قازاقستان جىلقى سانى بويىنشا الەمدەگى بەس ەلدىڭ قاتارىنا كىرەدى
استانا. KAZINFORM - قازاقستاننىڭ مال شارۋاشىلىعى وركەندەپ كەلەدى. 2019-2026-جىلدارى ءىرى قارا مال باسى 10,8 پايىز - 7,4 ميلليوننان 8,2 ميلليون باسقا دەيىن، قوي مەن ەشكى - 7,8 پايىز - 19,2 ميلليوننان 20,7 ميلليون باسقا دەيىن، قۇس - 9,1 پايىز - 45 ميلليوننان 49,1 ميلليون باسقا دەيىن ءوستى.
ق ر اۋىل شارۋاشىلىعى مينيسترلىگىنىڭ باسپا ءسوز قىزمەتىنەن ءمالىم بولدى.
ونداعى مالىمەتتەرگە قاراعاندا، ەڭ ۇلكەن ءوسىم جىلقى شارۋاشىلىعى بويىنشا تىركەلىپ وتىر. ناقتىراق ايتساق، ەلدە جىلقى سانى 58,6 پايىز - 2,9 ميلليوننان 4,6 ميلليون باسقا دەيىن وسكەن. وسىعان قاراي قازىر قازاقستان جىلقى سانى بويىنشا الەمدەگى بەس ەلدىڭ قاتارىنا كىرەدى.
سونداي-اق 2026-جىلعى 1-قىركۇيەكتەگى جاعداي بويىنشا ءىرى قارا مال باسى 9 ميلليون باسقا، قوي مەن ەشكى - 23,3 ميلليون، قۇس - 47,8 ميلليون، جىلقى - 4,9 ميلليون، تۇيە - 310,9 مىڭ باسقا جەتتى.
2026-جىلدىڭ قاڭتار-تامىز ايلارىندا ءتىرى سالماقتا 1,2 ميلليون توننا ەت، 2,7 ميلليون توننا ءسۇت جانە 3,2 ميلليارد دانا جۇمىرتقا ءوندىرىلدى.
- مال شارۋاشىلىعىن ودان ءارى دامىتۋ مال باسى ونىمدىلىگىن ارتتىرۋدى، سەلەكتسيالىق-اسىلداندىرۋ جۇمىستارىن جەتىلدىرۋدى، جەمشوپ بازاسىن نىعايتۋدى جانە قايتا وڭدەۋ قۋاتتارىن كەڭەيتۋدى كوزدەيدى. تاۋارلى ءونىم كولەمىن ۇلعايتۋ، ونىڭ ساپاسىن جانە اۋىل شارۋاشىلىعى وندىرۋشىلەرى ءۇشىن ەكونوميكالىق تيىمدىلىگىن ارتتىرۋ باسىمدىق بولىپ قالا بەرەدى، - دەلىنگەن حابارلامادا.
وسىعان دەيىن ەلدە مال ونىمدەرىن وتكىزۋ ءتارتىبى كۇشەيتىلەتىنى تۋرالى جازدىق.
