قازاقستان كۋرورتتارىنداعى ءبىر تاۋلىكتىك دەمالىستىڭ ورتاشا قۇنى قانشا

استانا. قازاقپارات - 2026 -جىلدىڭ العاشقى جارتىجىلدىعىندا قازاقستانداعى تۋريستىك قىزمەتتەر كولەمى 11,4 پايىز ءوسىپ، 91,2 ميلليارد تەڭگەگە جەتتى. بىلتىر وسى كەزەڭدە بۇل كورسەتكىش 81,9 ميلليارد تەڭگە بولعان.

Алматы облысы туристерді немен қызықтырады
Фото: видеодан алынған скрин

بيىل قاڭتار- ماۋسىم ايلارىندا ەلىمىزدىڭ كۋرورتتىق ايماقتارىندا 1912 ورنالاستىرۋ ورنى جۇمىس ىستەدى. بۇل بىلتىرعى وسى كەزەڭمەن سالىستىرعاندا 64 نىسانعا نەمەسە 3,5 پايىز كوپ. 2025 -جىلدىڭ العاشقى التى ايىندا ولاردىڭ سانى 1848 بولعان.

كۋرورتتىق ايماقتارداعى ورنالاستىرۋ ورىندارىنىڭ ءبىر مەزگىلدەگى سىيىمدىلىعى 122,4 مىڭ توسەك- ورىنعا جەتتى. بىلتىر بۇل كورسەتكىش 120,2 مىڭ ەدى. ال نومىرلىك قور 1,9 پايىزعا ءوسىپ، 47,3 مىڭ ءنومىر بولدى.

قاي وڭىرلەر تۋريستەر اراسىندا تانىمال؟

ورنالاستىرۋ ورىندارىنىڭ سانى بويىنشا الماتى تاۋ كلاستەرى كوش باستاپ تۇر. مۇندا 526 نىسان بار. ودان كەيىن جەتىسۋ وبلىسىنداعى الاكول كۋرورتتىق ايماعى (226)، شۋچە- بۋراباي (216) جانە اباي وبلىسىنداعى الاكول كۋرورتتىق ايماعى (206) ورنالاسقان.

تۋريستەر ەڭ كوپ بارعان باعىت تا - الماتى تاۋ كلاستەرى. 2026 -جىلدىڭ العاشقى التى ايىندا مۇندا 1,2 ميلليوننان استام كەلۋشىگە قىزمەت كورسەتىلگەن. بۇل ەلىمىزدىڭ كۋرورتتىق ايماقتارىنا كەلگەن تۋريستەردىڭ جالپى سانىنىڭ شامامەن 59,4 پايىزىنا تەڭ. ال كورسەتىلگەن قىزمەتتەردىڭ كولەمى 57,1 ميلليارد تەڭگەگە جەتتى.

تانىمال تۋريستىك باعىتتاردىڭ قاتارىندا شۋچە- بۋراباي، ماڭعىستاۋ، تۇركىستان، بالقاش جانە التاي كۋرورتتىق ايماقتارى دا بار.

نومىرلىك قوردىڭ باسىم بولىگى الماتى تاۋ كلاستەرىندە شوعىرلانعان. مۇندا 15,9 مىڭ ءنومىر بار. جەتىسۋ وبلىسىنداعى الاكول كۋرورتتىق ايماعىندا - 5,7 مىڭ، اباي وبلىسىنداعى الاكولدە 5,4 مىڭ ءنومىر تىركەلگەن.

قوناق ۇيلەردىڭ تولتىرىلۋ دەڭگەيى قانداي؟

نومىرلىك قوردىڭ تولتىرىلۋى بويىنشا اباي وبلىسىنداعى الاكول كۋرورتتىق ايماعى الدا كەلەدى. مۇندا كورسەتكىش - 40,1 پايىز. الماتى تاۋ كلاستەرىندە بۇل دەڭگەي 39,7 پايىز، ال كاتونقاراعاي كۋرورتتىق ايماعىندا 37,6 پايىز بولدى.

جالپى، 2026 -جىلعى قاڭتار- ماۋسىم ارالىعىندا كۋرورتتىق ايماقتاردا 1,58 ميلليون ءنومىر ساتىلىپ، 2,79 ميلليون توسەك- تاۋلىك ۇسىنىلدى. ءبىر توسەك- تاۋلىكتىڭ ورتاشا قۇنى 18627 تەڭگەگە جەتتى.

ەسكە سالايىق، بۇعان دەيىن قازاقستاندا تۋريزمنەن تۇسكەن سالىق تۇسىمدەرى 303 ميلليارد تەڭگەگە جەتكەنىن حابارلاعان ەدىك.