قازاق تىلىندەگى فيلمدەرگە سۇرانىس ارتۋدا

استانا. KAZINFORM - قازاق تىلىندەگى فيلمدەرگە سۇرانىس ارتىپ كەلەدى. بۇل تۋرالى مادەنيەت جانە اقپارات ۆيتسە-ءمينيسترى قانات ىسقاقوۆ ايتتى.

بۇگىن سەناتتىڭ جالپى وتىرىسىندا دەپۋتات ايگۇل قاپباروۆا شەتەلدىك بلوكباستەرلەردى قازاق تىلىنە دۋبلياجداۋعا قاتىستى سۇراق قويدى.

«بيۋدجەتتەن جىل سايىن شەتەلدىك 15 فيلمدى قازاق تىلىنە دۋبلياجداۋعا مەملەكەتتىك قولداۋ ارقىلى شامامەن 443 ميلليون تەڭگە بولىنەدى. كەلەر 2025-2027 -جىلدارى دۋبلياجعا وسى سومادا قاراجات ەسكەرىلگەن. الايدا 2023-2024 -جىلدارى اتالعان قاراجات يگەرىلمەي، بيۋدجەتكە قايتارىلدى. ياعني ەكى جىلدا شەتەلدىك فيلمدەر دۋبلياجدانباعان. بۇل رەتتە كورەرمەننىڭ الەمدىك دەڭگەيدەگى تۋىندىلاردى انا تىلىندە كورۋ قۇقىعى ەسكەرىلمەي وتىر. اتاپ ايتقاندا، قاراجاتتىڭ بيۋدجەتكە قايتارىلۋى سەبەبى نەدە؟»، - دەپ سۇرادى سەناتور.

ءوز كەزەگىندە ۆيتسە-مينيستر قانات ىسقاقوۆ بىلتىر شەتەلدىك 15 فيلمدى اۋدارۋعا قاراجات بولىنگەنىن، ءبىراق اۋدارما جۇمىستارى اتقارىلماعانىن ايتتى.

«باستى سەبەپ نەدە؟ ەڭ الدىمەن، گولليۆۋدتىق نەمەسە انيماتسيالىق فيلمدەردى قازاق تىلىنە اۋدارۋ ءۇشىن بىزدە بىرنەشە قاتاڭ شارت بار. ارينە، وسى شارتتار ءبىزدىڭ سالت-داستۇرىمىزگە، زاڭنامامىزعا سايكەس كەلەدى. ءبىراق ەكى كۇردەلى تالاپ بار، ياعني ءىرى ديستريبيۋتورلىق كومپانيالار ولاردى جۇزەگە اسىرا الماي وتىر. بىرىنشىدەن، ءاربىر گولليۆۋدتىق نەمەسە انيماتسيالىق تۋىندىنى قازاقشاعا اۋداراردىڭ الدىندا ونلاين ساۋالناما بولۋى كەرەك. وعان بىرنەشە اي كەرەك. ەكىنشىدەن، تەك قانا جوعارى رەيتينگ الۋعا قاۋقارلى فيلمدەر اۋدارىلۋى قاجەت دەگەن شارت بار. وسى ەكى تالاپتى ورىنداۋ ءۇشىن 3-4 اي ۋاقىت وتەدى. بۇل ۋاقىت تىم ۇزاق بولعاندىقتان، وعان ەشكىم قىزىعۋشىلىق تانىتپايدى. سوندىقتان مينيسترلىك پارلامەنت ماجىلىسىنە ءتيىستى زاڭ جوباسىن ەنگىزىپ، بۇل ەكى نورمانى جەڭىلدەتۋ جۇمىسىن اتقارىپ جاتىر»، - دەدى ق. ىسقاقوۆ.

ونىڭ ايتۋىنشا، قازىر فيلمدەردى تولىقتاي قازاق تىلىنە اۋدارۋ ءىس-شارالارى اتقارىلىپ جاتىر. بۇل تۇرعىدا ديستريبيۋتورلىق كومپانيالار ءوز قاراجاتىنا وسى جۇمىسقا كىرىسىپ وتىر. ويتكەنى قازاق تىلىندەگى فيلمدەرگە سۇرانىس ارتىپ كەلەدى.

«جالپى، بۇل ماسەلەنى باقىلاۋعا الامىز. ءتيىستى زاڭنامالىق وزگەرىستى ەنگىزىپ، بولىنگەن قاراجاتتى تياناقتى ءارى ورىندى يگەرۋگە ەرەكشە ءمان بەرەمىز»، - دەدى ۆيتسە-مينيستر.

اۆتور
رۋسلان عابباسوۆ