قازاقستان ازاماتتىعىن الۋ ءۇشىن قانداي تالاپتار قويىلادى؟

استانا. KAZINFORM - قازاقستاندا سوڭعى ءۇش جىلدا 52 مىڭنان استام ادام ازاماتتىق العان. سونىمەن قاتار مىڭداعان ادام باسقا مەملەكەتتىڭ ازاماتتىعىن الۋىنا بايلانىستى قازاقستان ازاماتتىعىنان ايىرىلعان.

Мемлекет басшысы: Қазақстан азаматтығын және қандас мәртебесін алу тәртібі жеңілдетілді
Фото: Мухтор Холдорбеков/Kazinform

بۇل تۋرالى ىشكى ىستەر مينيسترلىگى رەداكسيانىڭ رەسمي ساۋالىنا بەرگەن جاۋابىندا مالىمدەدى، دەپ حابارلايدى BAQ. KZ ءتىلشىسى.

ءى ءى م مالىمەتىنشە، 2024-جىلى 20244 ادام قازاقستان ازاماتتىعىن العان. 2025-جىلى بۇل كورسەتكىش 21194 ادامدى قۇراعان. ال 2026-جىلدىڭ العاشقى ون ايىندا 10968 ادام قازاقستان ازاماتى اتانعان.

ۆەدومستۆو ازاماتتىق العانداردىڭ باسىم بولىگى ەتنيكالىق قازاقتار ەكەنىن اتاپ ءوتتى.

قازاقستان ازاماتتىعىنان قانشا ادام شىقتى؟

مينيسترلىكتىڭ دەرەگىنشە، قازاقستان رەسپۋبليكاسى پرەزيدەنتىنىڭ جارلىعىمەن 2024-جىلى 77 ادام، 2025-جىلى 68 ادام، ال 2026-جىلدىڭ ون ايىندا 43 ادام قازاقستان ازاماتتىعىنان باس تارتقان.

بۇدان بولەك، باسقا مەملەكەتتىڭ ازاماتتىعىن الۋىنا بايلانىستى قازاقستان ازاماتتىعىن جوعالتقان ادامدار دا بار. اتاپ ايتقاندا:

2024-جىلى - 19888 ادام؛

2025-جىلى - 21734 ادام؛

2026-جىلدىڭ 10 ايىندا - 7788 ادام.

قازاقستان ازاماتتىعىن الۋ ءۇشىن قانداي تالاپتار قويىلادى؟

ءى ءى م مالىمەتىنشە، قازاقستان اۋماعىندا تۇراقتى تۇراتىن شەتەلدىكتەر مەن ازاماتتىعى جوق ادامدار ءوتىنىش بەرۋ ارقىلى قازاقستان ازاماتتىعىن الا الادى.

ول ءۇشىن الدىمەن ەلىمىزدە تۇراقتى تۇرۋعا رۇقسات الۋ قاجەت. بۇل قۇجاتتى ىشكى ىستەر ورگاندارى بەرەدى. زاڭدا بەلگىلەنگەن تالاپتارعا سايكەس كەلگەن جاعدايدا شەتەلدىككە تۇرۋعا ىقتيارحات راسىمدەلەدى. وسىدان كەيىن عانا ول قازاقستان ازاماتتىعىن الۋ تۋرالى ءوتىنىش بەرە الادى.

سونىمەن قاتار قازاقستان كونستيتۋتسياسىنا سايكەس، ەلىمىزدە قوس ازاماتتىققا جول بەرىلمەيدى. سوندىقتان قازاقستان ازاماتتىعىن العىسى كەلەتىن شەتەلدىكتەر بۇرىنعى ازاماتتىعىنان باس تارتۋى كەرەك.