قازاقمىس بالقاش كولىن ساقتاۋعا 5 ميلليون دوللار بولمەكشى
استانا. KAZINFORM - «قازاقمىس» كورپوراتسياسى بالقاش كولىن ساقتاۋدىڭ جول كارتاسىنا 5 ميلليون دوللار (شامامەن 2,6 ميلليارد تەڭگە - رەد.) بولمەكشى.
ال فرانسيا دامۋ اگەنتتىگى (AFD) وسى جول كارتاسىنىڭ شەبەرلىك جوسپارىن ازىرلەۋگە 1,35 ميلليون ەۋرو (شامامەن 765,6 ميلليون تەڭگە - رەد.) باعىتتاپ وتىر.
بۇل تۋرالى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ ماجىلىستە وتكەن ۇكىمەت ساعاتىندا ايتتى.
- فرانسيا اگەنتتىگى ءبىزدىڭ عىلىمي-تەحنيكالىق ۋنيۆەرسيتەتتەرمەن بىرگە بالقاش كولىن ساقتاۋ جونىندەگى شەبەرلىك جوسپارىن ازىرلەپ جاتىر. ونىڭ سىرتىندا «قازاقمىس» كورپوراتسياسى وسى جوسپاردى ىسكە اسىرۋعا 5 ميلليون دوللار ءبولدى، - دەدى ۆەدومستۆو باسشىسى.
ونىڭ سوزىنشە، شەبەرلىك جوسپارى بالقاشتى ساقتاپ قالۋ ءۇشىن قانداي ناقتى جوبالاردى ىسكە اسىرىپ، قانداي شەشىمدەر قابىلداۋ كەرەكتىگىن ايقىنداپ بەرەتىن قۇجات بولماق. ال مينيسترلىك ونى 2040-جىلعا دەيىن ىسكە اسىرۋعا ءتيىس.
شەبەرلىك جوسپارىن ازىرلەۋ جۇمىستارى عىلىمي زەرتتەۋلەردەن باستالماق. ونىڭ ىشىندە بالقاشقا كەلەتىن ترانسشەكارالىق وزەندەر مەن ەل ىشىندەگى سالالارىنان قۇياتىن سۋدىڭ كولەمى قالاي وزگەرىپ جاتقانى، كول باسسەينىندەگى ەكولوگيالىق احۋال، وعان جەردىڭ استىنان قوسىلاتىن سۋدىڭ ديناميكاسى، ايدىن اۋماعىنداعى ەنەرگەتيكالىق جوبالاردىڭ تابيعاتقا تيگىزەر اسەرى تۇگەل زەردەلەنۋى كەرەك.
مينيسترلىك وسى شەبەرلىك جوسپاردى ىسكە اسىرۋدىڭ جول كارتاسىن ازىرلەپتى. ول قۇجاتتا ىلە-بالقاش كولىنىڭ دەڭگەيىن باقىلاۋعا ارنالعان سيفرلىق پلاتفورما قۇرۋ، سۋ نىساندارىن اۆتوماتتاندىرۋ جانە سيفرلاندىرۋ، باسىم گيدروتەحنيكالىق قۇرىلىستاردى دامىتۋ شارالارى قاراستىرىلعان.
بالقاشتىڭ تاعدىرى ىلە ترانسشەكارالىق وزەنى ارقىلى قازاقستان اۋماعىنا كىرەتىن سۋدىڭ كولەمىنە تىكەلەي بايلانىستى. سوندىقتان ىلە-بالقاش باسسەينىن قىتاي حالىق رەسپۋبليكاسىمەن بىرلەسىپ سۋ قورعاۋ جانە وزەندى ورنىقتى پايدالانۋ ماسەلەلەرىن قامتيتىن ءىس-شارالاردى ىسكە اسىرۋ كوزدەلىپ وتىر.
قازىر فرانسيانىڭ گەولوگيالىق جانە تاۋ-كەن زەرتتەۋلەر بيۋروسى (BRGM) شەبەرلىك جوسپاردى ازىرلەۋ اياسىندا قازاقستاندىق ماماندارمەن بىرگە قاجەتتى مالىمەتتەردى جيناستىرىپ جاتىر. BRGM ساراپشىلارى بالقاش باسسەينىندەگى ۇڭعىمالار مەن گيدروبەكەتتەردى، سۋارمالى القاپتاردى ارالاماقشى.
