قازاق دۇنيەتانىمىندا انا بەينەسى قاشاندا ايرىقشا قاستەرلەنگەن - بالايەۆا
استانا. KAZINFORM - بۇگىن، مامىر ايىنىڭ ەكىنشى جەكسەنبىسىندە، ەلىمىزدە انالار كۇنى اتاپ وتىلەدى. ق ر پرەمەر-ءمينيسترىنىڭ ورىنباسارى - مادەنيەت جانە اقپارات ءمينيسترى ايدا بالايەۆا انالار كۇنىنە وراي قۇتتىقتاۋ جولدادى.
ونىڭ سوزىنشە، جۇرەككە جىلۋ ۇيالاتاتىن، مەيىرىم مەن ماحابباتقا، العىس پەن قۇرمەتكە تولى بۇل مەرەكە بىزگە ءومىر سىيلاعان، اق سۇتىمەن الديلەپ، ايالى الاقانىمەن ماپەلەگەن، شەكسىز سۇيىسپەنشىلىگى مەن قامقورلىعىن ارناعان اسىل جاندارعا ارنالعان.
- انا - ءار ادام ءۇشىن ەڭ قىمبات ۇعىم. مەيىرىمنىڭ باستاۋى، ىزگىلىكتىڭ شۋاعى، وتباسىنىڭ بەرەكەسى مەن ۇرپاق تاربيەسىنىڭ التىن دىڭگەگى. قازاق دۇنيەتانىمىندا انا بەينەسى قاشاندا ايرىقشا قاستەرلەنگەن. انانىڭ اقىلى مەن ونەگەسى، سابىرى مەن مەيىرىمى ارقىلى ۇرپاقتان ۇرپاققا قۇرمەت، ىزەت، جاناشىرلىق، جاۋاپكەرشىلىك سياقتى اسىل قۇندىلىقتار جالعاسىپ كەلەدى. بۇل قۇندىلىقتار - حالقىمىزدىڭ رۋحاني تۇتاستىعى مەن ەلدىگىمىزدىڭ بەرىك نەگىزى، - دەدى بالايەۆا.
مادەنيەت جانە اقپارات ءمينيسترى اتاپ وتكەندەي، بۇگىندە قازاقستاندا انا مەن بالانى، وتباسى ينستيتۋتىن قولداۋعا باعىتتالعان مەملەكەتتىك ساياسات جۇيەلى تۇردە جۇزەگە اسىرىلىپ كەلەدى. الەۋمەتتىك قولداۋ شارالارى جەتىلدىرىلىپ، مەكتەپكە دەيىنگى ءبىلىمنىڭ قولجەتىمدىلىگى ارتىپ، انا مەن بالا دەنساۋلىعىن قورعاۋ جۇيەسى نىعايتىلىپ جاتىر. ايەلدەردىڭ ەڭبەك ەتۋىنە، كاسىبي دامۋىنا جانە وتباسىلىق مىندەتتەرىمەن ۇيلەسىمدى ءومىر سۇرۋىنە جاعداي جاسالىپ كەلەدى. جاۋاپتى اتا- انا مادەنيەتىن قالىپتاستىرۋعا باعىتتالعان باستامالار قولعا الىنىپ، وتباسىن قولداۋ ورتالىقتارىنىڭ جەلىسى كەڭەيۋدە. سونىمەن قاتار ون جىلدان استام ۋاقىت بويى كونسۋلتاتيۆتىك- كەڭەسشى ورگان رەتىندە انالار كەڭەسى دە ماڭىزدى جۇمىس اتقارىپ جاتىر.
- وسى ايتۋلى كۇنى بارشا انالارعا دانالىعى، ءتوزىمى، مەيىرىمى مەن اق نيەتى ءۇشىن شىن جۇرەكتەن العىس ايتامىن. انالارىمىز امان، شاڭىراقتارىمىز شاتتىققا تولى بولسىن! انامىزبەن بىرگە وتكىزگەن ءاربىر ءساتتىڭ قادىرىن تەرەڭ سەزىندىرەتىن مەرەكەمەن بارشاڭىزدى شىن جۇرەكتەن قۇتتىقتايمىن! وتباسىلارىڭىزعا جىلۋلىق، ماحاببات، بەرەكە-بىرلىك پەن اماندىق تىلەيمىن! - دەپ قۇتتىقتادى مينيستر.
بۇعان دەيىن حابارلانعانداي، انالار كۇنى - مامىر ايىنىڭ ەكىنشى جەكسەنبىسىندە ا ق ش، كانادا، گەرمانيا، يتاليا، تۇركيا، جاپونيا، برازيليا جانە اۋستراليا سىندى 20 دان استام مەملەكەتتە تويلانادى. قازاقستاندا دا انا مارتەبەسىن ايقىندايتىن بۇل كۇن ەرەكشە مانگە يە.
