قازاقستان حالقى قانداي ماڭىزدى سكرينينگتەردەن ءوتۋى ءتيىس

«قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەڭبەك زاڭناماسىن جەتىلدىرۋ ماسەلەلەرى بويىنشا كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى» 2026-جىلعى 3-ماۋسىمداعى زاڭىنىڭ اياسىندا قىزمەتكەرلەر مەن جۇمىس بەرۋشىلەردى سكرينينگتىك زەرتتەۋلەردەن ءوتۋ قاجەتتىلىگى تۋرالى سيفرلىق جۇيە ارقىلى حاباردار ەتۋ قاراستىرىلعان. بۇل ءوز كەزەگىندە، قىزمەتكەرلەردىڭ سكرينينگتىك زەرتتەۋلەردەن ۋاقتىلى ءوتۋىن ارتتىرۋعا مۇمكىندىك بەرەدى.

سكرينينگتىك زەرتتەۋلەردى وتكىزۋدىڭ قاعيدالارى، كولەمى، كەزەڭدىلىگى جانە سكرينينگتىك زەرتتەۋلەرگە جاتاتىن ادامداردىڭ نىسانالى توپتارى «سكرينينگتىك زەرتتەۋلەرگە جاتاتىن ادامداردىڭ نىسانالى توپتارىن، سونداي-اق وسى قاراپ-تەكسەرۋلەردى وتكىزۋدىڭ قاعيدالارىن، كولەمى مەن كەزەڭدىلىگىن بەكىتۋ تۋرالى» ق ر دەنساۋلىق ساقتاۋ ءمينيسترىنىڭ م. ا. 2020-جىلعى بۇيرىعىمەن بەكىتىلگەن. بۇيرىققا سايكەس سكرينينگتىك زەرتتەۋلەر نىسانالى جاس توپتارىنا سايكەس قاتاڭ جانە بەلگىلەنگەن مەرزىمدىلىكپەن جۇرگىزىلەدى.

- ارتەريالىق گيپەرتەنزيانى، جۇرەكتىڭ يشەميالىق اۋرۋىن، قانت ديابەتىن، گلاۋكومانى جانە مىنەز-قۇلىق قاۋىپ فاكتورلارىن ەرتە انىقتاۋ 40-76 جاستاعى ەرلەر مەن ايەلدەرگە (2 جىلدا 1 رەت) وتكىزىلەدى. ءسۇت بەزى وبىرىن ەرتە انىقتاۋ ءۇشىن سكرينينگپەن 40-76 جاستاعى ايەلدەر (2 جىلدا 1 رەت) قامتىلادى. جاتىر موينى وبىرىن ەرتە انىقتاۋ ءۇشىن سكرينينگ 30-74 جاستاعى ايەلدەرگە (4 جىلدا 1 رەت) ارنالعان، - دەلىنگەن ۆەدومستۆونىڭ Kazinform اگەنتتىگىنە بەرگەن جاۋابىندا.

بۇدان بولەك، كولورەكتالدى وبىردى ەرتە انىقتاۋ ءۇشىن سكرينينگ 50-76 جاستاعى ەرلەر مەن ايەلدەرگە (2 جىلدا 1 رەت) ارنالعان. ءجىتى مي قاناينالىمىنىڭ ناشارلاۋىن انىقتاۋعا ارنالعان سكرينينگ 50-76 جاس ارالىعىنداعى ەرلەرگە (2 جىلدا 1 رەت)، سونداي-اق ۆ جانە س ۆيرۋستى گەپاتيتتەرىنىڭ سكرينينگى (2-كەزەڭ) بۇيرىقتا كورسەتىلگەن تاۋەكەل توپتارىنا جاتاتىن ادامدارعا جۇرگىزىلەدى.

2026-جىلعا ارنالعان ارتەريالىق گيپەرتەنزيا جانە جۇرەكتىڭ يشەميالىق اۋرۋىنا سكرينينگتەن 1842610 ادام ءوتۋى ءتيىس. ونىڭ ىشىندە 68868 ادام (%96,7) ديناميكالىق باقىلاۋعا الىندى. قانت ديابەتىنە سكرينينگىنەن 1968394 ادام ءوتۋى ءتيىس بولسا، وسى تەكسەرۋدىڭ ارقاسىندا 21484 ادام (%95,4) باقىلاۋعا قويىلدى.

- 2026-جىلعا ارنالعان ءسۇت بەزى وبىرىنا سكرينينگتەن ءوتۋى ءتيىس ايەلدەر سانى - 1319853. ونىڭ ىشىندە 87864 ايەل ديناميكالىق باقىلاۋعا الىندى. سونىمەن قاتار، جاتىر موينى وبىرىنا سكرينينگتەن ءوتۋى ءتيىس ايەلدەر سانى - 969299. سونىڭ اراسىندا 22582 ايەل باقىلاۋمەن قامتىلدى، - دەپ اتالىپ وتكەن كوميتەت اقپاراتىندا.

شالعايداعى اۋىل تۇرعىندارى ءۇشىن مەديتسينالىق كومەكتىڭ قولجەتىمدىلىگىن ارتتىرۋ ماقساتىندا كولىكتىك مەديتسينا ۇيىمداستىرىلدى. رەسپۋبليكادا كەڭ پروفيلدى دياگنوستيكالىق قىزمەتتەر مەن مامانداردى (پروفيلاكتيكالىق سكرينينگتەر، كونسۋلتاتيۆتىك- دياگنوستيكالىق قىزمەتتەر كورسەتۋ، دارىلىك زاتتارمەن قامتاماسىز ەتۋ جانە ت. ب.) ۇسىناتىن 144 جىلجىمالى مەديتسينالىق كەشەن (ج م ك) جۇمىس ىستەيدى.

2026-جىلدىڭ 2-توقسانىندا ەل بويىنشا ج م ك 1753 ەلدى مەكەندى قامتىپ، 684894 ادامدى تەكسەردى. تەكسەرۋ بارىسىندا 49999 ادامدا اۋرۋلارى انىقتالدى. ونىڭ ىشىندە: جۇرەك-قانتامىر جۇيەسى - 6 383، ءسۇت بەزى وبىرى – 138، قانت ديابەتى – 1245، گلاۋكوما – 491، بالالار اۋرۋلارى – 6618، باسقا دا اۋرۋلار - 35124 ادام.

ايتا كەتەيىك، قازاقستاندا وكپە وبىرىن ەرتە انىقتايتىن جاڭا سكرينينگ ىسكە قوسىلدى.