قازاق ىم-يشارا ءتىلى مەن داكتيل ءالىپبيىن قابىلداۋ ماسەلەسى پىسىقتالادى
استانا. KAZINFORM - قازاق ىم-يشارا ءتىلى مەن داكتيل ءالىپبيىن قابىلداۋ ماسەلەسى پىسىقتالادى. بۇل تۋرالى ءماجىلىس دەپۋتاتتارىنىڭ ساۋالىنا پرەمەر-ءمينيستردىڭ ورىنباسارى ەرمەك كوشەربايەۆتىڭ جاۋابىندا ايتىلعان.
- قازاقستان رەسپۋبليكاسى 2023 -جىلعى 7 -ماۋسىمدا حالىقارالىق مۇگەدەكتەردىڭ قۇقىقتارى تۋرالى كونۆەنسيانى راتيفيكاتسيالادى. كونۆەنسيانىڭ 21-بابىنا سايكەس قاتىسۋشىلار وزدەرىنىڭ تاڭداۋى بويىنشا قارىم-قاتىناستىڭ بارلىق نىسانىن پايدالانا وتىرىپ، اقپارات پەن يدەيالاردى باسقالارمەن تەڭ دارەجەدە الۋ جانە تاراتۋ ەركىندىگىن قوسا العاندا، كوزقاراسى مەن نانىم-سەنىمىن ءبىلدىرۋ ەركىندىگى قۇقىعىن پايدالانۋىن قامتاماسىز ەتۋ ءۇشىن بارلىق ءتيىستى شارانى قابىلدايدى، - دەپ اتاپ وتەدى ۆيتسە-پرەمەر جاۋابىندا.
ەرمەك كوشەربايەۆ حالىقارالىق تاجىريبەگە سايكەس ۇلىبريتانيادا، يسلانديادا، اۋستراليادا، جاڭا زەلانديادا، نورۆەگيادا، اۆستريادا، يسپانيادا، شۆەتسيادا، وڭتۇستىك افريكا رەسپۋبليكاسىندا ىم-يشارا ءتىلى رەسمي مويىندالعانىن اتاپ وتەدى.
- الداعى كەزەڭدە قازاقستاننىڭ شەتەلدەردەگى مەكەمەلەرىن تارتا وتىرىپ، الەمدەگى ىم-يشارا تىلدەرى مەن داكتيل الىپبيلەرىنىڭ رەسمي بەكىتىلۋىنە (مويىندالۋىنا) قاتىستى حالىقارالىق تاجىريبە زەردەلەنەتىن بولادى. ودان كەيىنگى كەزەڭدە مەملەكەت پەن قوعامنىڭ ينكليۋزيۆتىلىگى تۇرعىسىنان مۇددەلى مەملەكەتتىك ورگاندار بەيىندى ۇيىمدار وكىلدەرىمەن بىرلەسىپ، قازاق ىم-يشارا ءتىلى مەن داكتيل ءالىپبيىن قابىلداۋ ماسەلەسى ەگجەي-تەگجەيلى پىسىقتالاتىن بولادى، - دەدى ۇكىمەت باسشىسىنىڭ ورىنباسارى.
جاساندى ينتەللەكتىنىڭ كومەگىمەن ىم ءتىلى قازاقشالانعانىن بۇعان دەيىن جازعان ەدىك.
