى تولەنەدى.

2023-2026-جىلدارى «ءبىلىم بەرۋدەگى 1000 وزگەرىس كوشباسشىسى» جوباسى اياسىندا 983 پەداگوگ كادرلىق رەزەرۆكە ەنگىزىلدى. ال بەس مۇعالىمگە ەلدىڭ ەڭ جوعارى مەملەكەتتىك ناگراداسى - «قازاقستاننىڭ ەڭبەك ەرى» اتاعى بەرىلدى.

- سونىمەن قاتار پەداگوگتەردىڭ كاسىبي بىلىكتىلىگىن ارتتىرۋ جۇمىستارى دا جالعاسىپ جاتىر. وسى ماقساتتا 91 مىڭنان استام مۇعالىم بىلىكتىلىكتى ارتتىرۋ كۋرستارىنان ءوتتى، - دەلىنگەن مينيسترلىكتىڭ مالىمدەمەسىندە.

جاس ماماندارعا باسىمدىق بەرىلىپ جاتىر

جاس مامانداردى جۇمىسقا ورنالاستىرۋعا دا ەرەكشە كوڭىل ءبولىنىپ وتىر. 2026-جىلى مەملەكەتتىك مەكتەپتەرگە 5741 جاس ماماندى جۇمىسقا ورنالاستىرۋ جوسپارلانعان. بۇل - مەملەكەتتىك مەكتەپتەرگە قابىلداناتىن جالپى مۇعالىم سانىنىڭ 50,2 پايىزنا تەڭ.

مۇعالىمدەردىڭ بوس ورىندارى مەن جۇمىسپەن قامتىلۋى ۇلتتىق ءبىلىم بەرۋ دەرەكقورىنىڭ «مۇعالىمدەردى جۇمىسقا الۋ» مودۋلى ارقىلى كۇن سايىن باقىلانادى.

جوعارى وقۋ ورنىن ۇزدىك بىتىرگەن تۇلەكتەر ءۇشىن جۇمىسقا ورنالاسۋ ءتارتىبى دە جەڭىلدەتىلگەن.

- مەملەكەتتىك ءبىلىم بەرۋ تاپسىرىسى بويىنشا جوعارى نەمەسە جوعارى وقۋ ورنىنان كەيىنگى ءبىلىم العان، GPA كورسەتكىشى 3,33 تەن تومەن ەمەس جانە سەرتيفيكاتتاۋدان وتكەنىن راستايتىن قۇجاتى بار تۇلەكتەردى جۇمىسقا كونكۋرسسىز قابىلداۋعا مۇمكىندىك بەرىلگەن، - دەپ حابارلادى ۆەدوموستۆو.

سونىمەن قاتار اۋىلدىق جەرلەرگە جۇمىسقا باراتىندار ءۇشىن «ديپلوممەن اۋىلعا» باعدارلاماسى بار. ونىڭ اياسىندا كوشۋ ءۇشىن جاردەماقى جانە تۇرعىن ءۇي ساتىپ نەسيە بەرىلەدى.

سونىمەن بىرگە پەداگوگتەردى دايارلاۋ ءۇشىن نىسانالى مەملەكەتتىك ءبىلىم بەرۋ تاپسىرىسى دا جۇزەگە اسىرىلىپ جاتىر. وڭىرلەر جوعارى وقۋ ورىندارىمەن جانە تەحنيكالىق ءارى كاسىپتىك ءبىلىم بەرۋ ۇيىمدارىمەن تۇلەكتەردى جۇمىسقا ورنالاستىرۋ بويىنشا بىرلەسىپ جۇمىس ىستەيدى.

مينيسترلىكتىڭ مالىمەتىنشە، قابىلدانعان شارالاردىڭ ناتيجەسىندە 2023-2025-جىلدارى پەداگوگ كادرلارعا دەگەن قاجەتتىلىك 45,8 پايىزعا قىسقارعان.

ەسكە سالساق، قاسىم-جومارت توقايەۆ ءبىر توپ مۇعالىمدى مەملەكەتتىك ناگرادامەن ماراپاتتاعان ەدى.