قازاققا اۆوكادو ەمەس، سارىماي مەن قويدىڭ قۇيرىق مايى پايدالى - سالتانات بولاتبەك قىزى

 بۇگىندە بلوگەرگە اينالعان ديەتولوگ سالتانات بولاتبەك قىزى اتا-بابامىزدىڭ تاماقتانۋ سالتىن ساقتاپ-اق ارىقتاپ، دەنساۋلىقتى جاقسارتۋعا بولاتىنىن ناسيحاتتاپ ءجۇر. 

ونىڭ ايتۋىنشا، قازاققا ەت-سورپا، قازى-قارتا، جال-جايا، قۇرت جەپ دەنساۋلىعىن تۇزەپ، يممۋنيتەتتى كوتەرە الاتىنىن ايتتى.

«بىزدە دۇرىس تاماقتانۋ تۋرالى جانساق پىكىر قالىپتاسقان. مىسالى، كوبىنە تروپيكالىق جەمىس- جيدەك، ءشوپ-شالام جەۋ كەرەك دەپ ويلايدى. ءبىراق بىزگە ەۋروپانىڭ ديەتاسى، امەريكانىڭ ءومىر ءسۇرۋ سالتى مۇلدەم كەلمەيدى. سوندىقتان دەنساۋلىعىمىزدى جاقسارتقىمىز كەلسە، اتا-بابامىزدىڭ تاماقتانۋ سالتىنا كوشۋىمىز كەرەك. قازاققا ەت پەن سورپا، قازى-قارتا، جال-جايا، قۇرت جەپ ءجۇرىپ، دەنساۋلىقتى ءمىنسىز ەتە الامىز» دەگەن ديەتولوگ مولشەرمەن ءارى دۇرىس تاماقتانسا، دەنساۋلىقتى تۇزەۋگە بولاتىنىن ءسوز ەتتى.

- وزگەلەردىڭ تاماقتانۋ ادەبى - بىزگە زيان. سەبەبى تاماقتانۋعا بايلانىستا ءار ادامنىڭ گەنىندە كود بولادى. ياعني، سەن قاي جەردە تۋىپ-ءوستىڭ، سول جەردىڭ نەمەسە سول ۇلتتىڭ تاماعى سەنىڭ بويىڭا كۇش-قۋات بەرەدى. سوندىقتان اعزاعا قاجەتتى دارۋمەننىڭ ءبارى ءوزىمىزدىڭ ۇلتتىق تاعامىمىزدا بار. بۇگىندە سونىڭ قادىرىن كوپشىلىگى بىلە بەرمەيدى. كەرىسىنشە، دەنساۋلىققا پايدالى دەپ كريەۆەتكي، بروككوليدى ۇناتپاسا دا جەپ جۇرگەندەر از ەمەس. كەيبىرى بالانى «دۇرىس تاماقتانۋعا ۇيرەتەمىن» دەپ كارتوپ، ءسابىزدى سۋعا ءپىسىرىپ نەمەسە نانعا اۆوكادو(الليگاتور المۇرتى) جاعىپ، ونىڭ اۋزىنا تىعىپ، قيناپ بەرىپ جاتادى. الايدا قۇرامىندا قانشا قۇندى ماي بولسا دا، ونىڭ بىزگە ءسىڭۋى وتە قيىن. جالپى، اۆوكادو قازاققا مۇلدەم سىڭبەيدى. ەڭ قىزىعى، بۇل - عىلىمي تۇردە دالەلدەنگەن اقپارات. بۇعان قاراعاندا قولدىڭ سارىمايى مەن قۇيرىق ماي گەنىمىزگە، ياعني قانىمىزعا جاقىن. قازاقى تاماقتانۋدى ادەبىڭىزگە ەنگىزسەڭىز، اۆوكادوسىز دا ادەمى بولاسىز. ال قۇرتتىڭ ءوزى ءبىز ءۇشىن تابيعي كالتسيي. سول ءۇشىن ءاربىر قازاق قازاقى تاماقتانۋ ادەبىنە كوشسە، دەنساۋلىعىن تۇزەپ قانا قويمايدى. ءومىر ءسۇرۋى دە قولايلى ءارى جەڭىل بولادى، - دەيدى سالتانات بولاتبەك قىزى.

ديەوتولوگ مامان Instagram-داعى پاراقشاسىندا سونىمەن قاتار اتا-انالارعا بالالارىنا قازى-قارتا، جال-جايا بەرىپ ۇيرەتۋگە كەڭەس بەرەدى.

«بالانىڭ قانىندا، ياعني گەنىندە جوق نارسەنى كۇشتەپ جەگىزۋدىڭ قاجەتى جوق. ءوزىمىزدىڭ ۇيرەنگەن قازى-قارتا، جال-جايادان سالات جاساپ بەرسە، كەرىسىنشە سول تاعامعا ول دا تەز ۇيرەنەدى. قازاقى دۇرىس تاماقتانۋ وزىڭىزگە دە، بالاڭىزعا دا وتە جايلى بولار ەدى. سەبەبى ءبىز گەننەن الىس كەتە المايمىز. شەتەلگە ەلىكتەۋدىڭ ەش قاجەتى جوق»، - دەدى ول.

فوتو: ozgepikir.kz