قازاقستان ازاماتتارىنا شەنگەن ۆيزاسىن الۋ ءتارتىبى جەڭىلدەتىلۋى مۇمكىن
استانا. KAZIFORM - قازاقستان مەن ەۋروپالىق وداق ازاماتتارعا شەنگەن ۆيزاسىن الۋ تالاپتارىن جەڭىلدەتۋ جونىندە كەلىسسوز جۇرگىزىپ جاتىر. بۇل تۋرالى سىرتقى ىستەر مينيسترلىگىنىڭ رەسمي وكىلى جانبولات ۇسەنوۆ مالىمدەدى.
مينيسترلىك وكىلىنىڭ ايتۋىنشا، تاراپتار كەلىسسوزدەردى اياقتاۋ مەرزىمىن ازىرگە ناقتى بەلگىلەمەگەن.
قازىر ناقتى مەرزىمدى ايتا المايمىن. ءبىراق جاقىن ۋاقىتتا وڭ ناتيجەگە قول جەتكىزەمىز دەپ ۇمىتتەنەمىن، - دەدى جانبولات ۇسەنوۆ.
جانبولات ۇسەنوۆ قازاقستاننىڭ باسقا مەملەكەتتەرمەن دە ۆيزالىق تالاپتاردى جەڭىلدەتۋ ماسەلەسىن كوتەرىپ جۇرگەنىن ايتتى. نەگىزگى ماقسات - ۆيزاسىز رەجيم ەنگىزۋ. ال وعان دەيىن ۆيزالىق الىمدى ازايتۋ، ۆيزانىڭ قولدانىلۋ مەرزىمىن ۇزارتۋ جانە ءوتىنىش بەرۋگە قاجەتتى قۇجاتتار سانىن قىسقارتۋ كوزدەلگەن.
قازاقستان مەن ەۋروپالىق وداق اراسىنداعى رەسمي كەلىسسوزدەر 2025-جىلعى 2-جەلتوقساندا بريۋسسەلدە باستالدى. قازىر تاراپتار ۆيزالىق رەجيمدى جەڭىلدەتۋ جانە رەادميسسيا تۋرالى ەكى كەلىسىم ازىرلەپ جاتىر. رەادميسسيا كەلىسىمى باسقا ەلدە زاڭسىز جۇرگەن ازاماتتاردى ءوز ەلىنە قايتارۋ ءتارتىبىن رەتتەيدى.
ەسكە سالايىق، بۇعان دەيىن قازاقستان مەن ە و ۆيزانى جەڭىلدەتۋ ماسەلەسىن تالقىلاپ جاتقانى تۋرالى جازدىق.
