قازاق- تۇرىكمەن قارىم-قاتىناسى وتە تابىستى دامىپ كەلەدى – ق ر پرەزيدەنتى

استانا. KAZINFORM - مەملەكەت باسشىسى تۇرىكمەنستان حالك ماسلاحاتىنىڭ ءتوراعاسى گۋربانگۋلى بەردىمۇحامەدوۆپەن كەزدەستى، دەپ حابارلايدى اق وردانىڭ باسپا ءسوز قىزمەتى.

قاسىم- جومارت توقايەۆ گۋربانگۋلى بەردىمۇحامەدوۆكە V دۇنيەجۇزىلىك كوشپەندىلەر ويىندارىنىڭ اشىلۋ سالتاناتىنا قاتىسۋعا ارنايى كەلگەنى ءۇشىن ريزاشىلىعىن ءبىلدىردى.

پرەزيدەنت ەكى جاقتى ىنتىماقتاستىقتى ودان ءارى ىلگەرىلەتۋدە حالك ماسلاحاتى ءتوراعاسىنىڭ استاناعا ساپارى اسا ماڭىزدى ەكەنىن اتاپ ءوتتى.

مەملەكەت باسشىسىنىڭ ايتۋىنشا، قازىر قازاق- تۇرىكمەن قارىم-قاتىناسى وتە تابىستى دامۋدا جانە ستراتەگيالىق سەرىكتەستىك دەڭگەيىنە تولىق سايكەس كەلەدى.

ءوز كەزەگىندە گۋربانگۋلى بەردىمۇحامەدوۆ قاسىم-جومارت توقايەۆقا قوناقجايلىق تانىتقانى ءۇشىن العىس ايتىپ، اۋقىمدى سپورتتىق ءىس-شارانىڭ ءساتتى وتۋىنە تىلەكتەستىك ءبىلدىردى. حالك ماسلاحاتى ءتوراعاسى ەلىمىزدىڭ الەمدىك ارەناداعى بەدەلىن ارتتىرۋعا ىقپال ەتەتىن ءىرى حالىقارالىق جيىنداردى ۇيىمداستىرۋداعى استانانىڭ ءرولىن جوعارى باعالادى.

اڭگىمەلەسۋ بارىسىندا ساۋدا-ەكونوميكا، ەنەرگەتيكا جانە كولىك- لوگيستيكا سالالارىندا بۇعان دەيىن قول جەتكىزىلگەن ۋاعدالاستىقتارعا نازار اۋدارىلدى. قاسىم-جومارت توقايەۆ پەن گۋربانگۋلى بەردىمۇحامەدوۆ بىرلەسكەن جوبالاردىڭ جۇزەگە اسىرىلۋىنا كوڭىلدەرى تولاتىنىن جەتكىزدى.

كەزدەسۋدە دوستىق ءارى تاتۋ كورشىلىك رۋحىندا جان-جاقتى دامىپ كەلە جاتقان مادەني-گۋمانيتارلىق بايلانىستى ودان ءارى نىعايتۋدىڭ ماڭىزىنا ءمان بەرىلدى.

تاراپتار قازاقستان پرەزيدەنتىنىڭ بيىل قازان ايىندا تۇرىكمەنستانعا جوسپارلانىپ وتىرعان ساپارىنىڭ دايىندىق بارىسىن تالقىلادى.