قازاقستان AI ەكونوميكانىڭ بارلىق بەس دەڭگەيىن دامىتۋدى كوزدەيدى - جاسلان ماديەۆ
استانا. KAZINFORM - قازاقستان جاساندى ينتەللەكتىنىڭ ەنەرگەتيكالىق جانە چيپتىك ينفراقۇرىلىمنان باستاپ، ۇلكەن تىلدىك مودەلدەر مەن قولدانبالى شەشىمدەرگە دەيىنگى بارلىق بەس دەڭگەيىن جۇيەلى تۇردە دامىتۋدى كوزدەپ وتىر.
بۇل تۋرالى ق ر پرەمەر- ءمينيسترىنىڭ ورىنباسارى - جاساندى ينتەللەكت جانە سيفرلىق دامۋ ءمينيسترى جاسلان ماديەۆ AI and Digital Bridge فورۋمى اياسىنداعى پانەلدىك سەسسيادا مالىمدەدى.
جاسلان ماديەۆتىڭ ايتۋىنشا، جاساندى ينتەللەكت تەحنولوگيالارىنىڭ دامۋى قازىر باستاپقى كەزەڭدە تۇر. سوندىقتان قازاقستان ءۇشىن AI ەكونوميكانىڭ تۇتاس جۇيەسىن قالىپتاستىرۋ ماڭىزدى.
- قازىر ءبىز جاساندى ينتەللەكت تەحنولوگيالارىنىڭ دامۋىنىڭ ەڭ باستاپقى كەزەڭىندە تۇرمىز. ءارتۇرلى باعالاۋلارعا سايكەس، AI دىڭ جالپى الەۋەتتى نارىعىنىڭ كولەمى ءقازىردىڭ وزىندە 50 تريلليون دوللاردان اسادى،-دەدى مينيستر.
ول قازاقستان جاساندى ينتەللەكت ەكونوميكاسىنىڭ بەس نەگىزگى دەڭگەيىن قاتار دامىتۋدى كوزدەيتىن جۇيەلى ءتاسىلدى تاڭداعانىن اتاپ ءوتتى.
- ولار - ەنەرگەتيكالىق ينفراقۇرىلىم، چيپتەر، ءتۇرلى بۇلتتى پلاتفورمالارعا قولجەتىمدىلىك، جەرگىلىكتى جانە ەگەمەندى ۇلكەن تىلدىك مودەلدەردى قوسا العاندا، ۇلكەن تىلدىك مودەلدەردى ازىرلەۋ، سونداي-اق قولدانبالى شەشىمدەر دەڭگەيى،-دەپ ءتۇسىندىردى جاسلان ماديەۆ.
ءمينيستردىڭ سوزىنشە، قازىرگى ۋاقىتتا بولاشاقتا وسى دەڭگەيلەردىڭ قايسىسىندا قوسىلعان قۇننىڭ ەڭ جوعارى كولەمى قالىپتاسىپ، تابىستىلىق كورسەتكىشتەرى جوعارى بولاتىنىن ناقتى انىقتاۋ قيىن.
- سوندىقتان قازاقستان جاساندى ينتەللەكت بولاشاقتا ەكونوميكالىق قىزمەت پەن بيزنەستىڭ قالىپتى بولىگىنە اينالعان كەزدە جاڭا مۇمكىندىكتەردى جىبەرىپ الماۋ ءۇشىن بارلىق بەس دەڭگەيدى دامىتۋ جولىن تاڭدادى،-دەپ ءتۇسىندىردى مينيستر.
جاسلان ماديەۆ جاساندى ينتەللەكت سالاسىنداعى ەگەمەندىككە ۇمتىلۋ بارلىق قاجەتتى تەحنولوگيانى ءوز بەتىنشە ازىرلەۋ دەگەندى بىلدىرمەيتىنىن اتاپ ءوتتى.
- باسقا ەلدەرمەن جانە الەمنىڭ تۇكپىر-تۇكپىرىندەگى ءىرى تەحنولوگيالىق كومپانيالارمەن ىنتىماقتاستىق ورناتىپ، سونىمەن قاتار ءارتاراپتاندىرىلعان ءتاسىلدى ساقتاۋ ماڭىزدى،- دەدى ول.
ءمينيستردىڭ ايتۋىنشا، قازاقستان ازىرگە چيپ ءوندىرۋشى ەل ەمەس. دەگەنمەن، اسا ماڭىزدى تەحنولوگيالارعا قول جەتكىزۋ ءۇشىن باتىس جانە شىعىس ەلدەرىندەگى سەرىكتەستەرمەن قارىم-قاتىناستى دامىتۋ قاجەت.
- اسا ماڭىزدى تەحنولوگيالارعا قول جەتكىزۋ ءۇشىن ەكسپورتتىق باقىلاۋعا جاۋاپتى رەتتەۋشى ورگاندارمەن جانە ۆەدومستۆولارمەن جاقسى قارىم-قاتىناستى ساقتاۋىمىز كەرەك،-دەدى جاسلان ماديەۆ.
مينيستر ۇلكەن تىلدىك مودەلدەر مەن بۇلتتى شەشىمدەردى دامىتۋ ماسەلەسىنە دە ەرەكشە توقتالدى. ونىڭ ايتۋىنشا، مۇنداي تەحنولوگيالاردى ازىرلەۋ كەزىندە قازاقستاندىق كونتەنت پەن مادەني كونتەكستى ەسكەرۋ قاجەت.
- بۇل مودەلدەردى قالاي وقىتۋ جانە قوسىمشا وقىتۋ كەرەكتىگىن ءتۇسىنىپ، ءتيىستى قۇزىرەتتەردى دامىتۋىمىز قاجەت. سوندىقتان قولدانبالى شەشىمدەر دەڭگەيىنە وتۋگە مۇمكىندىك بەرەتىن الەۋەتتى ارتتىرۋ باعدارلامالارى كەرەك،-دەپ اتاپ ءوتتى ول.
جاسلان ماديەۆتىڭ پىكىرىنشە، قازاقستان جاساندى ينتەللەكتىنىڭ قولدانبالى دەڭگەيىنەن ەڭ ۇلكەن پراكتيكالىق پايدا كورە الادى.
- ءبىزدىڭ پايىمداۋىمىزشا، قازاقستان ەڭ ۇلكەن پايداعا قولدانبالى شەشىمدەر دەڭگەيىندە قول جەتكىزە الادى. مۇنداي شەشىمدەردى بۇكىل ەكونوميكاعا جانە ادامداردىڭ كۇندەلىكتى ومىرىنە كەڭىنەن ەنگىزۋگە بولادى،-دەپ تۇيىندەدى مينيستر.
