قازاقستان پاسپورتى ورتالىق ازيادا ەڭ مىقتى دەپ تانىلدى

يندەكس دەرەگىنە سايكەس، قازاقستاندىقتار الدىن الا ۆيزا راسىمدەمەي الەمنىڭ 77 باعىتىنا بارا الادى.

بىلتىر قازاقستان اتالعان رەيتينگتە 65-ورىندا بولعان. بيىل ءبىر ساتى تومەندەگەنىنە قاراماستان، ەلىمىز ورتالىق ازياداعى ەڭ جوعارى كورسەتكىشىن ساقتاپ قالدى.

Henley Passport Index ەلدەردىڭ پاسپورتتارىن ولاردىڭ يەلەرى الدىن الا ۆيزا الماي بارا الاتىن باعىتتار سانى بويىنشا سالىستىرادى. 2026-جىلعى رەيتينگتە 199 ەلدىڭ پاسپورتى مەن ساياحاتتاۋعا بولاتىن 227 باعىت قامتىلعان.

ورتالىق ازيا ەلدەرى رەيتينگتە نەشىنشى ورىندا؟

ايماق ەلدەرىنىڭ ىشىندە قازاقستان ەڭ جوعارى ناتيجە كورسەتتى. ودان كەيىن قىرعىزستان، وزبەكستان، تاجىكستان جانە تۇرىكمەنستان ورنالاسقان.

يندەكس دەرەكتەرىنە سايكەس، ەلدەردىڭ كورسەتكىشتەرى مىناداي:

قازاقستان - 66-ورىن، ۆيزاسىز بارۋعا بولاتىن 77 باعىت بار؛

قىرعىزستان - 81-ورىن، 59 باعىت؛

وزبەكستان - 82-ورىن، 57 باعىت؛

تاجىكستان - 87-ورىن، 52 باعىت؛

تۇرىكمەنستان - 93-ورىن، 44 باعىت.

وسىلايشا، قازاقستاندىق پاسپورت ايماقتاعى وزگە ەلدەردىڭ پاسپورتتارىنان جوعارى ناتيجە كورسەتىپ وتىر.

قازاقستان پاسپورتىنىڭ رەيتينگى قالاي وزگەردى؟

سوڭعى 20 جىلدا قازاقستاننىڭ Henley Passport Index رەيتينگىندەگى ورنى بىرنەشە رەت وزگەرگەن.

2006-جىلى ەلىمىز 68-ورىندا بولسا، 2008 جانە 2009-جىلدارى 65-ساتىعا كوتەرىلگەن. ال وسى كەزەڭدەگى ەڭ تومەنگى كورسەتكىش 2015-جىلى تىركەلىپ، قازاقستان 76-ورىنعا تۇسكەن.

2021-جىلى ەل 75-ورىندا بولدى. كەيىنگى جىلدارى كورسەتكىش بىرتىندەپ جاقساردى: 2022-جىلى قازاقستان 68-ورىنعا، 2023-جىلى 70-ورىنعا، ال 2024-جىلى 66-ورىنعا جايعاستى.

2025-جىلى ەلىمىز 65-ورىنعا كوتەرىلگەنىمەن، 2026-جىلعى رەيتينگتە ءبىر ساتى تومەندەپ، 66-ورىنعا ورنالاستى.

الەمدىك رەيتينگتە قاي ەلدەر كوش باستادى؟

Henley Passport Index 2026 رەيتينگىندە سينگاپۋر ءبىرىنشى ورىنعا شىقتى. بۇل ەلدىڭ ازاماتتارى الدىن الا ۆيزا راسىمدەمەي 193 باعىتقا بارا الادى.

ەكىنشى ورىندى جاپونيا، وڭتۇستىك كورەيا جانە بىرىككەن اراب امىرلىكتەرى ءبولىستى. ولاردىڭ ازاماتتارى ءۇشىن ۆيزاسىز نەمەسە الدىن الا ۆيزا الماي بارۋعا بولاتىن باعىتتار سانى - 188.

شۆەتسيا 187 باعىتپەن ءۇشىنشى ورىنعا جايعاستى.

رەيتينگتىڭ سوڭعى ساتىسىندا اۋعانستان تۇر. ەل 106-ورىنعا ورنالاسقان، ال ونىڭ ازاماتتارى الدىن الا ۆيزا راسىمدەمەي 22 باعىتقا عانا بارا الادى.

رەيتينگ نەنى ەسكەرەدى؟

Henley Passport Index پاسپورتتاردىڭ حالىقارالىق ساپارلارعا مۇمكىندىك بەرۋ دەڭگەيىن باعالايدى. نەگىزگى ولشەم - ازاماتتاردىڭ الدىن الا ۆيزا راسىمدەمەي بارا الاتىن ەلدەر مەن باعىتتارىنىڭ سانى.

بۇل رەيتينگ ەلدەگى ءومىر ساپاسىن، ەكونوميكالىق جاعدايدى نەمەسە مەملەكەتتىك ينستيتۋتتاردىڭ تيىمدىلىگىن باعالامايدى.

پاسپورتتار مۇمكىندىكتەرىن سالىستىراتىن باسقا دا حالىقارالىق رەيتينگتەر بار. ماسەلەن، Global Passport Index 2026 ساياحاتتاۋ مۇمكىندىكتەرىمەن قاتار حالىقارالىق موبيلدىلىك، ينۆەستيتسيالىق تارتىمدىلىق جانە ءومىر ساپاسى سەكىلدى فاكتورلاردى دا ەسكەرەدى.

وسى رەيتينگتىڭ جالپى قورىتىندىسىندا قازاقستان 109-ورىنعا جايعاسقان. سوعان قاراماستان، ەلىمىز ورتالىق ازيانىڭ باسقا مەملەكەتتەرىنەن جوعارى ناتيجە كورسەتكەن.