قازاقستان اقابا پروتسەسىن جوعارى باعالايدى - قاسىم-جومارت توقايەۆ

مەملەكەت باسشىسى ەكى ەلدىڭ حالىقارالىق جانە وڭىرلىك كۇن تارتىبىندەگى وزەكتى ماسەلەلەردى شەشۋ تاسىلدەرى ۇقساس ەكەنىنە نازار اۋدارىپ، يوردانيا كورولىنىڭ دوستىق بايلانىستاردى نىعايتىپ، قوس حالىقتى جاقىنداستىرۋعا قوسقان ۇلەسىن جوعارى باعالادى.

سونىڭ ىشىندە پرەزيدەنت II ابداللا بەن ءال-حۋسەين باستاماشى بولعان اقابا پروتسەسىن ەرەكشە اتاپ ءوتتى.

- ءسىزدىڭ كورەگەن باسشىلىعىڭىزبەن يوردانيا پاراساتتىلىق ءارى بايىپتىلىق ۇلگىسىن كورسەتىپ، حالىقارالىق ارەنادا تاياۋ شىعىس جانە ودان تىسقارى ايماقتارداعى بەيبىتشىلىك پەن تۇراقتىلىقتىڭ دايەكتى جاقتاۋشىسى رەتىندە كەڭىنەن تانىلدى. وسى ورايدا، قازاقستان ءوزىڭىز ون جىلدان اسا ۋاقىت بۇرىن باستاعان اقابا پروتسەسىن جوعارى باعالايدى. مۇنداي فورماتتاعى كەزدەسۋگە ورتالىق ازيادا العاش رەت ۇيىمداستىرۋشىلاردىڭ ءبىرى رەتىندە قاتىسۋ - ءبىز ءۇشىن ۇلكەن مارتەبە. سەسسيا بۇگىندە اسا وزەكتى سانالاتىن جاساندى ينتەللەكت سالاسىنداعى قاۋىپسىزدىك تاقىرىبىنا ارنالىپ وتىر. سامميت ورتالىق ازيا ءوڭىرىنىڭ ۇستانىمىن ءبىلدىرىپ، بەيبىتشىلىك پەن قاۋىپسىزدىكتى ساقتاۋ جونىندەگى بىرلەسكەن كۇش-جىگەرىمىزگە تىڭ سەرپىن سىيلايتىنىنا سەنىمدىمىن، - دەدى پرەزيدەنت.

ايتا كەتەيىك، 6-قاراشا كۇنى استانادا اقابا پروتسەسى ءسامميتى وتەدى. اقابا پروتسەسى - 2015 -جىلى يوردانيا كورولى II ابداللا باستاماشى بولعان حالىقارالىق باستاما. ونىڭ باستى ماقساتى - تەرروريزمگە، ەكسترەميزمگە جانە ترانسۇلتتىق قىلمىسقا قارسى كۇرەستە مەملەكەتتەر اراسىنداعى ىنتىماقتاستىقتى نىعايتۋ.

بۇگىن پرەزيدەنت قاسىم-جومارت توقايەۆتىڭ شاقىرۋىمەن قازاقستانعا يوردان حاشيميت كورولدىگىنىڭ كورولى II ابداللا بەن ءال-حۋسەين رەسمي ساپارمەن كەلدى. استانا اۋەجايىندا يوردانيا كورولىن مەملەكەت باسشىسىنىڭ ءوزى كۇتىپ الدى.

اقوردادا قازاقستان پرەزيدەنتى قاسىم-جومارت توقايەۆ پەن يوردانيا كورولى II ابداللا بەن ءال-حۋسەين كەلىسسوز جۇرگىزدى.