قازاق وتباسىلارى فيليپپيندىك بالا كۇتۋشىلەرگە نە ءۇشىن قىزىعادى
استانا. KAZINFORM - كەيىنگى جىلدارى ەلىمىزدە بالاسىنا شەتەلدەن تاربيەشى جالدايتىن اتا-انالار كوبەيدى. اسىرەسە، تايلاند پەن فيليپپيندىك كۇتۋشىلەرگە سۇرانىس جوعارى. ءتىپتى، قازىر وسى ەلدەردەن كەلگەندەردى ىرىكتەپ، ارنايى وقۋدان وتكىزەتىن اگەنتتىكتەر قۇرىلعان.
وندا بالانى مەكتەپكە اپارىپ، ۇيىرمەلەرگە تاسيتىن كۇتۋشىلەردەن باستاپ ءتىل ۇيرەتىپ، ساباق وقىتاتىن تاربيەشىلەرگە دەيىن تابۋعا بولادى. Jibek joly ارناسىنىڭ ءتىلشىسى جانەل نۇربولات وسىنداي تاربيەشىلەردىڭ بىرىمەن تىلدەستى.
فيليپپيندىك شەريل باندياننىڭ قازاقستانعا كەلگەنىنە ءبىر اي بولعان. بۇعان دەيىن كۋۆەيتتە بالا كۇتۋشى بولعان ول ەندى قازاق وتباسىندا جۇمىس ىستەيدى. 4 جاسار ءاليحاندى بالاباقشاعا الىپ بارادى، تاماعىن ازىرلەيدى. لوگيكالىق ويلاۋدى دامىتاتىن ويىنداردى ويناتىپ، ءتىل ۇيرەتۋگە دە كوڭىل بولەدى.
«ءوز ەلىمدە ساۋدا ۇيىندە ساتۋشى بولدىم. تاڭنان كەشكە دەيىن تىنباي جۇمىس ىستەپ 100 دوللار عانا تاباتىنمىن. سول كەزدەرى كۋۆەيتتە بالا كۇتۋشىسى بولىپ جۇمىس ىستەيتىن قۇربىلارىم ايىنا 400 دوللار الاتىنىن ايتقان. ءوزىم بالا باققاندى جاقسى كورەمىن. اقىسى دا جاقسى ەكەن. نەگە كورمەسكە دەدىم»، - دەيدى شەريل بانديان.
ءاليحاننىڭ اناسى جىبەك بالاسىنىڭ از ۋاقىتتا شەريلگە باۋىر باسىپ قالعانىن ايتادى. جولداسى ەكەۋى كۇنى بويى جۇمىستا. ءۇي تىرلىگىنىڭ ءبارىن شەريل اتقارادى. ال وعان دەيىن بالا كۇتۋشى مەن اسپازدى بولەك جالداپ، ەكى ەسە كوپ اقى تولەگەن.
«بالاعا قارايدى، ءۇي شارۋاسىنىڭ ءبارىن جاسايدى. تاماق ءپىسىرىپ قويادى كەشكە جۇمىستان كەلگەندە. مىسالى، ءبىز اسپاز بەن بالا كۇتۋشىنى جالداساق، تەك بالا كۇتۋشىگە 300-400 مىڭ تەڭگە كەتەدى. ال فيليپپين باسا كۇتۋشىسى 450 مىڭ الادى. ءبىراق سونىڭ ىشىنە ءبارى كىرەدى. ءۇي جيناۋ، تاماق ءپىسىرۋ، بالا تاربيەسى سەكىلدى مىندەتتەر»، - دەيدى جىبەك قۇسايىنوۆا.
جىبەك شەريلدى اگەنتتىك ارقىلى تاپقان. قازىر وندا 100-دەن استام فيليپپيندىك بالا كۇتۋشىسى جۇمىس ىستەيدى.
اگەنتتىكتىڭ نەگىزىن قالاۋشى سۆەتلانا گرامستىڭ ايتۋىنشا، شەتەلدەن كەلگەن تاربيەشىلەرگە قازاقستاننان جۇمىس بىردەن تابىلادى. ويتكەنى، بالاسىنىڭ جاستايىنان بىرنەشە ءتىلدى تەڭ مەڭگەرگەنىن قالايتىن اتا-انالار كوپ.
«بىزگە ەسترادا جۇلدىزدارى مەن بلوگەرلەر ءجيى كەلەدى. فيليپپيندىك تاربيەشىلەردىڭ قازاق، ورىس ءتىلىن بىلمەيتىنى ولار ءۇشىن تاعى ءبىر ارتىقشىلىق. ياعني، شەتەلدىكتەردى جۇمىسقا الۋ ارقىلى ەلگە بەلگىلى ازاماتتار جەكە ومىرلەرىن قۇپيا ساقتاي الادى. ءبىراق، بۇل شەتەلدىك تاربيەشىلەردى اۋقاتتى وتباسىلار عانا جالدايدى دەگەن ءسوز ەمەس. ءبىزدىڭ كومەككە جۇگىنەتىندەردىڭ اراسىندا قاراپايىم ازاماتتار دا كوپ»، - دەيدى سۆەتلانا.
سۆەتلانا بالا كۇتۋشىلەر اگەنتتىگىن وسىدان 10 جىل بۇرىن اشقان. سول ۋاقىتتا جۇمىستى بىرنەشە عانا فيليپپيندىك قىز-كەلىنشەكپەن باستاعان. كەيىن ولار جەرلەستەرىنە قازاقستاندا فيلپييپينگە قاراعاندا 5 ەسە كوپ ەڭبەكاقى تولەيتىنىن ايتىپ، قاتارلارى كوبەيگەن سوڭ، ءىرى اگەنتتىك قۇرعان.
«فيليپپيندىك بالا كۇتۋشىلەرگە 800-1200 دوللار ارالىعىندا تولەيمىز. ولارعا قويىلاتىن باستى تالاپ - كەمى 3 جىلدىق ەڭبەك ءوتىلىنىڭ بولۋى. سونداي-اق، جاسى 50 دەن اسپاۋى كەرەك»، - دەپ تولىقتىردى اگەنتتىك يەسى.
ءقازىر ەلىمىزدە سۆەتلانانىڭ ورتالىعىنان باسقا فيليپپيندىكتەر مەن تايلاندتىقتارعا قازاق وتباسىنان جۇمىس تاباتىن 4 اگەنتتىك بار. ءارقايسىندا 50-دەن استام تاربيەشى تىركەلگەن. ال جالپى، قازاقستاندا 192 فيليپپين جانە 336 تايلاند ازاماتى ەڭبەك ەتىپ ءجۇر. كوبىسى قۇرىلىس جانە IT سالالارىندا جۇمىس ىستەيدى.
اۆتور
اسحات رايقۇل
