قازاقستان مەن مالديۆ ارالدارى اراسىنداعى اۋە رەيستەرىنىڭ سانى ەكى ەسە ارتادى
استانا. KAZINFORM - مونرەال قالاسىندا (كانادا) وتكەن ي ك ا و-نىڭ اۋە كولىگى جونىندەگى جەتىنشى دۇنيەجۇزىلىك كونفەرەنتسياسى (ATConf/7) اياسىندا ق ر كولىك مينيسترلىگى ازاماتتىق اۆياتسيا كوميتەتىنىڭ ءتوراعاسى سالتانات تومپيەۆا مەن مالديۆ رەسپۋبليكاسى ازاماتتىق اۆياتسيا باسقارماسىنىڭ ءتوراعاسى ابدۋل حاريس مىرزانىڭ كەزدەسۋى ءوتتى.
كەزدەسۋ بارىسىندا ەكى ەل اراسىنداعى ەكى جاقتى ىنتىماقتاستىقتى ودان ءارى نىعايتۋ، اۋە قاتىناسى مەن تۋريستىك بايلانىستاردى كەڭەيتۋ پەرسپەكتيۆالارى تالقىلاندى.
ق ر ازاماتتىق اۆياتسيا كوميتەتى مالىمەتىنە سايكەس كەلىسسوز قورىتىندىسى بويىنشا ءار تاراپتىڭ تاعايىندالعان اۋە تاسىمالداۋشىلارى ءۇشىن رۇقسات ەتىلگەن تۇراقتى رەيستەر سانىن اپتاسىنا 7 دەن 14 كە دەيىن ۇلعايتۋ تۋرالى ۋاعدالاستىققا قول جەتكىزىلدى.
تاراپتار سونداي-اق «اۋە ەركىندىگىنىڭ» بەسىنشى دارەجەلى قۇقىقتارىن پايدالانا وتىرىپ ۇشۋلاردى ورىنداۋ مۇمكىندىگىن تالقىلادى، بۇل اۋە كومپانيالارىنا حالىقارالىق باعىتتاردى ۇيىمداستىرۋ كەزىندە قوسىمشا كوممەرتسيالىق مۇمكىندىكتەردى قاراستىرۋعا جول اشادى. مالديۆ ارالدارى قازاقستاندىقتار اراسىندا تانىمال دەمالىس باعىتتارىنىڭ ءبىرى بولىپ سانالادى، بۇل ءوز كەزەگىندە اۋە قاتىناسىن دامىتۋعا قوسىمشا العىشارتتار جاسايدى.
تاراپتار ازاماتتىق اۆياتسيا سالاسىنداعى ارىپتەستىكتى ودان ءارى نىعايتۋعا جانە ىنتىماقتاستىقتى كەڭەيتۋگە ءوزارا مۇددەلىلىكتەرىن راستادى.
مالديۆ ارالدارى تۋريستىك دەكلاراتسيانى تولتىرۋ ءتارتىبىن وزگەرتكەنىن جازعان ەدىك.