قازاق- وزبەك شەكاراسىندا ترانزيتتىك جۇك وتەتىن پۋنكتتەر سانى ارتۋى مۇمكىن

 استانا. KAZINFORM - قازاقستان مەن وزبەكستان جالپى قۇنى 1 ميلليارد دوللاردى قۇرايتىن جاڭا 21 جوبانى ىسكە قوسۋ ماسەلەسىن پىسىقتاپ جاتىر.

بۇل تۋرالى ەلوردادا وزبەكستان سىرتقى ىستەر ءمينيسترى باحتيەر سايدوۆپەن كەڭەيتىلگەن قۇرامداعى كەلىسسوزدەردەن كەيىنگى بريفينگتە پرەمەر- ءمينيستردىڭ ورىنباسارى - سىرتقى ىستەر ءمينيسترى مۇرات نۇرتىلەۋ ايتتى.

«جاڭا عانا باحتيەر سايدوۆ مىرزامەن شاعىن جانە كەڭەيتىلگەن قۇرامدا ءداستۇرلى دوستىق، ءوزارا قولداۋ مەن سەنىم رۋحىنداعى كەلىسسوزدەر وتكىزدىك. ءبىز ىقپالداستىعىمىزدىڭ تىڭ باعىتتارىن ايقىنداپ، ىرگەلى مىندەتتەردى العا قويىپ وتىرمىز. بيىلعى جىلى وتەتىن جوعارى دەڭگەيدەگى ساپارلارعا، مەملەكەت باسشىلارىنىڭ كوپجاقتى فورماتتاعى كەزدەسۋلەرىنە ەرەكشە نازار اۋدارىلدى. ەكونوميكالىق ىنتىماقتاستىقتى ودان ءارى تەرەڭدەتۋ پەرسپەكتيۆالارىن ورتاعا سالدىق. وسى تۇستا، ساۋدا، ونەركاسىپ، كولىك جانە لوگيستيكا سالالارىنداعى ءوزارا ءىس- قيمىل ماسەلەلەرى جەتە تالقىلاندى»، - دەدى ميينستر.

ونىڭ دەرەگىنشە، قازاقستان وزبەكستاننىڭ «ۇشتىككە» كىرەتىن ەڭ ءىرى ساۋدا سەرىكتەستەرىنىڭ ءبىرى. سوڭعى جىلدارى ەكىجاقتى ساۋدا كولەمى تۇراقتى تۇردە 4 ميلليارد دوللاردان اسادى.

«ونەركاسىپتىك كووپەراتسيا سالاسىندا ايتارلىقتاي جەتىستىكتەرگە قول جەتكىزىلدى. قازىرگى تاڭدا جالى قۇنى 156 ميلليون دوللاردى قۇرايتىن 12 بىرلەسكەن جوبا ىسكە قوسىلدى. وعان قوسا، قۇنى 1 ميلليارد دوللاردى قۇرايتىن جاڭا 21 جوبانى قاراستىرىپ جاتىرمىز. ەندى الداعى بەلەستەردىڭ ءبىرى - وسى العان ەكپىندى جوعالتپاي، ەكىجاقتى تاۋار اينالىمىن 10 ميلليارد دوللارعا دەيىن ەسەلەتۋ. قازاق- وزبەك شەكاراسىندا حالىقارالىق ونەركاسىپتىك كووپەراتسيا ورتالىعىن قوسى وسى ماقساتقا باعىتتالعان. ءوڭىرارالىق ىنتىماقتاستىق فورۋمدارىن وتكىزۋدىڭ ماڭىزدىلىعىن دا بولەك اتاپ وتتىك»، - دەدى مۇرات نۇرتىلەۋ.

ءمينيستردىڭ ايتۋىنشا، ورتالىق ازيا ايماعى تۇرعىندارىنىڭ كوكەيىندە جۇرگەن ماڭىزدى ماسەلە - سۋ- ەنەرگەتيكالىق كەشەنى توڭىرەگىندە دە پىكىر الماسىپ، ونى شەشۋ جولدارىنا نازار اۋدارىلدى.

«سونىمەن قاتار، باسقا دا بىرلەسكەن جوبالاردى جۇزەگە اسىرۋ بارىسىن تالقىلادىق. اتالعان باستامالارعا سىرتقى ساياسي ۆەدومستۆولارى تاراپىنان قاجەتتى قولداۋ تابىلادى دەپ ۋاعدالاستىق. ەكى مەملەكەتتىڭ ترانزيتتىك الەۋەتىن ارتتىراتىن جاڭا تەمىر جولداردى سالۋ جوبالارى ەرەكشە نازاردا. ءوز كەزەگىندە، شەكارا ارقىلى وزبەك تاسىمالداۋشىلارى ءۇشىن ءترانزيتتى جەڭىلدەتۋ باعىتىندا ناقتى قادامدار جاساۋ تۋرالى ۋاعدالاستىققا قول جەتكىزدىك. قازاق تاراپى بۇل ماسەلەلەردە ورتاق مۇددە تۇرعىسىنان قاراپ، ءوزىمىزدىڭ مۇددەمىزگە سايكەس شەشۋگە دايىن ەكەندىگىمىزدى اتاپ ءوتتىم. ءوز كەزەگىندە شەكارا ارقىلى وزبەك تاسىمالداۋشىلارى ءۇشىن ترانزيتتى جەڭىلدەتۋ باعىتىندا بىرنەشە ۇسىنىسىن بەردى. ونىڭ ىشىندە شەكارادان ءوتۋ پۋنكتتەرىنىڭ سانىن كوبەيتۋ، جاڭا جول سالۋ ماسەلەلەر سياقتى كوپتەگەن ناقتى سۇراقتاردى تالقىلاپ، جاقىن ارادا ءتيىستى مينيسترلىكتەر اراسىندا كەلىسسوزدەر جۇرگىزۋ تۋرالى ۋاعدالاستىققا قول جەتكىزدىك»،- دەدى مۇرات نۇرتىلەۋ.

اۆتور

مارلان جيەمباي