قازاقستان بەيجىڭدەگى ت ح ك ب جونىندەگى اۋقىمدى كەزدەسۋگە قاتىستى
استانا. KAZINFORM - بۇگىن بەيجىڭدە قازاقستان دەلەگاتسياسىنىڭ قاتىسۋىمەن ترانسكاسپي حالىقارالىق كولىك باعىتىنا ارنالعان اۋقىمدى كەزدەسۋ مەن تۇراقتى كولىك ماسەلەلەرىنە قاتىستى جاھاندىق فورۋم ءوتتى. بۇل تۋرالى Kazinform اگەنتتىگىنىڭ بەيجىڭدەگى مەنشىكتى ءتىلشىسى حابارلايدى.
اتالعان جيىنداردىڭ اشىلۋىندا ق ر پرەمەر-ءمينيسترىنىڭ ءبىرىنشى ورىنباسارى نۇرلىبەك نالىبايەۆ، بۇكىلقىتاي حالىق وكىلدەرى جينالىسىنىڭ 14-شاقىرىلىمى تۇراقتى كوميتەتى ءتوراعاسىنىڭ ورىنباسارى شوحرات زاكير،
سونداي-اق ءازىربايجان مەن قىرعىزستان وكىلدەرى ءسوز سويلەدى.
نۇرلىبەك نالىبايەۆ قازاقستان پرەزيدەنتى قاسىم-جومارت كەمەل ۇلى توقايەۆ ەلدىڭ ترانزيتتىك-لوگيستيكالىق الەۋەتىن ارتتىرۋدى نەگىزگى باعىتتاردىڭ ءبىرى رەتىندە ايقىنداعانىن اتاپ ءوتتى.
- ءبىزدىڭ ماقساتىمىز - قازاقستاندى ەۋرازياداعى كولىك- لوگيستيكا حابىنا اينالدىرۋ. وسى ستراتەگيالىق ماقساتقا جەتۋ ءۇشىن «شىعىس - باتىس» جانە «سولتۇستىك - وڭتۇستىك» باعىتتارىنداعى دالىزدەردى، ترانسكاسپي حالىقارالىق كولىك باعىتىن كەزەڭ-كەزەڭىمەن دامىتىپ كەلەمىز. سونىمەن قاتار شەكارا جانە پورت ينفراقۇرىلىمىن جاڭعىرتىپ، زاماناۋي مۋلتيمودالدى تاسىمال قىزمەتتەرىن قالىپتاستىرىپ جاتىرمىز، - دەدى ول.
قازاقستان دەلەگاتسياسىنىڭ باسشىسى ترانسكاسپيي حالىقارالىق كولىك باعىتىنا (ت ح ك ب) ارنايى توقتالىپ، بۇل ءدالىزدى دامىتۋ قازاقستاننىڭ كولىك ساياساتىنداعى باستى باسىمدىقتاردىڭ ءبىرى ەكەنىن ايتتى. ونىڭ سوزىنشە، اتالعان باعىتتىڭ دامۋى قازاقستاننىڭ ەۋرازياداعى كولىك بايلانىسىن نىعايتۋعا قوسقان ناقتى ۇلەسى سانالادى.
- ءبىزدىڭ ورتاق مىندەتىمىز - بۇل باعىتتى ءقاۋىپسىز ءارى ءتيىمدى كولىك دالىزىنە اينالدىرۋ. ول ءۇشىن تاسىمال مەرزىمى تۇراقتى، تاريفتەر باسەكەگە قابىلەتتى، ال قىزمەت كورسەتۋ تالاپتارى بارلىق جەردە ءبىرىزدى بولۋى قاجەت، - دەدى ق ر پرەمەر-ءمينيسترىنىڭ ءبىرىنشى ورىنباسارى.
