قازاقستان مۇناي ءوندىرىسىن ارتتىرۋ ءۇشىن قىتاي تاجىريبەسىن پايدالانباق

استانادا قازاقستان مەن قىتايدىڭ مۇناي-گاز كەن ورىندارىن يگەرۋدىڭ تيىمدىلىگىن ارتتىرۋ جانە زاماناۋي تەحنولوگيالاردى ەنگىزۋ ماسەلەلەرىنە ارنالعان «قازاقستان- CNPC» IV تەحنيكالىق سەمينارى ءوتتى. ءىس-شاراعا ەنەرگەتيكا ۆيتسە-ءمينيسترى ەرلان اكباروۆ قاتىستى.

ەرلان اكباروۆ قازاقستان مەن قىتاي اراسىنداعى دوستىق پەن ستراتەگيالىق ارىپتەستىككە نەگىزدەلگەن ىنتىماقتاستىقتىڭ مۇناي-گاز سالاسىن تەحنولوگيالىق تۇرعىدان دامىتۋدا الەۋەتى زور ەكەنىن اتاپ ءوتتى. ونىڭ ايتۋىنشا، CNPC كومپانياسىمەن ءوزارا ءىس-قيمىلعا 30 جىلعا جۋىق ۋاقىت بولدى. وسى كەزەڭدە «اقتوبە مۇنايگاز» ا ق، PetroKazakhstan توبى جانە «ماڭعىستاۋ مۇنايگاز» ا ق اكتيۆتەرىندەگى مۇناي ءوندىرۋدىڭ جيىنتىق كولەمى 350 ميلليون توننادان استى. جيناقتالعان تاجىريبە مۇناي ءوندىرۋ تيىمدىلىگىن ارتتىرۋعا جانە جەر قويناۋىن ۇتىمدى پايدالانۋعا باعىتتالعان وزىق شەشىمدەردى ودان ءارى ەنگىزۋگە نەگىز بولادى.

ۆيتسە-مينيستر گەولوگيالىق بارلاۋ، گەولوگيالىق مودەلدەۋ، مۇناي بەرۋدى ارتتىرۋ، بۇرعىلاۋ، گەوفيزيكالىق زەرتتەۋلەر جانە كەن ورىندارىن يگەرۋدى سيفرلىق باسقارۋ سالالارىندا زاماناۋي تەحنولوگيالاردى تاجىريبەدە قولدانۋدىڭ ماڭىزدىلىعىن اتاپ ءوتتى.

سونداي-اق وزىق تەحنولوگيالاردى قازاقستان كەن ورىندارىنىڭ ەرەكشەلىكتەرىنە بەيىمدەۋ ماسەلەسىنە ەرەكشە نازار اۋدارىلدى. اتاپ ايتقاندا، داتسين كەن ورنىندا قولدانىلاتىن نۇكتەلىك سۋ ايداۋ تاجىريبەسىن پايدالانۋ مۇمكىندىكتەرى، قالامقاس كەن ورنىندا پوليمەرلىك سۋ ايداۋ تەحنولوگياسىن ەنگىزۋ پەرسپەكتيۆالارى، سونداي-اق گاز ايداۋ، تۇتقىرلىعى جوعارى مۇناي كەن ورىندارىن يگەرۋ، قاباتتى گيدراۆليكالىق جارۋ جانە گازليفت تەحنولوگيالارى قاراستىرىلدى.

ەرلان اكباروۆتىڭ ايتۋىنشا، الداعى جۇمىستىڭ ماڭىزدى باعىتتارىنىڭ ءبىرى - رەسۋرس بازاسىن تولىقتىرۋ. وسىعان بايلانىستى كاسپي ماڭى ويپاتى مەن وڭتۇستىك تورعاي باسسەينىنىڭ گەولوگيالىق الەۋەتىن ودان ءارى زەرتتەۋ، سونداي-اق قولدانىستاعى وندىرىستىك اكتيۆتەردىڭ تۇراقتى دامۋىن قامتاماسىز ەتۋ قاجەت.

- سەمينار قورىتىندىسى بويىنشا 2027-2030-جىلدارعا ارنالعان تەحنولوگيالاردى ەنگىزۋدىڭ بىرلەسكەن جوسپارىن ازىرلەۋ ۇسىنىلدى. قۇجاتتا ناقتى كەن ورىندارى مەن پيلوتتىق ۋچاسكەلەردى، جاۋاپتى ورىنداۋشىلاردى، قارجىلاندىرۋ كولەمىن، ىسكە اسىرۋ مەرزىمدەرىن جانە تيىمدىلىكتىڭ ولشەنەتىن كورسەتكىشتەرىن ايقىنداۋ كوزدەلەدى. سونىمەن قاتار سىناقتاردىڭ ناتيجەلىلىگىن باعالاۋ جانە تەحنولوگيالاردى ونەركاسىپتىك دەڭگەيدە قولدانۋعا كوشىرۋ ولشەمدەرىن بەلگىلەۋ ۇسىنىلادى، - دەلىنگەن مينيسترلىك حابارلاماسىندا.

ۆيتسە-مينيستر جوسپارلانعان ءىس-شارالاردى ۋاقتىلى قارجىلاندىرۋ مەن ساپالى ىسكە اسىرۋدىڭ ماڭىزدىلىعىنا نازار اۋداردى. ونىڭ اتاپ وتۋىنشە، جەر قويناۋىن ۇتىمدى پايدالانۋ، كەن ورىندارىنىڭ وندىرىستىك الەۋەتىن ساقتاۋ جانە ءتيىمدى تەحنولوگيالىق شەشىمدەردى ەنگىزۋ جولىنداعى ورتاق جاۋاپكەرشىلىك قازاقستاننىڭ مۇناي-گاز سالاسىن تۇراقتى دامىتۋدىڭ ماڭىزدى شارتى سانالادى.

بۇعان دەيىن الەمدىك مۇناي قايتادان قىمباتتاعانىن جازعانبىز.