قازاقمىس قازا تاپقان كەنشىلەردىڭ وتباسىنا بارلىق نەسيەسىن وتەپ بەرۋگە 90 ميلليون تەڭگە ءبولدى
استانا. KAZINFORM - قازاقمىس كورپوراتسياسى ۇجىمدىق شارت پەن ءومىردى ساقتاندىرۋ باعدارلاماسىنىڭ مىندەتتەمەلەرىن ورىنداۋ اياسىندا كەنشىلەردىڭ وتباسىنا جان-جاقتى كومەك كورسەتۋدى جالعاستىرۋدا. كومپانيا قازا بولعان كەنشىلەردىڭ وتباسىلارىنا تولىقتاي نەسيەلەرىن وتەپ بەرۋگە كومەكتەستى، دەپ حابارلايدى Kazinform ءتىلشىسى.
«جومارت» كەنىشىندە قازا بولعان جۇمىسكەرلەردىڭ وتباسىلارىنىڭ ەكىنشى دەڭگەيلى بانكتەر مەن ميكروقارجى ۇيىمدارى الدىنداعى نەگىزگى بورىشتارىنىڭ قارىزى تولىعىمەن تولەندى.
«تولەمدەردىڭ جالپى سوماسى شامامەن 90 ميلليون تەڭگەنى قۇرادى. ءارى قاراي وتباسىلار قارجى ۇيىمدارى الدىنداعى قارىزدى ءوز بەتىنشە وتەۋى ءتيىس. بۇعان دەيىن قازاقمىس بارلىق وتباسىعا 10 جىلدىق جالاقى مولشەرىندە (84 ميلليون تەڭگەدەن 142 ميلليون تەڭگەگە دەيىن) وتەماقى جانە جەرلەۋ راسىمىنە 550 ا ە ك (2,2 ميلليون تەڭگە) كولەمىندە جاردەماقى تولەدى. سونىمەن قاتار «KM LifE» ا ق ساقتاندىرۋ كومپانياسى جەرلەۋ ءراسىمىن اتقارۋ ءۇشىن ءار وتباسىنا 100 ا ە ك تولەدى»، - دەپ مالىمدەلگەن قازاقمىس كورپوراتسياسىنىڭ حابارلاماسىندا.
سونداي-اق بالالارى 23 جاسقا تولعانعا دەيىن اي سايىن 524 مىڭنان 921 مىڭ تەڭگەگە دەيىن اسىراۋشىسىنان ايىرىلۋىنا بايلانىستى ساقتاندىرۋ تولەمى تاعايىندالادى. كورسەتىلگەن سومالار جىل سايىن ينفلياتسيا دەڭگەيىنە سايكەس يندەكستەلەدى.
بۇعان قوسا قازىر تۋىستارىن جۇمىسقا ورنالاستىرۋ جانە قازاقستاندىق جوعارى وقۋ ورىندارىندا وقيتىن ستۋدەنت بالالارىنىڭ وقۋ اقىسىن تولەۋ ماسەلەسى قاراستىرىلۋدا.
بۇگىن «جومارت» كەنىشىندەگى اپاتتى تەرگەۋدىڭ الدىن الا قورىتىندىلارى قارالدى.
سونىمەن قاتار ۇلىتاۋ وبلىسىنىڭ اكىمى داستان رىسپەكوۆ پرەزيدەنت قاسىم-جومارت توقايەۆقا «قازاقمىس» كورپوراتسياسىنىڭ كەنىشىندە تاياۋدا بولعان اپات سالدارىنان قازا تاپقان شاحتەرلەردىڭ وتباسىلارىنا قانداي كومەك كورسەتىلىپ جاتقانىن ايتتى.
