قازاقستان مەن ا ق ش اراسىندا تىكەلەي رەيس اشىلۋى مۇمكىن
استانا. KAZINFORM - مونرەال قالاسىندا ءوتىپ جاتقان ي ك ا و-نىڭ اۋە كولىگى جونىندەگى 7-دۇنيەجۇزىلىك كونفەرەنتسياسى (ATConf/7) اياسىندا ق ر كولىك ۆيتسە-ءمينيسترى تالعات لاستايەۆ پەن ا ق ش دەلەگاتسياسىنىڭ باسشىسى، ا ق ش كولىك ءمينيسترىنىڭ اۆياتسيا جانە حالىقارالىق قاتىناستار جونىندەگى اسسيستەنتى دەنيەل دج. ەدۆاردستىڭ كەزدەسۋى ءوتتى.
كەلىسسوزدەردىڭ نەگىزگى تاقىرىبى قازاقستان مەن ا ق ش اراسىندا تىكەلەي اۋە قاتىناسىن ورناتۋ پەرسپەكتيۆالارى، سونداي-اق ازاماتتىق اۆياتسيا سالاسىنداعى ەكىجاقتى ىنتىماقتاستىقتى ودان ءارى دامىتۋ ماسەلەلەرى بولدى.
كەزدەسۋ بارىسىندا قازاقستان پرەزيدەنتىنىڭ وسى جىلدىڭ جەلتوقسان ايىندا مايامي قالاسىندا (ا ق ش) وتەتىن G20 سامميتىنە شاقىرىلعانى اتالىپ ءوتتى.
قازىرگى ۋاقىتتا قازاقستاندىق تاراپ ا ق ش فەدەرالدىق اۆياتسيالىق باسقارماسىنىڭ (FAA) 1-ساناتىن الۋ بويىنشا جۇمىستاردى جالعاستىرىپ جاتىر. قىركۇيەك ايىندا امەريكالىق ساراپشىلار اۋديت جۇرگىزىپ، جاقسى كورسەتكىشتەردى اتاپ وتە وتىرىپ، الدىن الا ناتيجەلەردى ۇسىندى.
سونداي-اق اڭگىمە بارىسىندا 2027-جىلدىڭ سوڭىنا دەيىن قازاقستان مەن ا ق ش اراسىندا تىكەلەي رەيس اشۋ جوسپارلارى ءسوز بولدى.
- ءبىز قازاقستان مەن ا ق ش اراسىندا تىكەلەي اۋە قاتىناسىن ىسكە قوسۋعا مۇددەلىمىز جانە وسى باعىتتا بەلسەندى جۇمىس جۇرگىزۋدەمىز. ەلدەرىمىز اراسىندا جاسالعان «اشىق اسپان» تۋرالى كەلىسىم وسى باستامانى ىسكە اسىرۋ ءۇشىن بەرىك قۇقىقتىق نەگىز قالىپتاستىرادى. ءبىز ا ق ش-تىڭ اۆياتسيالىق بيلىك ورگاندارىمەن سىندارلى ءوزارا ءىس- قيمىلدى جوعارى باعالايمىز جانە قالعان راسىمدەردىڭ تاياۋ بولاشاقتا اياقتالۋىنا سەنىم ارتامىز،- دەپ اتاپ ءوتتى تالعات لاستايەۆ.
ق ر ازاماتتىق اۆياتسيا كوميتەتى مالىمەتىنشە، كەزدەسۋدە قازاقستاندىق اۋە كومپانيالارىنىڭ اۋە كەمەلەرى پاركىن جاڭارتۋ ماسەلەسى دە اتالىپ ءوتتى. ماسەلەن، Air Astana اۋە كومپانياسى 2026-2027-جىلدارى ا ق ش-قا ۇشۋلاردى ۇيىمداستىرۋ كەزىندە پايدالانۋ جوسپارلانىپ وتىرعان ءۇش Boeing 787 Dreamliner اۋە كەمەسىنىڭ جەتكىزىلۋىن كۇتىپ وتىر.
بۇدان بولەك، 2025-جىلى امەريكالىق Boeing كومپانياسىمەن جالپى قۇنى 15 ميلليارد ا ق ش دوللارى بولاتىن 33 اۋە كەمەسىن جەتكىزۋ تۋرالى كەلىسىمدەر جاسالدى. اتالعان كەلىسىمدەرگە وسى جىلدىڭ اقپان ايىندا قازاقستان پرەزيدەنتىنىڭ ا ق ش-قا جۇمىس ساپارى بارىسىندا قول جەتكىزىلگەن بولاتىن.
ۆيتسە- مينيستر تىكەلەي اۋە قاتىناسىن ىسكە قوسۋ قازاقستاندىق-امەريكالىق قاتىناستاردى دامىتۋداعى ماڭىزدى كەزەڭگە اينالاتىنىن، ىسكەرلىك جانە تۋريستىك بايلانىستاردى نىعايتۋعا، بيزنەس ءۇشىن جاڭا مۇمكىندىكتەر اشۋعا جانە ورتالىق ازيانىڭ امەريكا قۇراما شتاتتارىمەن كولىكتىك بايلانىسىن ارتتىرۋعا ىقپال ەتەتىنىن اتاپ ءوتتى.
كەزدەسۋ سوڭىندا تاراپتار تىكەلەي اۋە قاتىناسىن ىسكە قوسۋ جانە ازاماتتىق اۆياتسيا سالاسىنداعى ىنتىماقتاستىقتى ودان ءارى نىعايتۋ ءۇشىن قاجەتتى پراكتيكالىق ماسەلەلەردى شەشۋ بويىنشا سىندارلى ديالوگ پەن بىرلەسكەن جۇمىستى جالعاستىرۋعا مۇددەلى ەكەنىن راستادى.
ايتا كەتەيىك، قازاقستان مەن مالديۆ ارالدارى اراسىنداعى اۋە رەيستەرىنىڭ سانى ەكى ەسە ارتادى.