قازاقستان بوكسشىلارى ازيا ويىندارىندا باستى قارسىلاستارىن اتادى

بيىلعى ازيا ويىندارى 19-قىركۇيەك پەن 4-قازان ارالىعىندا جاپونيانىڭ ايتي پرەفەكتۋراسى مەن ناگويا قالاسىندا ءوتىپ جاتىر. قازاقستاندىق بوكسشىلار دوداعا 5 ايەلدەر جانە 6 ەرلەر سالماعىندا قاتىسادى.

قازاقستان بوكس فەدەراتسياسىنىڭ اتقارۋشى ديرەكتورى راۋان يگەنيەۆتىڭ ايتۋىنشا، ۇلتتىق قۇراما ازيا ويىندارىنا جىل بويى جوسپارلى دايىندىق جۇرگىزىپ كەلگەن.

- قوس ۇلتتىق قۇراما جىل بويى جيىرمادان استام وقۋ-جاتتىعۋ جيىنىن وتكىزىپ، كوپتەگەن حالىقارالىق تۋرنيرگە قاتىستى. ازيا ويىندارىنىڭ الدىندا جاپونيادا دا وقۋ-جاتتىعۋ جيىنىن جاساپ كەتتىك. قىزدار ءتورت قۇرامامەن، جىگىتتەر ەكى قۇرامامەن كەلدى. قازىر باستى ماقسات - شارشى الاڭعا شىعىپ، جەڭىسكە جەتۋ، - دەدى راۋان يگەنيەۆ Jibek Joly تەلەارناسىنداعى «بۇگىن. LIVE» باعدارلاماسىندا.

فەدەراتسيا وكىلىنىڭ ايتۋىنشا، قۇراما ساپىنا سپورتشىلار جىل بويىنداعى جارىستارداعى ناتيجەسىنە قاراي ىرىكتەلگەن. بوكسشىلاردىڭ اراسىندا بيىلعى ازيا جانە الەم چەمپيوناتتارىنا قاتىسقاندار بار. سوندىقتان قارسىلاستاردىڭ باسىم بولىگىمەن بۇرىن كەزدەسكەن سپورتشىلار دا بار.

- باسەكە وڭاي بولمايدى. قىزدار اراسىندا قىتاي، قىتاي تايبەيى، ءۇندىستان جانە وزبەكستان قۇرامالارى مىقتى. ەرلەر اراسىندا وزبەكستان نەگىزگى قارسىلاستاردىڭ ءبىرى. سونىمەن قاتار قىتاي، تايلاند، موڭعوليا جانە جاپونيا قۇرامالارىندا دا مىقتى بوكسشىلار بار. دۇرىس تاكتيكا جانە پسيحولوگيالىق تۇرعىدان دايىندىق بولسا، جاقسى ناتيجە كورسەتەمىز دەگەن ويدامىز، - دەدى ول.

قازاقستان قۇراماسىنا ازيا ويىندارىندا ءۇش التىن مەدال الۋ ماقساتى قويىلعان. الايدا فەدەراتسيا وكىلى بۇل كورسەتكىشتى سوڭعى مەجە دەپ سانامايتىنىن اتاپ ءوتتى.

- مينيسترلىكپەن بىرگە مەدالدار بويىنشا ماقساتتار بەلگىلەنىپ، ءۇش التىنعا قول قويىلدى. ءبىراق ماقساتىمىز تەك ءۇش التىن ەمەس، ودان دا كوپ. بۇل ءبىز ءۇشىن ماڭىزدى جارىستاردىڭ ءبىرى. ەكى سيكل بويى التىن بولمادى. سوندىقتان ازيا ويىندارىندا جاقسى ناتيجە كورسەتۋگە تىرىسامىز، - دەدى راۋان يگەنيەۆ.

ايتا كەتەيىك، بۇعان دەيىن قازاقستان ەرلەر قۇراماسى تاسجولداعى ۆەلوجارىستا ەكى جۇلدە جەڭىپ العانىن جازعان ەدىك.