قىتاي تاراپىنىڭ وكىلى شوحرات زاكير قىتايدىڭ ترانسكاسپيي حالىقارالىق كولىك باعىتىن دامىتۋعا ايرىقشا ءمان بەرەتىنىن اتاپ ءوتتى. ونىڭ ايتۋىنشا، قىتاي بارلىق سەرىكتەسىمەن بىرلەسىپ، وسى باعىت ارقىلى تاسىمال كولەمىن ارتتىرۋعا، تيىمدىلىگىن كوتەرۋگە جانە ونى ەۋرازياداعى كولىك بايلانىسىنىڭ وزىق ۇلگىسىنە اينالدىرۋعا دايىن.
ونىڭ ايتۋىنشا، ەلدەر كولىك باعىتى بويىنشا تۇراقتى ءارى كوپجاقتى كونسۋلتاتسيالىق تەتىك قۇرۋى قاجەت. ينفراقۇرىلىمدىق بايلانىستى نىعايتىپ، تاسىمال مۇمكىندىگىن كەڭەيتۋ، شەكاراارالىق تاسىمال ەرەجەلەرى مەن كەدەن تالاپتارىن بىرىزدەندىرۋ دە ماڭىزدى. سونىمەن قاتار مۋلتيمودالدى تاسىمالعا ارنالعان تسيفرلىق پلاتفورما قالىپتاستىرىپ، پورت ماڭىنداعى ءوندىرىستى دامىتۋ، جەتكىزۋ تىزبەگىن قارجىلاندىرۋ تەتىكتەرىن جەتىلدىرۋ جانە بيزنەستىڭ وزگە دە باعىتتارىن جولعا قويۋ قاجەت.
مارشرۋتتىڭ نەگىزگى ۋچاسكەلەرىندەگى جۇمىستى ۇيلەستىرۋدىڭ ماڭىزىن ءازىربايجان تاراپى دا قولدادى. ەلدىڭ ۆيتسە-پرەمەرى شاحين مۇستافايەۆتىڭ ايتۋىنشا، «ورتا ءدالىزدىڭ» ءتيىمدى جۇمىس ىستەۋى ءۇشىن باعىت بويىنداعى مەملەكەتتەردىڭ كۇش-جىگەرىن ۇيلەستىرىپ، ينفراقۇرىلىمدى ءبىر مەزگىلدە دامىتۋ قاجەت. بۇل رەتتە «تار تۇستاردى» جويىپ، راسىمدەردى جەڭىلدەتۋ جانە سيفرلىق شەشىمدەردى ەنگىزۋ دە ماڭىزدى.
- ءازىربايجان بارلىق سەرىكتەسپەن ىنتىماقتاستىق ورناتۋعا دايىن. ورتاق كۇش-جىگەردىڭ ارقاسىندا «ورتا ءدالىز» ازيا مەن ەۋروپانى جالعايتىن سەنىمدى، ءتيىمدى ءارى تۇراقتى كولىك كوپىرىنە اينالادى دەپ سەنەمىز، - دەدى ول ءسوزىن قورىتىندىلاپ.
ءوز كەزەگىندە قىرعىز رەسپۋبليكاسى مينيسترلەر كابينەتى ءتوراعاسىنىڭ ورىنباسارى ەرليست اكۋنبەكوۆ تەڭىزگە تىكەلەي شىعا المايتىن مەملەكەتتەردىڭ كولىك سالاسىنداعى ماسەلەلەرىنە توقتالدى. ول قىرعىزستاننىڭ وڭىرلىك كولىك جەلىسىن دامىتۋعا بەلسەندى اتسالىسىپ، قۇرلىقتىڭ قاق ورتاسىندا ورنالاسقان ەلدەر ءۇشىن تاسىمال كەدەرگىلەرىن ازايتۋعا دايىن ەكەنىن جەتكىزدى. بۇل ورتالىق ازيا تاۋارلارىنىڭ الەمدىك نارىققا ەركىن شىعۋىنا جول اشپاق.
بۇعان دەيىن ترانسكاسپي باعىتى بويىنشا تاسىمال كولەمى 5,6 ەسەگە وسكەنى حابارلانعان بولاتىن.
